Фестивалыр зэхуащIыж

СССР-м и цIыхубэ артист, дирижёр цIэрыIуэ Темыркъан Юрэ и фэеплъу шыщхьэуIум и кIэхэм Музыкэ къэрал театрым щызэхэта фестивалыр зэхуащIыжащ. «Темыркъаным и пшыхьхэр» зыфIаща а Iуэхур КъБР-м ЩэнхабзэмкIэ и министерствэм къызэригъэпэщащ, УФ-м щэнхабзэмкIэ и министерствэр и дэIэпыкъуэгъуу.
Iуэху гуапэм хыхьэу екIуэкIа пшыхьхэм цIыхушхуэ зэхуашэсащ икIи ахэр щIэщыгъуэ ящыхъуащ. Фестивалым щагъэлъэгъуащ Темыркъаным и гъащIэмрэ гуащIэмрэ теухуауэ Стрижак Никэ триха «Автопортрет на полях партитуры. Юрий Темирканов» фильмыр. Санкт-Петербург и филармонием Налшык щытрихат «Юрий Темирканов. Оставшийся навечно в памяти народа» фильмыр, Темыркъан Юрэ и оркестр цIэрыIуэр и гъусэу 2023 гъэм ита концертым, маэстрэм и юбилей къэблагъэм саугъэт папщIэу хуигъэхьэзыру. Илъэс 85-рэ ирикъуным мазэ фIэкIа къэмынэжауэ дунейм ехыжащ Темыркъаныр. Аращ фильмыр фэеплъ щIэхъуар. Музыкант цIэрыIуэхэр, Къэбэрдей-Балъкъэрым щыпсэухэр, артистым и Iыхьлыхэр фильмым щытопсэлъыхь зэрыгушхуэ Темыркъан Юрэ зыIэригъэхьа зэфIэкIышхуэхэм, абы и гъащIэмрэ гуащIэмрэ. 
Флегонтовэ Аннэ илъэс куэдкIэ музыкантым ита концертхэм и лэжьэгъухэмрэ ныбжьэгъухэмрэ ятриха сурэтхэр щызэхуэхьэса «Памяти любимого маэстро» выставкэри щагъэуват Музыкэ театрым и пэIущIэ пэшым. 
Фестивалым хыхьэу Налшык и хьэщIащ Санкт-Петербург къалэм Шостакович Дмитрий и цIэр зезыхьэ и филармонием и унафэщI Черкасов Илья, УФ-м и цIыхубэ артист, виолончелист Ролдугин Сергей.