Мэзытхьэ къыдэуи!

Къуажэм дэкIри, Нэгей и къуэ Лъэпщагъуэ мэз лъапэм пщыIэ щыхисащ. Гъунэгъу пщыIэм зы мыщэ, зы дыгъужь, зы бажэ тест.

Iэдакъэжьауэ ищIри, мыщэр ипщэкIэ плъащ:

 - Хэт мэз лъапэм пщыIэ къыщыхэзысар?

- Нэгей и къуэ Лъэпщагъуэщ, - жиIащ бажэм. - Дзыгъуащэ къежьауэ зэхэсхащ.

 - Лы жьэрымэ къысщIехьэ, - жиIащ мыщэм, памэри. - КIуэ, бажэжь цIыкIу, игъэжьаIамэ, дызэдзэкъэн гуэр къытхуэхь.

Бажэр Нэгей и къуэм деж кIуащ.

- Нэгей и къуэ Лъэпщагъуэ! - джащ бажэр.

Джэдур пщыIэм къыщIэкIащ.

 - Хэт ар? Сыт ухуей?

- Ныщхьэбэ дызэдзэкъэн жери, мыщэм сыкъигъэкIуащ, - жиIащ бажэм. - Ди хьэтыр къэлъагъу.

- Фи хьэтыр сымылъагъумэ, хэт и хьэтыр слъагъун! - жиIащ Нэгей и къуэ Лъэпщагъуэ. - Модэ зы бажэ кIэбдз фIэздзащи, пщыхьэщхьэшхэ фхуэхъунщ.

- Бажи къэпщэкIурэ уэ? Дзыгъуащэ укъежьауэти зэрызэхэтхар, - и фэр пыкIащ бажэм.

 - Дзыгъуи сощэ, бажэлри си мыхьэмышхкъым.

- Мэзытхьэ къызэуи! Жэщ нэщI итхмэ, нэхъыфIи! - жери, бажэр Нэгей и къуэ Лъэпщагъуэм и пщыIэм къытекIыжащ.

- Уи хьэтыр къилъэгъуакъэ? - къеупщIащ мыщэр.

- Къилъэгъуакъым. Хьэтырыншэ гуэрщ гъунэгъу къытхуэхъуар.

- Уэ кIуэ, дыгъужьыжь, уэ уи хьэтыр къилъагъункIэ мэхъу, - жиIащ мыщэм.

Дыгъужьыр Нэгей и къуэ Лъэпщагъуэ и пщыIэм техьащ.

- Нэгей и къуэ!

 Джэдур пщыIэм къыщIэкIащ.

- Хэт ар? Сыт ухуей?

- Мыщэм сыкъигъэкIуащ: ныщхьэбэ дызэдзэкъэн гуэр къыдэт.

- Модэ дыгъужь блатхьэ фIэздзащи, хьы, пщыхьэщхьэшхэ фхуэхъунщ, - жиIащ джэдум.

- Уэ дыгъужьи къэпщэкIурэ?

- Дыгъужьи къызощэкIу.

- Мэзытхьэ къызэуи!

И фэр пыкIауэ, дыгъужьыр пщыIэм къытекIыжащ.

- Уэри уIэнэщIи. Уи хьэтыр къилъэгъуакъэ? - къеупщIащ мыщэр.

- Къилъэгъуакъым, - жиIащ дыгъужьым. - Хьэтырыншэ гуэрщ ди гъунэгъур.

- Сэ сыкIуэнщи, сеплъынщ, - жиIащ мыщэм. - Си хьэтыр къилъагъункIэ мэхъу.

КIуэри, джащ:

 - Нэгей и къуэ!

Джэдур пщыIэм къыщIэкIащ:

- Хэт ар? Сыт ухуей?

- Ди хьэтыр къэлъагъуи ныщхьэбэ дызэдзэкъэн гуэр къыдэт: дыныбэнэщIщ.

- Фи хьэтыр сымылъагъумэ, хэт и хьэтыр слъагъун: модэ мыщэ дзажэ фIэздзащи, хьы, пщыхьэщхьэшхэ фхуэхъунщ, - жиIащ джэдум.

- Уэ мыщи къэпщэкIурэ?

- КъызощэкIу, - жиIащ джэдум. - Бажэлрэ дыгъужьылрэкIэ зызгъэнщIа нэужь, мыщэл тызошхыхьыж.

 - Мэзытхьэ къызэуи! - и фэр пыкIащ мыщэм. - Жэщ нэщI итхмэ, дыщэм хуэди!

И псэр IукIауэ, мыщэр Нэгей и къуэ Лъэпщагъуэ и пщыIэм къытежыжащ:

- Уэхьэхьей! Емынэр ди унэм къихьащ! Щхьэж и щхьэр зэрыхихын, маржэ! Мы мэзым дишх щыIэжкъым дэ! Нэгей и къуэм дыIэщIэмыкIуадэ щIыкIэ, лъэныкъуэ зевгъэз!

Мыщэм, дыгъужьым, бажэм, щхьэж и занщIэр и гъуэгуу, кIэбгъу защIыжри, хьэрэкъуагъкIэ дыхьэжащ.