Бэрэгъун Заур япэ йощ

Япэ каналым иригъэкIуэкI «Голос. Дети» макъамэ теленэтыным ди щIыналъэм щыщу хэт Бэрэгъун Заур етIуанэ Iыхьэм щыпхыкIащ.

Бэрэгъун Заур игъэзэщIа «Небо» уэрэдыр къэпщытакIуэхэми нэтыным еплъхэми ягу зэрыдыхьар гуапэщ.

КъБР-м и Iэтащхьэ КIуэкIуэ Казбек ехъуэхъуащ «Голос. Дети» нэтыным республикэм и цIэкIэ кIуа уэрэджыIакIуэ ныбжьыщIэ Бэрэгъун Заур и зэфIэкIхэр абы къызэрыщигъэлъэгъуамкIэ.

- Сигуми си псэми къабгъэдэкIыу Заур сохъуэхъу, дяпэкIи ехъулIэныгъэхэр иIэну си гуапэщ! - жиIащ КIуэкIуэм.

КъыжыIапхъэщ, Заур илъэсиплI зэрырикъурэ уэрэд жыIэным зыхуегъасэ. УэрэджыIакIуэхэм я зэпеуэ, телепроект куэдым ар мызэ-мытIэу щытекIуащ. КъинэмыщIауэ, «Пэрытхэр» зэгухьэныгъэм хэт ныбжьыщIэ Iущыр жылагъуэ Iуэхухэми жыджэру хэтщ.