КIыщокъуэ Алим пщIэшхуэ зиIа, цIыхугъэ лъагэрэ лIыгъэ мыкIуэщIыжрэ зыхэлъа цIыхуу щытащ. Сыт хуэдэ IэнатIэ пэрытами, сыт хуэдэ къалэн и пщэ дэлъами, ар псоми къахэщырт и гуащIэр зэрыинымкIэ, зэрыцIыху пэжымкIэ – абыкIэ щапхъэт Алим дапщэщи.
КIыщокъуэм и IэдакъэщIэкIхэр бзэ куэдкIэ зэдзэкIауэ дунейм къытехьащ. Жылагъуэм пщIэшхуэ зэрыщиIам, зэфIэкI ин зэрыбгъэдэлъам, тхакIуэ, усакIуэ зэчиифIэу зэрыщытам и щыхьэтщ цIыху цIэрыIуэ куэдым Алим хужаIахэр. Абыхэм ящыщ зыбжанэм фыщыдгъэгъуэзэнщ.
* * *
Тихонов Николай: КIыщокъуэ Алим совет поэзием жьантIэр щызыIыгъхэм ящыщщ. Ар сыт и лъэныкъуэкIи и лъэпкъым быдэу пыщIащ. И анэдэлъхубзэм и къулеягъыр абы IэкIуэлъакIуэу щегъэшэрыуэ гурыщIэ нэхукIэ псыхьа и усэхэм. Алим и псэм и щIасэщ псалъэ шэрыуэр, гухэлъ пшыналъэхэм къадэкIуэу, абы и усэхэр ягъэщIэращIэ гушыIэ дахэми, хъуэрыбзэ жанхэми. Абы и усэхэр лъэныкъуэ куэдкIэ узэщIащ, купщIафIэщ. КъызыхэкIа лъэпкъым и гъащIэм нэхъ Iуэхугъуэшхуэу, гукъинэжу къыщыхъуахэр, езым и нэгум щIэкIа, езыр зыхэта къэхъукъащIэ телъыджэхэр КIыщокъуэм и усэ пшыналъэхэм фIэщхъуныгъэ хэлъу къыщыгъэлъэгъуащ.
Светлов Михаил: КIыщокъуэм и творчествэм и фIыпIэ нэхъыщхьэу къэплъытэ хъунущ гупсысэ жан, акъыл куу зэрыхэлъыр, и темэр IупщIу зэрыубзыхуар… Ар нэгъуэщIхэм яхыумыгъэгъуэщэн усакIуэ телъыджэщ.
Баруздин Сергей: Алим Алыхьым и пащхьэм къикIа усакIуэщ. Алим Алыхьым и пащхьэм къикIа тхакIуэщ. Сэ абы и усэ куэд гукIэ сощIэ. Сэ фIыуэ сыщыгъуазэщ абы и прозэ тхылъхэр зыхуэдэми. ТхакIуэ IэщIагъэр Алыхьым къызэрыритам хуэдабзэу, КIыщокъуэм Алыхьыр къыхуэупсат цIыхугъэ телъыджэкIи. Пэжщ, а цIыхугъэ нэсым къегъэжьапIэ хуэхъуар Алим къэзылъхуахэмрэ ар къызыхэкIа лъэпкъымрэщ…
Ахматовэ Раисэ: Алим къуэпскIэ япыщIащ зи жьауэм къыщIэхъукIа къуршхэм, и адэжь щIыналъэм. Ауэ, къуршхэм елъэгэкIыу заIэтри, абы и усыгъэхэм хэкум и гъунапкъэхэр зэпаупщIащ, дунейр зэлъащIысащ. КIыщокъуэм и творчествэр зищIысыр фIыуэ ящIэ искусствэ нэскIэ зэджэр тэмэму къызыгурыIуэхэм. КъызыхэкIа лъэпкъым и къуэ пэж КIыщокъуэ Алим къэзылъхуахэм я гум къипсэлъыкIыу, я гурыгъу-гурыщIэхэр къиIуатэу, абыхэм псэкIэ япэджэжу и гъащIэр ехь. Аращ ар фIыуэ къыщIалъагъури. ЛIыфIымрэ шыфIымрэ зэрызэхуэфащэм хуэдэу, Алимрэ ар къэзылъхуа лъэпкъымрэ зэхуэфащэщ. Ауэ КIыщокъуэр бгырыс псоми ди зэхуэдэ Алимщ – псоми ди нэщ, ди псэщ.
Кугультинов Давид: КIыщокъуэ Алим и зы тхылъи къыдэкIакъым, семыджауэ. Седжащ, зыщызмыгъэнщIу, ар зи Iэдакъэ къыщIэкIам семыфыгъуэу, ауэ сехъуапсэу, нэхъыфIыж къехъулIэмэ си гуапэу. Алим и тхылъыщIэ седжамэ, Iуащхьэмахуэ и щыгу сыкъихутауэ къысфIощI дапщэщи. Iуащхьэмахуэ и щыгу уитмэ, жыжьэ уноплъыс, къуршыбгъэ ухъуауэ къыпщохъу. КIыщокъуэ Алим и дэтхэнэ тхылъри Iуащхьэмахуэ еплъыт хъун лъагапIэщ.
Дементьев Андрей: КIыщокъуэ Алим и усэхэр зэм къуршыпсхэм хуэдэу уэрщ, зэм Кавказым щаIэт хъуэхъухэм хуэдэу щIэращIэщ, щIэщыгъуэщ, зэм ди Хэкушхуэм и гъатхэ уэгум хуэдэу зэIубзщ, гъунапкъэншэщ. Образ телъыджэкIэ гъэнщIауэ КIыщокъуэм и къалэмыпэм къыщIэкI поэзием нэIуасэ ухуэхъуа нэужь, гукIи псэкIи зыхыбощIэ дызэрыт зэманыр зыхуэдэр, икIи тпэжыжьэу, икIи сыт щыгъуи ди псэм пэгъунэгъуу щыт Кавказым и дахагъыр, ныбжьэгъу пэжым и гурыщIэ къабзэр.
Огнев Владимир: КIыщокъуэ Алим гъуэзэджэу щыгъуазэщ къызыхэкIа лъэпкъым и гъащIэм, абы и гуауэри, и гуфIэгъуэри псэкIэ зыхещIэ. ГъащIэм и къэхъукъащIэхэм ар сыт щыгъуи хуэнабдзэгубдзаплъэщ.
Гринберг Иосиф: КIыщокъуэ Алим игукIи и псэкIи адыгэлIщ, ауэ абы и къалэмыпэм къыщIэкI усэ сатырхэр къызыхэкIа лъэпкъым и шыфэлIыфэр къэгъэлъэгъуэным къыщызэтеувыIэркъым; абы и усэхэм гукъинэжу нэрылъагъу ящI псэукIэщIэр зыухуэ цIыхум и гъащIэр, и дунейр, ар емышу IуэхугъуэщIэхэм зэрыхущIэкъур, мурад инхэм зэрыщIэбэныр, абы и пщэдейр зэрызэIубзыр.
Гоффеншефер Вениамин: … КIыщокъуэм и романым («Хъуэпсэгъуэ нур») и закъуэщ, къэбэрдей, кавказ литературэхэр дэнэ къэна, совет литературэ псор къапщтэмэ, апхуэдэу убгъуауэ, лъэныкъуэ куэд къызэщIиубыдэу большевикхэмрэ шэрихьэтым и Iумэтым итхэмрэ яку илъа бэнэныгъэм тепсэлъыхьауэ зэкIэ щыIэр.
Гулиа Георгий: Дэтхэнэ зы тхылъыщIэри тынш цIыкIуу къехъулIакъым КIыщокъуэм. Зауэм и мафIэ лыгъэм къилыгъуауэ, гузэвэгъуэ Iэджэм и гур ираудауэ и дуней гъащIэр кърихьэкI пэтми, Алим а псоми къелащ, къела къудейкъым – абы дэгъуэу къохъулIэ Iуащхьэмахуэ щыгур пщIэрэ щIыхькIэ къылъызыгъэсыну тхылъыщIэхэр…
Солоухин Владимир: КIыщокъуэ Алим и усыгъэхэм къуэпс, лъабжьэ яхуэхъур езы усакIуэр къызыхэкIа лъэпкъым къыдекIуэкI хабзэхэмрэ IуэрыIуатэхэмрэщ… Лъабжьэ быдэ зыгъуэта жыгым зэрызиужьым, зэрызиIэтым ещхьу, КIыщокъуэм и усыгъэхэм я къуэпсхэм задзмэ, я жьауэр ин хъууэрэ, абыхэм дунейпсо усыгъэм утыкушхуэ щаубыдащ… Къэбэрдей-Балъкъэрым и цIыхубэ усакIуэ КIыщокъуэ Алим ди лъэхъэнэгъу усакIуэхэм я нэхъыфI дыдэхэм, я нэхъ ин дыдэхэм, зи усыгъэхэр нэхъыбэ дыдэрэ зэрадзэкIхэм ящыщ зыщ.
Хузангай Педер: Къэбэрдей усакIуэм и шагъдийр куэд щIащ Кавказ къуршыжьым къыщежьэу утыкушхуэ зэрихьэрэ. Абы и шы лъэ макъыр ди Хэкум адрыщIкIэ жыжьэу къыщоIу. А шагъдийм КIыщокъуэм и дамыгъэ телъщ.
