Алыхьым гу къабзэкIэ бгъэдэт цIыхуфI гуэрым блэшхуэ къепщылIэри къыжриIащ: «Алыхьым фIыгъуэр къыпхуищIэ! КхъыIэ, си бийр си ужьым итщи, сыгъэпщкIу». ЛIым и кIагуэ кIыхьыр зэIуихащ, блэр и гуфIакIэм дэпщхьэфын хуэдэу. АрщхьэкIэ блэм жиIащ:
- Абдежым сыкъыщалъагъунущ, уи жьэр зэтехи, уи кIуэцIым сигъапщхьэ.
ЛIым жеIэ:
- СыбукIынкIэ согузавэ.
- Алыхьым и цIэкIэ соIуэ, щIыми уафэми тетхэр си щыхьэтщ, сэ ар уэзмыщIэн!
ЛIым и жьэр зэтрихри, блэр жьэдэпщхьащ. Зэман дэкIри, ар къезыхужьа цIыхур къыIухьащ.
- МыбыкIэ блэ гуэр къэпщащ, и лъэужьыр къэсхуу. Умылъэгъуауэ пIэрэ?
ЛIым илъэгъуауэ зыкъригъэщIакъым.
Блэм и шынэр щхьэщыкIа нэужь, лIым къыжреIэ:
- Уа делэжь! Хэдэ иджы, уи гура хьэмэ уи тхьэмщIыгъура сызэуэнур? Иджыпсту узукIынущ!
- Уи тхьэрыIуэр-щэ? Уи зэран къызумыгъэкIыну псалъэ къызэптатэкъэ?
- Уэ нэхърэ нэхъ делэ иджыри къэс сыхуэзакъым! Сэрэ уэ укъызытехъукIа цIыху псоми я адэ Iэдэмрэ дызэрызэбийр щхьэ пщыгъупщэжа? ФIы къысхуэпщIэ зэрымыхъунур пщIэртэкъэ?
- Мо бгым сынэсыху пIалъэ къызэти, жэуап уэстынщ.
ЛIыр бгым нэса нэужь, андез ищтэщ, нэмэз ищIри, Алыхьым елъэIуащ:
- Уа си Тхьэ! Мы блэм сыкъегъэл!
Абы и духьэр къипсэлъын иухатэкъым мэ дахэ къызыкIэрих цIыху гуэр къыбгъэдыхьэу тхьэмпэ удзыфэ къыщыхуишиям, ар игъэныщкIуну къыжриIэу.
ЛIым тхьэмпэр игъэныщкIуа нэужь, куэд дэмыкIыу блэр Iыхьэ-Iыхьэурэ къыдэхыжын щIидзащ. Апхуэдэу Алыхьталэм фIыуэ илъэгъуа цIыхур къригъэлащ.
- Ухэт уэ? – еупщIащ цIыху къабзэр тхьэмпэр къэзыхьа щIалэм.
- Сэ сыпсапэщ, еплIанэ уафэм сыкъикIауэ, - къыжриIащ. – Алыхьым лъэIукIэ зыщыхуэбгъазэм, ебланэ уафэм тес мелыIычхэр зэщIэвууащ: «Уа ди Тхьэ! Уи пщылIыр къегъэл!» Алыхьым и унафэкIэ сэ Жэнэтым псынщIэу сынэсщ, Тубэ жыгым и зы тхьэмпэ къыпысчри къыпхуэсхьащ. ДяпэкIи фIы пщIэн щумыгъэт. Ар зыхуэпщIам щыгъупщэжми, фIыщIэншагъэ дэплъагъуми, псапэ пщIар Алыхьталэм деж щыкIуэдынукъым.
Мы хъыбарым «ФIы щIэи, псым хэдзэ» адыгэ псалъэжьыр уигу къегъэкIыж. Ауэ куэдым ящIэркъым а псалъэжьыр зэрынэхъ кIыхьыр, ар иджыри тыркубзэм хэтщ, зымащIэкIэ адыгэбзэм къыщхьэщыкIыу: «ФIы щIэи, хым хэдзэ: бдзэжьейм къыгурымыIуэми, Алыхьым къыгурыIуэнщ».
