Дамир и хъуэпсапlэхэр

Шэджэм Етlуанэ къуажэм къыщалъхуа Джэдмышх Дамир пасэ дыдэу спортым дихьэхащ.  Сабий садым кlуэн щыщlидзам, бэнэкIэ хуитымкIэ спорт секцэм хыхьащ икIи Хъубий Анатолэ и гъэсакlуэу япэ лъэбакъуэхэр абы щичащ.

 Спортым гулъытэшхуэ щыхуащl унагъуэм къыщыхъуащ Дамир. Шэчыншэуи, сабийр а унэтIыныгъэм зэрыдихьэхам ар и щхьэусыгъуэ нэхъыщхьэщ. Нэрылъагъут щlалэм спорт зэфlэкl лъагэ къызэрыкъуэкlыфынур. Абы папщlэ ерыщу дэлэжьэн хуейти, ар къызыгурыIуа адэм гулъытэ нэхъ хуищIын щIидзащ. Жэщ-махуэ имыlэу, Дамир и адэ Борис и гъусэу, бэнэкIэ хуитым и lэмал зэмылlэужьыгъуэхэр зригъащlэрт. Апхуэдэ дыдэуи и гъэсакIуэм и нэIэм щIэту и зэфIэкIхэм хигъахъуэрт. Спортым и дунейр кIуэ пэтми зыфIэгъэщIэгъуэн хъу щIалэм и хъуэпсапIэхэми хэхъуэрт.

Псоми зэрытщlэщи, Къэбэрдей-Балъкъэр Республикэм дызэрыгушхуэ спортсмен цlэрыlуэ куэд дыдэ диlэщ. Апхуэдэхэщ Олимп джэгухэм зэфIэкI лъагэхэр къыщызыгъэлъэгъуа Къардэн Мурат, Хъущт Аслъэнбэч, Мудрэн Беслъэн, Джэду Iэниуар, Махуэ Билал сымэ. Абыхэм я ехъулIэныгъэхэм иригушхуэ Дамир  быдэу игу ирилъхьащ спортым щапхъэу къыщилъытэ щIалэхэм ещхьу а унэтIыныгъэм и цIэр фIыкIэ щигъэIуну. Зыхуигъэувыжа мурадхэм ерыщу хуэкIуэ Джэдмышхым иджыпстуи зэфIэкI хъарзынэхэр къегъэлъагъуэ, зэхьэзэхуэ зэхуэмыдэхэм я медалхэмрэ кубокхэмрэ и бащэщ, адэкIи абы теухуа хъыбар гуапэ куэди зэхэтхынущ.

Гъатхэпэм и 25 – 26-хэм Орёл къалэм щекIуэкIащ бэнэкIэ хуитымкlэ урысейпсо зэпеуэр. Абы хэтащ ди къэралым и щIыналъэ 57-м къикlа бэнакlуэ 463-рэ. Зэпеуэм къыщыхэжаныкIащ Шэджэм къуажэм дэт спорт школым и гъэсэнхэу Джэдмышх Дамиррэ Джыджий Къантемыррэ. ЩIалэхэм зэхьэзэхуэм и домбеякъ медалыр къыхуагъэфэщащ. Абы ипкъ иткlэ, а тlур Урысейм и гуп хэхам хагъэхьащ. Бэнакlуэ ныбжьыщIэхэр зэпеуэм хуигъэхьэзыращ спорт школым и гъэсакlуэ Хъубий Мурат.

АдэкIи дыпоплъэ Дамир и текIуэныгъэщIэхэм. Уафэгум къитIысхьа вагъуэщIэ цIыкIур хуэм-хуэмурэ нурыбэ зэрыхъум хуэдэу адэкIи зиужьыну, дунейпсо цIэрыIуагъ зиIэ спортсмен лъэщ хъуну Тхьэм жиIэ!

ДзыхьмыщI Даринэ.