Хэт Кеннеди зыукIар?

США-м и президент Трамп Дональд хэхыныгъэхэм я пэкIэ къызэригъэгугъауэ щытахэм ящыщ зыр игъэзэщIащ. Абы и унафэкIэ хэIущIыIу ящIащ иджыри къэс щэхуу Лъэпкъ архивым щахъума дэфтэр куэд. Я нэхъыбэр егъэщIылIащ 35-нэ американ президент Кеннеди Джон зэраукIам.

Фигу къэдгъэкIыжынщи, а щIэпхъаджагъэр 1963 гъэм щэкIуэгъуэм и 22-м Даллас къалэм (Техас штат) щалэжьащ. А бзаджэнаджагъэр и IэдакъэщIэкIыу къалъытащ тенджыз лъэсырыкIуэдзэхэм яхэта Освальд Ли. Сэмэгу Iуэху еплъыкIэхэр зиIа абы и къекIуэкIыкIар гъэщIэгъуэнщ. Франджымрэ Финляндиемрэ щыIа иужь ар СССР-м къэкIуащ, совет паспорт иратыну лъэIуащ. Минск щыпсэуащ, унагъуэ щыхъуащ. Кеннеди яукIыным илъэсрэ ныкъуэрэ иIэжу США-м игъэзэжащ. Дэфтэрхэм къыщыгъэлъэгъуащ щIэпхъаджагъэр абы и закъуэ илэжьауэ. Ар куэдым иджыри къэс я фIэщ хъуркъым, аращ зэдауэри къызыхэкIыр.

Апхуэдэ Iуэху еплъыкIэр нэхъ ткIийуэ зымыдэхэм ящыщщ Кеннеди и къуэшым и къуэ Кеннеди Роберт-нэхъыщIэр. А цIыхур демократие партым хэтащ, ауэ абы къыхэкIыжащ, мы зэманым Трамп и гупым щыщщ. Иужь илъэсхэм абы емышу жеIэ и адэ къуэшри езым и адэ Роберти (ар США-м юстицэмкIэ и министру лэжьащ икIи президенту хахыну къагъэлъэгъуауэ щытащ) зыIэщIэкIуэдар ЦРУ-м щыщ къару щIэуфахэр арауэ.

 Иджы щэхуу яхъума дэфтэрхэр къытрадзащи, езы Трамп зыхуэарэзыжу жеIэ: «ТхылъымпIэ ди куэдщ. Фызэджэн фиIэщ!». Ар пэжщ: тхылъымпIэхэр куэд мэхъу. Уеблэмэ, егъэлеяуэ. Къызыщывгъэхъут дэфтэр мини 2-рэ 182-рэ къызэщIэзыубыдэ напэкIуэцI мин 63-рэ! Абыхэм яхыхьащ илъэсипщI зыбжанэм ехьэлIа Iэрытххэри, зэрыбкIэ тедзахэри. Американ тхыдэджхэм ящыщ зым къызэрибжамкIэ, электрон файл псори къызэIухын къудейм махуитI текIуэдэнущ.

АрщхьэкIэ телъыджэм пэплъахэр къэпцIауэ къыщIэкIащ: къытрадзахэм ящыщ куэдым щIэ гуэри хэлъкъым, ахэр хэIущIыIу зэрыхъурэ куэд щIащ. Ауэ уащрохьэлIэ а зэманым щыIэ щытыкIэр уи нэгу къыщIэзыгъэувэжхэми. Нэхъ телъыджэ дыдэр зэгъэщIылIари 35-нэ президентыр зэраукIаракъым, атIэ… фошыгъущ. Дэфтэрхэм сэтей къащIащ блэкIа лIэщIыгъуэм и хыщI гъэхэм я пэщIэдзэм ЦРУ-м Кубэм кърашу СССР-м къашэ фошыгъум узыншагъэм емызэгъхэр хилъхьэу зэрыщытар. А ерыскъыпхъэр Америкэ Курытым и кхъухь тедзапIэхэм къыщралъхьэрт, ахэрат бзаджэнаджагъэр щызэхащIыхьри. Сыт щхьэкIэ? Кубэм и фошыгъур пшхы мыхъуну къыщIрагъэдзын мурадкIэ. ЦIыхухэм я гъащIэм дежкIэ шынагъуэ пылътэкъым, ауэ мэ гурымыхь щагъэурт. Абы Совет Союзым щыпсэухэм ягу Кастрэ Фидель щигъэкIыну къалъытэрт. Апхуэдэуи псори зэхэту доллар меларди 3,5-рэ и уасэ фошыгъу зэIыхьам СССР-м и экономикэм хэщIыныгъэшхуэ иратын хуейт. Дэфтэрхэм ягъэбелджылыркъым а ерыскъыпхъэр ди къэралым къэсарэ къэмысарэ, ауэ къагъэлъагъуэ мы Iуэхум Кеннеди щыгъуазэ зэрыхъуар икIи зэригъэгубжьар.

НэгъуэщI телъыджэр зэпхар жэмхэрщ. ТхылъымпIэхэр щыхьэт тохъуэ ЦРУ-м Германие Демократие Республикэм унагъуэ Iэщхэм щхъуэ щарихыу зэрыщытам. Аргуэру дыщIоупщIэ: сыт щхьэкIэ? Щхьэусыгъуэр къызэрыгуэкIщ - ГДР-м и цIыхухэм я псэукIэр иригъэкIакIуэу ахэр КъухьэпIэ зэщIэгъагъэм нэхъри хуэпабгъэ ищIынырт.

Зэрытлъагъущи, мы IуэхуитIри Кеннеди зэраукIам зыкIи пыщIакъым, ауэ белджылы къащI ЦРУ-м къигъэсэбэп Iэмалхэр зыхуэдэр, абы и лъэбжьанэхэр куэдым зэрылъэIэсыр.

Езы президентыр зэраукIам къыгуэхыпIэ имыIэу егъэщIылIащ США-м и дзэм и капитану икIи ЦРУ-м и бзэгузехьэу щыта Андерхилл Джон и цIэр къызыхэщ тхылъымпIэ цIыкIур. Абы къызэрыхэщымкIэ, ЦРУ-м къулыкъушхуэ щызыIыгъхэм зэрапыщIам къыхэкIыу Андерхилл ищIэрт Кеннеди и бийуэ щэхуу зэрызэгурыIуар. Президентыр яукIа иужь етIуанэ махуэм, зричри, ар Вашингтон дэкIащ икIи а пщыхьэщхьэ дыдэм егъэлеяуэ къызэщIэплъауэ екIуэлIащ Нью-Джерси щыпсэу и ныбжьэгъум и фэтэрым.

Тхыгъэм укъыщоджэ: «Андерхилл жиIащ Кеннеди езыгъэукIар ЦРУ-м лъэкIыныгъэшхуэ щызиIэ цIыхухэрауэ. Езым и гъащIэми тешыныхьырти, абы зигъэхьэзырырт къэралым икIыну. Ауэ илъэс ныкъуэ дэкIа иужь езым и фэтэрым къыщагъуэтащ мыпсэужу. Хабзэхъумэхэм ягъэуващ Андерхилл зиукIыжауэ. Трамп и телъхьэхэр гуфIащ: мис, пэжыр сэтей къэхъуащ, «къэралым и кIуэцIым гъэпщкIуауэ щыIэ къэралыр» къыщIагъэщащ. Трамп абыхэм япэщIэуващ.

АрщхьэкIэ мыбыи щIэ гуэри хэлъкъым: а тхылъымпIэ цIыкIум итхэр зэи щIэуфауэ щытакъым, ахэр къызэрытрадзэрэ куэд щIащ…

Освальд Ли теухуауэ хэIущIыIу ящIахэм ящыщу нэхъ гу зылъытапхъэр дэфтэритIщ. Япэр 1990 гъэхэм Урысейм США-м ирита тхылъхэр я лъабжьэу ЦРУ-м игъэхьэзырауэ щыта тхылъымпIэрт. Абы къыщыгъэлъэгъуащ КГБ-р Освальд кIэлъыплъу зэрыщытар, хэбгъэзыхьмэ, езым и агент ищIыну зэрыхэтар. АрщхьэкIэ а мурадым къыпыкIын хуей хъуащ Ли «IэубыдыпIэншэу икIи ущыгугъ мыхъуну» къызэралъытам къыхэкIыу. Апхуэдэу КГБ-м и хъыбархэм къахощ «американым шэрыуэу Iэщэ зэрыхуэмыгъэуэфыр».

Мыбдежым упщIэ къыщыкъуокI: дауэ атIэ Освальд тIур Кеннеди зэкIэлъхьэужьу зытехуа шищ секунди 7-м къриубыдэу къызэрыкIа фочыр зэригъэIэрыхуар?

ЕтIуанэр 1978 гъэм Черногог Сергей гуэрым Инджылызым и посольствэм хуитхарщ. Абы къыщыгъэлъэгъуащ Кеннеди яукIыным мазэ бжыгъэ иIэжу 1963 гъэм бадзэуэгъуэм и I8-м Британиемрэ США-мрэ я властхэм Освальд Кеннеди иукIыу СССР-м кIуэсэжыну зэримурадыр яжриIауэ. Ауэ абы щыхьэт техъуэу нэгъуэщI зыри къахуэгъуэтакъым.

ЖытIэнщи, абы ещхь гуэр къыщыхъуат Австралие жыжьэми. Президентыр зэраукIрэ илъэс зыбжанэ дэкIауэ Канберрэ щыIэ американ посольствэм телефонкIэ псалъэри, совет дипломат IуэхущIапIэм щылажьэ полякыу зызыгъэIуам яжриIащ доллар мини 100 иратыну къагъэгугъэу «Советхэм Кеннеди Iурагъэха» хуэдэу. Псэлъар зэщымыщхъу гуэру къалъытэри, абы жиIахэр Iуэху ящIакъым, ауэ Вашингтон лъагъэIэсащ.

Ахэращ апхуэдиз тхылъымпIэм къахэпхыну хэлъыр. Американхэр нэхъыбэм щыгугъат. Кеннеди яукIыну зэгурыIуат хьэмэрэ, иджыри къэс ягъэныщкIур пцIы? А упщIэр жэуапыншэу къэнащ.

Езы Трампи арэзы хъуакъым, президентми  къелъытэ Кеннеди зыукIар Освальду, «ауэ абы зэфIэкIышхуэ зыбгъэдэлъ цIыхухэр дэIэпыкъуауэ».

КъызэрыщIэкIымкIэ, Трамп мыбдеж къыщыувыIэнукъым. Абы къигъэгугъащ Кеннеди Роберти, Кинг Лютер Мартини зэраукIам егъэщIылIа дэфтэрхэри хэIущIыIу яригъэщIыну. БлэкIар къагъэнэхуэж хуэдэщ!