Лъэпкъ IэщIагъэр зыхъумэхэр

Гъэлъэгъуэныгъэм хузэхуахьэсат дыщэидэкIэ щIа бзылъхугъэ пхъуантэ цIыкIухэр, хьэлэмэту зэIуща цIуугъэнэхэр, жьыхухэр, пэшхэр зэрагъэдахэ, шууейхэм къагъэсэбэп хьэпшыпхэр, нэгъуэщIхэри. Лъэпкъ IэщIагъэр зи лъабжьэ а дахагъэм уимытхьэкъункIэ Iэмал иIэкъым.

КъыжыIапхъэщ: Налшык щылажьэ «Дэнлъэч» студием илъэс зыбжанэ хъуауэ ныбжьыщIэхэр йокIуалIэ. Лъэпкъым къыдекIуэкI хъугъуэфIыгъуэхэр хъумэжынырщ, щIэблэр пасэрей IэщIагъэ дахэм хэгъэгъуэзэнырщ гупжьейр зыгъэлажьэхэм я къалэн нэхъыщхьэр. 

КъБР-м и Лъэпкъ музейм и унафэщI Накуэ Феликс зэIущIэм къыщыщыпсалъэм къыхигъэщащ дыщэидэм и фIагъымрэ дахагъымрэ тхыдэшхуэ зэриIэр, гъуаплъэ зэманым щыщIэдзауэ мыпхуэдэ IэщIагъэхэр адыгэм къазэрыдекIуэкIыр, ди лъэпкъэгъу IэпэIэсэхэм я IэдакъэщIэкIхэр зыхуагъадэ щымыIэу, щIэупщIэ яIэу зэрыщытар. Пасэрей IэщIагъэ дахэр зымыгъэкIуэдыжхэм, абы зезыгъэужьхэм я IэдакъэщIэкIхэу Iэщэм, фащэм, шы-уанэ зэтелъым ирахьэлIэу щытахэр зэрыгъэщIэгъуэныщэр жиIащ абы. Псалъэм аппщIэ, фэилъхьэгъуэхэмрэ хьэпшыпхэмрэ ирагъэдахэ къудей мыхъуу, тхыпхъэм гупсысэ куу, мыхьэнэшхуэ иIэу зэрыщытам къытеувыIащ Феликс, икIи пасэрей IэщIагъэм и гъащIэм къыпызыщэхэм, лэжьыгъэхэр зи IэрыкIхэм абы фIыщIэ яхуищIащ лъэпкъ хъугъуэфIыгъуэхэм щIэблэр зэрыдрагъэхьэхым папщIэ.

- Адыгэм ди тхыдэр тщIэн, дджын, дригушхуэн, тхуэхъумэн, тхуэгъэкIуэтэн хуейщ. Абыхэм язщ ди хабзэ дахэхэри, - жиIащ «Адыгэ дуней» лъэпкъ фондым и унафэщI ХьэцIыкIу Рае. – Ди фондым пщэрылъ зыщищIыжахэм ящыщщ щIэблэр дахагъэм дихьэхыу гъэсэныр. Нобэрей гъэлъэгъуэныгъэри абы щыщ зы Iуэхугъуэщ. ДыщIохъуэпс «Дэнлъэч» гъэлъэгъуэныгъэр адыгэ IэщIагъэ дахэм и санэхуафэ хъуну, адэкIи кIуэтэну, зиужьыну. Нобэ мыбы къекIуэлIахэм ар хагъэIуэну, щIалэгъуалэм нэхъыбэу а дахагъэм зратыну дыщогугъ. 

Сабийхэм ядэлажьэ Дзыгъур (Тэрчокъуэ) Марьянэ къытеувыIащ сабийхэр хуабжьу жып телефонхэм, планшетхэм, Интернетым зэрыдахьэхым абы я акъылым, щытыкIэм, хабзэм, я хьэл-щэным зэрызригъэхъуэжым икIи а псор къалъытэу, щIэблэм сэбэп зэрахуэхъуфынум зэрегупсысам. Абы къыхигъэщащ сабийхэм заужьын папщIэ IэпэкIэ лэжьэн зэрыхуейр. Абы и лъэныкъуэкIэ лъэпкъ IэщIагъэхэр псом хуэмыдэжу сэбэпщ. IэщIагъэ дахэр лъэпкъым къытхуэзыхьыжа Шыкъ Талихь гурыIуэщ, интернеткIэ, телевиденэкIэ хъыбар зэбграгъэкIри, мы Iуэху щхьэпэр ирагьэжьауэ щытащ. Талихь зыгъэсар IэпэIэсэ цIэрыIуэу щыта и анэ Пщыгъуэтыж-Шыкъ Шэхьризэтщ. IэщIагъэ дыдэ яхуэмыхъуми, я IэкIэ ягьэхьэзыр дахагъэхэм хъыджэбз цIыкIухэм я хьэл-щэным фIыкIэ зрегъэхъуэж, Марьянэ зэрыжиIамкIэ.

Тыркум къыщыхъуа, адэжь Хэкум къэзыгъэзэжа Шыкъ Талихь тепсэлъыхьащ мы IэщIагъэ дахэр сыт щыгъуи я унагъуэ илъу къызэрекIуэкIам, и анэм хэкужьым икIа бзылъхугъэхэр, езыри яхэту абы зэрыщIипIыкIам, Истамбыл щыIэ Хасэм лъэпкъ IэщIагъэм щыхуагъасэ и гупжьейми екIуалIэхэр игъасэу зэрыщытам, иджы хуэсакъыу, и анэм и фэеплъу а IэщIагъэр зэрихъумэм, нэгъуэщIхэми. Талихь и анэр къыщалъхуа махуэм ирихьэлIэу гъэлъэгъуэныгъэр къызэрагъэпэщащ.

Республикэм щыпсэухэмрэ абы и хьэщIэхэмрэ Iэмал фиIэщ IэпэIэсэхэм я IэрыкI дахэхэм феплъыну бадзэуэгъуэм и 12 пщIондэ.