Зэпеуэм фрегъэблагъэ

«Open OS Challenge» зэпеуэм хэтыну программистхэм я лэжьыгъэхэр зэхуахьэс. Илъэс ещанэ хъуауэ къызэрагъэпэщ Iуэхум щагъэнаIуэ икIи щагъэпажэ программэ зэхэгъэувэным теухуауэ зэфIэкI зыбгъэдэлъхэр. «Open OS Challenge - 2025» зэпеуэр траухуащ Lenuks ядром и системэ зэIухахэм хэту ягъэхьэзыра лэжьыгъэхэм, и саугъэт фондыр сом 1 000 000-рэ мэхъу. Зэпеуэм езым и сайти иIэжщ: openscaler.braim.org.

 Iуэхум хэтыну ирагъэблагъэ Open Source системэм дихьэххэр. Абы хэтыну Iэмал яIэщ ПО-м фIы дыдэу хуэIэрыхуэхэри, студентхэри, системэм елэжьыну щIэзыдзагъащIэхэри. Зи ныбжьыр илъэс 18 ирикъуахэрщ зэпеуэм хагъэхьэр.

«Open OS Challenge» зэпеуэр мы гъэм Iыхьищу гуэшауэ екIуэкIынущ. Абы и дэрэгъу нэхъыщхьэщ СберТех программэ зэхэлъым и урысей къудамэр. Iуэхум долажьэ Git Vers, Скала ^ р, Orion Soft Open Skaler IуэхущIапIэхэр. Операторыр иджырей технологиехэм зегъэужьынымкIэ «ИТ – Планета» зэгухьэныгъэрщ. Зэпеуэм и япэ Iыхьэр жэпуэгъуэм и 15 - 19 махуэхэм екIуэкIынущ. Абы онлайн зэIущIэкIэ къыщапщытэнущ Iуэхум зи зэфIэкI щызыгъэлъагъуэхэм я щIэныгъэр. ЕтIуанэ Iыхьэр екIуэкIынущ жэпуэгъуэм и 25 - 26-хэм. Абы щыгъуэм компьютер программэм зэрелэжьыфыр, системэм зэрыхуэIэкIуэлъакIуэр къагъэлъэгъуэнущ. Зэпеуэм и кIэух Iыхьэр Москва щэкIуэгъуэ мазэм щекIуэкIынущ. НэхъыфI дыдэу зыкъэзыгъэлъагъуэхэр ягъэлъэпIэнущ ахъшэ саугъэтхэмкIэ: япэ увыпIэр къэзыхьым сом 400 000-рэ, етIуанэр зылъысым – сом 300 000-рэ, ещанэ хъум сом 200 000-рэ хуагъэфэщэнущ. ЕплIанэ, етхуанэ увыпIэхэр къэзыхьхэм сом 50 000 иратынущ.

«Open OS Challenge»-р зэпеуэ къудейкъым. Мыбы Iэмал къует уи зэфIэкIым хэбгъэхъуэну, компьютер системэм и IэмалыщIэхэр къэбгъэIэрыхуэну, ныбжьэгъущIэхэр зэбгъэцIыхуну.

- Ди зэпеуэр программэ зэхэгъэувэнымкIэ щыIэ системэхэм Урысейм зыщегъэужьыным хуэунэтIащ. А IэщIагъэм дихьэх ныбжьыщIэхэм я зэфIэкIым зегъэужьынымкIэ мыбы и мыхьэнэр инщ. Ар щхьэпэщ технологиещIэхэр къэунэхунымкIи, дзыхь зыхуэпщI хъуну интернет программэщIэхэр утыку къихьэнымкIи, - жиIащ Open Skaler зэгухьэныгъэм и лэжьакIуэ Сиротюк Олег.

- Open Challenge-м фыкъеблагъэ! Компьютер программэ зэхэгъэувэныр - къэухь IэрыщIым и лъабжьэ быдэщ. Абы хеубыдэ интернетым къит Iэмал нэхъ тыншыIуэхэри, егъэлеяуэ гугъуу зэхэгъэувахэри. Си лэжьыгъэ къыщызмыгъэлъагъуэми, сэ сыщогуфIыкI мы зэпеуэм си Iуэху зэрыхэлъым. Мыбдеж зэфIэкIхэр наIуэ щохъу, хэлъэт зиIэхэм зыкъыщызэкъуах. Лэжьыгъэ нэхъыфI къезыгъэхьхэр мыгувэу ди гупым щыщ хъунущ – ди къэралым бжыгъэр зи лъабжьэ Iуэхухэр щыгъэбелджылыным епха къалэн гъэщIэгъуэныр ягъэунэхунущ, - жиIащ Скала ^ р ПО–р гъэбелджылынымкIэ департаментым и унафэщIым и къуэдзэ Аристов Константин.