И лэжьыгъэм иринасыпыфIэщ

УФ-м и ТхакIуэхэми и Журналистхэми я зэгухьэныгъэхэм хэт, КъБР-м щэнхабзэмкIэ щIыхь зиIэ и лэжьакIуэ, КъБР-м и ТхакIуэхэм я зэгухьэныгъэм и правленэм и унафэщIым и къуэдзэ, зэдзэкIакIуэ, радиожурналист Мэремкъул Ларисэ и ныбжьыр илъэс бжыгъэ дахэ ирикъуащ.

Мэремкъул Ларисэ Дзэлыкъуэ щIыналъэм хыхьэ Каменномост къуажэм 1955 гъэм къыщалъхуащ. Горькэм и цIэр зезыхьэ Литературнэ институтым зэдзэкIакIуэхэр щагъэхьэзыр и факультетыр къиухащ. «Заря коммунизма» (иджы «Зольские вести») газетым щэнхабзэмкIэ и къудамэм и унафэщIу, «Къэбэрдей-Балъкъэр» къэрал телерадиокомпанием сабий, щIалэгъуалэ нэтынхэмкIэ и редактору, радиом и хъыбарегъащIэ къыдэкIыгъуэхэмрэ литературэ нэтынхэмкIэ редактору, урысыбзэмкIэ нэтынхэм я редактор нэхъыщхьэу, радиом и унафэщIу лэжьащ.

Мэремкъулым урысыбзэкIэ зэридзэкIащ адыгэ тхакIуэхэм я тхыгъэ купщIафэ куэд. Иджыри а лэжьыгъэм пещэ. И мурадщ Къашыргъэ ХьэпащIэ и романхэр, Мэзыхьэ Борис, Къагъырмэс Борис, Хьэх Сэфарбий, Къардэн Бубэ сымэ я IэдакъэщIэкIхэм щыщ зэридзэкIыну. Езыр зэдзэкIакIуэ хъуну хуей щIалэгъуалэм ядолажьэри, абыхэм яжреIэ лъэпкъ литературэм щыщу Урысей, дунейпсо утыку зыхуэфащэхэм гу лъатэну.

- Иджыпсту жытIэрейщ сабийхэм бзэр зэрафIэкIуэдыр. ЕгъэджакIуэхэракъым абыкIэ къуаншэр, зэрырагъаджэ программэхэр зэрымыхьэнэншэм, ди бзэм хуэфащэ гулъытэ зэрыхуамыщIыжым къыхокI ар. Школым сыщыщIэтIысхьам зы псалъи урысыбзэкIэ сщIэртэкъым, ауэ фIы дыдэу драгъэджащ. Къапщтэмэ, адыгэбзэри урысыбзэри зэхуэдэу дагъэджу щытащ, - жеIэ Ларисэ. - Къэбэрдей псом яцIыхурт ди Къармэхьэблэ школыр. АдыгэбзэмкIи, урысыбзэмкIи, нэмыцэбзэмкIи сочиненэ дагъэтхат школыр къыщыдухым. Дунейм зихъуэжащ. Иджы сабийхэр дэзыхьэх куэд щыIэщи, щIэныгъэм езыр-езырхэу егугъужкъым. 

Ларисэ къызэрилъытэмкIэ, зэи узыхуэарэзыж хъунукъым. Ар ауэ псалъэ къудейкъым, атIэ тхыгъэм епхауэ игъэунэхуа Iуэхущ. УеджэжыхункIэ зыгуэр зыбогъэзэхуэж. Апхуэдэу гумызагъэу щытыпхъэщ тхакIуэри зэдзэкIакIуэри. Аращ тхэн щIэзыдза щIалэгъуалэр зыхуиущийр.  

- Псом нэхърэ нэхъыщхьэу гъащIэм щызлэжьари щызлэжьри IуэхуитIщ: радиомрэ литературэмрэщ. Абыхэм сэ сызыхуей щхьэхуитыныгъэ къызат, - жеIэ Ларисэ.

Бзылъхугъэр тыншу щIэлэжьэфыр и Iуэхур къыдэзыIыгъ унагъуэ къыкъуэтщи аращ. Зэщхьэгъусэхэм зы къуэрэ зыпхъурэ – Арсенрэ Динэрэ – яIэщ. Литературэм, усэ тхыным, хамэ къэралыбзэхэм дахьэх Динэ Ларисэ и IэщIагъэр къыхихыжыну ириIуэкIами, экономикэм хуеджэмэ нэхъ къищтащ. Арсен ухуакIуэу мэлажьэ, и IэщIагъэм фIыуэ хищIыкIыу. Адэ-анэшхуэр ягъэгуфIэ, ягъэгушхуэу къуэрылъху-пхъурылъхуиплI яIэщи, Ларисэ хуэдэу макъамэм, литературэм, бзэхэр джыным дахьэх.