ЕджапIэр гъуэгущIэ тохьэ

Москва УправленэмкIэ дэт «Сколковэ» школым щекIуэкIащ «Ректорхэм я еджапIэ 25: университетым щекIуэкI зэхъуэкIыныгъэхэр» егъэджэныгъэ программэм и етхуанэ зэхыхьэр. Абы хэтащ ди университетым и лIыкIуэхэри.

Зэхуэсахэр зытепсэлъыхьар стратегие зыужьыныгъэм и проектхэр къызэгъэпэщынымрэ зыхуей хуэзэу убзыхунымрэщ. Егъэджэныгъэ IэнатIэм  гулъытэ хуещI япэ игъэщыпхъэ жэрдэмхэр пхыгъэкIынымкIэ щыIэ Iэмалхэм.

Псалъэм къыдэкIуэу жыпIэмэ, университетым и лэжьакIуэ гупыр йолэжь мыхьэнэшхуэ зиIэ зы Iуэхугъуэ. Ар зэхьэлIар КъБКъУ-р Къэбэрдей-Балъкъэр Республикэм и мэкъуэш IэнатIэм зегъэужьынымкIэ къару нэхъыщхьэу зэрыщытыр къилъытауэ,  щIыналъэм и экономикэм зезыгъэхъуэж Iуэхугъуэхэр, IэщIагъэлIхэр, технологие провайдерыр, стратегие программэхэр зэуIу зэрищIырщ.

Мы Iуэхум хэту Москва щыIащ ПравэмкIэ, экономикэмрэ финансхэмкIэ институтым и унафэщI Мэшыкъуэ Еленэ, Социально-гуманитар институтым и унафэщI Тэмазэ Муслим, ЛэжьакIуэхэм я IэщIагъэм хагъэхъуэнымкIэ управленэм и унафэщI ДыщэкI Тимур, Стратегие программэхэмрэ проектхэмкIэ управленэм и унафэщIым и къуэдзэ Къуэдзокъуэ Расул сымэ.

Мэшыкъуэ Еленэ зэрыжиIамкIэ, егъэджэныгъэ IэнатIэм щылажьэхэр зэзышалIэ а курсыр я Iэзагъым хэзыгъахъуэ къудей мыхъуу, гъуэгущIэхэмрэ IэмалыщIэхэмрэ къахузэIузых зэIущIэ яхуэхъуащ. «Сколковэ и егъэджэныгъэ ухуэкIэм дызэрыхагъэгъуэзам Iэмал къыдитащ иджырей унафэщI Iэмэпсымэхэр зэдгъэщIэным къыдэкIуэу, а технологие центрым и купщIэ дыдэр нэсу зэдгъэцIыхуну. Ар хуабжьу философие куущ. Шэч къытесхьэркъым абы щызэхуэсахэм ягъуэта щIэныгъэр дяпэкIэ жэрдэмыщIэхэр къыхалъхьэнымкIэ къару лъэщ зэрыхъунум. Псом япэу, абы Iэмал къыдитынущ иджыпсту дгъэхьэзыр проектыр фIагъ лъагэ иIэу и кIэм нэдгъэсыну. Сколковэ и Iуэху бгъэдыхьэкIэ нэхъыфIхэр дагъэщIауэ, дытрагъэгушхуауэ къэдгъэзэжащ, ди университетым къалэн нэхъ ин, гугъу дыдэхэр щыдгъэзэщIэну дыхьэзыру», - жиIащ Еленэ.

Егъэджэныгъэм мыхьэнэшхуэ зэриIэм щытепсэлъыхьым, Къуэдзокъуэ Расул къыхигъэщхьэхукIащ зэхыхьэм щызрагъэщIахэр еджапIэ нэхъыщхьэм зэрызиужь ухуэкIэр иджырей мардэхэм тету зэгъэзэхуэжынымкIэ сэбэп зэрыхъур: «Программэм Iэмал къует уи лэжьыгъэр Iуэху бгъэдыхьэкIэ нэхъыфIхэм ебгъэпщэну. Абы щызэдгъэгъуэта щIэныгъэри щхьэпэ хъунущ ди мурад нэхъыщхьэхэр иджыпсту щыIэ жыпхъэхэм идгъэзэгъэнымкIэ, зэхъуэкIыныгъэхэм я гъуэгум университетыр тешэныр тхузэфIэкIынымкIэ».

КъБКъУ-м и Социально-гуманитар институтым и унафэщI Тэмазэ Муслим къызэрилъытэмкIэ, проектыр хуэунэтIащ еджапIэ нэхъыщхьэм щIыналъэм щиIэ мыхьэнэр къэIэтынымкIэ хэкIыпIэхэр къэлъыхъуэным.

«ЦIыхур зыхуигъэIущыфращ еджапIэ нэхъыщхьэм и мылъку нэхъыщхьэр. Дэ дызэлэжьыр нэм щIэуэн фэрыщIагъкъым, атIэ университетыр Къэбэрдей-Балъкъэрым и социально-экономикэ зыужьыныгъэм и къару нэхъыщхьэ щIынырщ», – жиIащ Тэмазэм.

ЩIыдгъужынщи, «Ректорхэм я школ 25» егъэджэныгъэ курсыр  мазихкIэ йокIуэкI, а лъэхъэнэм къриубыдэу егъэджэныгъэ, щIэныгъэ Iуэхум пэрытхэр  хэ зэхуэзэнущ. КъБКъУ-м и IэщIагъэлIхэм управленэм пыщIа гугъуехьхэр къэхутэным, нэгъуэщI Iуэхугъуэхэм епха Iыхьэхэр къызэранэкIащ. Псори къаухмэ, щIыналъэм и щIэныгъэ-технологие, егъэджэныгъэ IэнатIэхэм еджапIэ нэхъыщхьэм щигъэзащIэ къалэныр нэхъ лъэщ зыщIыну  «трансформацэ программэ»  ягъэхьэзырын хуейуэ аращ зэхуэсым купщIэ хуэхъур.

Iэрыс Iэсият.