Мечиев Кязим и цIэр зезыхьэ НыбжьыщIэхэм я библиотекэм (Налшык) щекIуэкIащ «С мольбертом к вершине Эльбруса» Iуэхум теухуа пресс-конференцэ.
Москварэ Санкт-Петербургрэ щыщ, къэралым и художественнэ колледжхэмрэ еджапIэ нэхъыщхьэхэмрэ къэзыуха сурэтыщI ныбжьыщIэхэр зыхэтыну гъэлъэгъуэныгъэм и пэ къихуэу ар къызэрагъэпэщащ Кавказым и щIыпIэ нэхъ дахэхэм художник щIалэхэр драгъэхьэхын папщIэ.
ЗэфIэкI зиIэ сурэтыщI щIалэгъуалэм я зэIущIэм зыкърагъэхьэлIащ СурэтыщI гъуазджэхэмкIэ музейм, Ткаченкэ Андрей и цIэр зезыхьэм, и лэжьакIуэхэм, Налшык къалэм и художественнэ колледжхэмрэ еджапIэ нэхъыщхьэхэмрэ я унафэщIхэмрэ егъэджакIуэхэмрэ, республикэм и художник цIэрыIуэхэм, КъБКъУ-м и художественнэ къудамэхэм, ГъуазджэхэмкIэ Кавказ Ищхъэрэ къэрал институтым Щэнхабзэмрэ гъуазджэхэмкIэ и колледжым я студентхэм, Налшык къалэм Къэзэнокъуэ Жэбагъы и цIэр зезыхьэ ГъуазджэхэмкIэ и сабий школ №2-м и еджакIуэхэм.
«Время молодых XXI век» творческэ зэгухьэныгъэм и лIыкIуэ Костецкая Наталье тепсэлъыхьащ художник ныбжьыщIэхэм ядэIэпыкъуныр, гъуазджэм дихьэххэм къацIыхун папщIэ я лэжьыгъэхэр щагъэлъэгъуэну утыкухэмкIэ ахэр къызэгъэпэщыныр я къалэн нэхъыщхьэу зэрыщытым.
- «С мольбертом к вершине Эльбруса» Iуэхур 2024 гъэм едгъэжьащ. Абы хыхьэу Iуащхьэмахуэ и лъагапIэ зэмылIэужьыгъуэхэм художник щIалэхэм сурэтхэр щащI. Налшык щыщ, спортым и мастер Берберашвили Алексей 1966 гъэм шыщхьэуIум и 18-м Iуащхьэмахуэ мотоциклкIэ дэкIауэ щытащ. Си насып кърихьэкIри, абы и къуэ Юрэ зэзгъэцIыхуащ икIи и адэр бгым зэрыдэкIам теухуауэ гъэщIэгъуэн куэд къызжиIэжащ. «С мольбертом к вершине Эльбруса» Iуэхум и кIэухыу, СурэтыщI гъуазджэхэмкIэ музейм, Ткаченкэ Андрей и цIэр зезыхьэм, шыщхьэуIум и 8-м, Берберашвили Алексей бгым щыдэкIам ирихьэлIэу, гъэлъэгъуэныгъэ къыщызэIутхынущ. КъинэмыщIауэ, Москва Лъэпкъхэм я унэу дэтым и утым бжьыхьэм щагъэлъэгъуэнущ Кавказым и щIыпIэ дахэхэр, Берберашвили Алексей и унагъуэ архивым къыхахыжа сурэтхэр, ахэм къытращIыкIа лэжьыгъэ нэхъыфIэр. Республикэм и унафэщIхэмрэ КъБР-м ЩэнхабзэмкIэ и министерствэмрэ фIыщIэ хузощI мы Iуэхур дгъэзэщIэнымкIэ къызэрыддэIэпыкъуамрэ щIалэгъуалэм гулъытэ зэрыхуащIымрэ папщIэ. Мы Iуэхум хэтхэр лъэсуи мотоциклым тесуи Iуащхьэмахуэ и лъагапIэхэм дэкIыну Iэмал яIэщ. АбыкIэ дэIэпыкъуэгъу хъунущ мотоспорт унэтIыныгъэмкIэ Юрэ и лэжьэгъухэр.
