Мурадхэр IуэхукIэ щIагъэбыдэ

КъБР-м и Iэтащхьэ КIуэкIуэ Казбек видеоконференц ­IэмалкIэ хэтащ УФ-м и Правительствэм и УнафэщIым и ­къуэдзэ Хуснуллин Марат иригъэкIуэкIа, щIыналъэхэм зегъэужьынымкIэ комиссэм и президиумым и зэхуэсым. 

ЩIыналъэхэм щекIуэкI лэжьыгъэм теухуауэ къэпсэлъащ УФ-м ухуэныгъэхэмрэ псэупIэ-коммунальнэ хозяйствэмкIэ и министр Файзуллин Ирек. КъБР-м къыбгъэдэкIыу зэхуэсым ­видеоконференц IэмалкIэ иджыри хэтащ республикэм ухуэ­ныгъэхэмрэ псэупIэ-коммунальнэ хозяйствэмкIэ и министр Бэрбэч Алимрэ транспортымрэ гъуэгу хозяйствэмкIэ и министр ДыщэкI Аслъэнрэ. 
ЗэIущIэм щытепсэлъыхьащ лъэпкъ, къэрал проектхэр гъэзэщIа зэрыхъум, ущыпсэуж мыхъуну унэхэр нэхъ мащIэ щIын, цIыхухэр къызэрырашэкI транспорт жьы хъуахэр щIэкIэ хъуэжын, инфраструктурэм зегъэужьын зэрыхуейм. 
Къэбэрдей-Балъкъэрым дызэрыт илъэсым лъэпкъ, къэрал проектхэм япкъ иткIэ IуэхущIапIэ 350-м щIигъум ухуэныгъэ, зэгъэ­пэщыжын лэжьыгъэхэр щокIуэкI. Абыхэм ящыщ зыбжанэм ар и кIэм щынэблэгъащ. Псалъэм и хьэтыркIэ, гъуэгум епха ухуэныгъэу 84-м щыщу 82-м елэжьын яухакIэщ, псы зэбгрызыш IуэхущIапIэу 13-м щыщу 5-м иращIэн хуейр зэфIагъэкIащ, жы­лагъуэ, уней пщIантIи 157-м щыщу 149-р зэIузэпэщ ящIащ, ­нэгъуэщIхэми хунэсащ. 
Лэжьыгъэр и кIэм щынагъэсащ егъэджэныгъэм, узыншагъэм, щэнхабзэм епха ухуэныгъэхэми. Ущыпсэуж мыхъуну унэхэм цIыхухэр хуэм-хуэмурэ къыщIагъэIэпхъукIыурэ унэ­щIэхэм ягъакIуэ. КIэзонэ щIыхуэ IэмалкIэ республикэм и ­бюджетым къыхэкIыу автобус 44-рэ къащэхуну я мурадщ, ­муниципалитетхэм я жылагъуэ транспортыр щIэкIэ яхъуэжын мурадкIэ. Ахэр дызытехьэ илъэсым и щIышылэм къэсынущ.