Аслъэнбэч фIыщIэ хуращI

«Спартак-Налшык» (Налшык) - «Нарт» (Черкесск) - 1:1 (1:1). Налшык. «Спартак» стадион. Мэлыжьыхьым и 9-м. ЦIыху 300 еплъащ. 

Судьяхэр: Цурков (Москва), Пичугин (Ставрополь), Волков (Москва). 
«Спартак-Налшык»: Къу­мыкъу, Пириев, Джыназ, Чичбэ, Гъуэгузокъуэ, КIэды­кIуей, Блий (ЛIуп, 76), Далиев (Къардэн, 64), Хьэшыр, Лысенкэ, Мусаев (Шэрджэс, 79).
«Нарт»: Туаев, Лелюкаев, Шахтиев, Гирзишев, КIанжэ, Болгов (Бостанов, 77), Дэхъу (Тхьэкъуа­хъуэ, 84), Бацу, Колотыгин (Ульбашев, 67), Машэжь, Суанов.
Топхэр дагъэкIащ: Мусае­вым,­ 15 (1:0). Суановым, 36 (1:1).
Дагъуэ къыхуащIащ: Суановым, Дэхъум.
Урысей Федерацэм футболымкIэ и етIуанэ лигэм и «Б» дивизионым и Япэ гупым ­«Спартак-Налшыкым» къы­щы­пэ­щылът ди къуэш республикэхэм я командэхэм зэкIэлъ­хьэужьу щаIущIэну. ЯпэщIыкIэ, вэсэмахуэ, кърагъэблэгъат Черкесск и «Нартыр», махуищ дэ­кIынурэ езыхэр Адыгейм кIуэ­нут, Мейкъуапэ и «Дружба»-м хуэ­зэну. Зым къикIауэ футболист зыбжанэ адрейхэм сыт щыгъуи зэрахэтыр къэп­лъы­тэмэ, ахэр удэзыхьэхыу екIуэкI зэпэщIэ­ты­ныгъэхэщ. Къапщ­тэмэ, вэсэмахуэ Черкесск и «Нартыр» джэгупIэ гугъум абы и капитану ­къизышар илъэс зыбжанэкIэ «Спартак-Налшы­кым» и щIы­хьыр екIуу зыхъу­ма Машэжь Ратмирщ. Абы дэ­щIыгъут ди лъа­хэгъу Дэхъу Ислъамрэ Лелю­-каев Аланрэ. Мэкъуауэ Алимрэ Ульбашев Ис­лъамри Къэрэшей-Шэрджэ­сым и командэ нэхъы­фIым хэтт икIи дапщэщи зэIущIэм къы­хыхьэну хьэзырт. Иу­жьым ап­хуэдэуи ищIащ, джэгум и кIэухым.
«Спартак-Налшыкми» «Нартми» мыгъэрей зэхьэзэхуэр зэ­хуэ­дэу ирагъэжьащ. Джэг­у­гъуищ ирагъэкIуэкIам яужькIэ тIуми ­очко щырыщ яIэу арат, текIуэныгъэ зырыз зыIэрагъэ­хьарэ тIо­ры­тIэ къыхагъэщIауэ. Дауи, дэтхэнэми и Iуэхур игъэ­зэкIуэжын ­хуейт икIи абы мы зэIущIэм щрагъэжьэну щIэ­хъуэпсырт. 
Къэбэрдей-Балъкъэрымрэ Къэ­рэшей-Шэрджэсымрэ я ­командэ нэхъыфIхэр совет зэманми иджырей лъэхъэнэми куэдрэ зэIущIэщ. Нэхъапэм хэп­щIыкIыу тепщэныгъэр ди щIалэхэм яIэ­щIэлъащ. Ар­щхьэкIэ, зыкъом щIауэ хэмы­тауэ, урысейпсо зэ­хьэ­зэхуэм къыхыхьэжа Черкесск и «Нартым» налшыкдэсхэр пэ­мы­лъэ­щыж хъуащ. ЖыпIэну ири­къунщ нэгъабэрей зэпеуэм щыIа джэгугъуитIми ди къуэш­хэр къы­зэрыщыттекIуар. Ар икъукIэ гу­хэщI ищIат Налшык щыIэу бжыгъэшхуэ дыдэкIэ дыкъызэрыщыхагъэщIауэ щы­там. 
Ди щIалэхэм вэсэмахуэ Iэмал ягъуэтат нэгъэбэрей щIэ­щхъуэр ягъэзэкIуэжыну. Абы папщIэ «Нартым» текIуэн ­хуейт, хъумэ бжыгъэ нэхъ иныIуэкIэ.
Джэгум и пэщIэдзэм апхуэ-дэ гугъэфIхэр щIигъэбыдат. «Спартак-Налшыкым», мы гъэм зэрихабзэу, лъэщу икIи псынщIэу ­иригъэжьащ икIи хьэщэIхэр я ­гъуэм ирикъу­зы­лIащ. зы ебгъэ­рыкIуэныгъэм адрейр къыкIэ­лъы­кIуэрт, къапэщIэтхэр игъэгужьейуэ. Ап­хуэдэхэм ящыщ зым, епщы­кIутхуанэ дакъикъэр екIуэ­кIыу, ди гупым и капитан Хьэшыр Алан сэмэгурабгъумкIэ щы­кIуэцI­рыкIащ икIи абы Iэзэу къыхита топыр Мусаев Магомед щхьэкIэ гъуэм дигъэкIащ. 
ЩIэдзэкIэр дэрэжэгъуэ къо­зытт, ауэ набдзэгубдзаплъэу «Спартак-Налшыкым» и мы­гъэ­рей джэгукIэм хущытхэм гу лъамытэнкIэ Iэмал иIэтэкъым япэ дакъикъэ тIощIрэ тхум иужькIэ ди футболистхэм я хьэрхуэрэгъухэм я гъуэм топ зэрыдамыгъэкIыфым. Ахэр щIэ­хъуэпсырт иджыри зэ нэхъ мыхъуми хьэ­щIэхэр ягъэдзы­хэну. 
Ди жагъуэ зэрыхъущи, япэ джэгугъуищми хуэдэу, жы­джэру къыщIадза пэтми, налшыкдэс­хэр хуэм-хуэмурэ етIысэхащ икIи япэ Iыхьэм и кIэухым ирихьэ­лIэу я ныкъуэ­къуэгъухэр къатегуплIэпащ. Апхуэдэхэм ящыщ зым КIанжэ Малик ижьырабгъумкIэ ди ­гъуэм къыщыбгъэдыхьащ икIи дэнэ щыджэгуми топ къытхудэзыгъэкI Суанов Руслан щхьэкIэ бжыгъэр зэхуэдэ ищIащ. 
ЩытыкIэм зихъуэжакъым ­загъэпсэхуу къихьэжа иужь­-кIи. Уеб­лэмэ, «Нартым» и еб­гъэ­рыкIуэ­ны­гъэхэр нэхъыбэж икIи нэхъ шынагъуэж хъуащ. 
ЗэрытемыкIуэм «Спартак-Налшыкыр» игъэгубжьын икIи ипэ­кIэ игъэкIуэтэн хуейт. Ар­щхьэкIэ апхуэдэ зэфIэкI къы­лъыкъуэкIакъым. Уеблэмэ, ар зылъэгъуа хьэщIэхэр нэхъ ерыщыжу ебгъэрыкIуэ хъуащ, Налшык очкоищ ирашыну хущIэкъуу. Я хъуэп­сапIэр къай­хъулIэнкIи хъунт, ди гъуащхьэтет Къумыкъу Аслъэн­бэч и Iэ­загъ лъагэр мыхъуатэмэ. Мы­зэ-мытIэу абы налшыкдэсхэр къригъэлащ, зэм топыр гъуащ­хьэм техуэри, къэлъеижащ. 
Сытми, афIэкIа лъэны­къуэхэм топ дагъэкIыфакъым икIи, зэ­къуэшхэм зэрахабзэу, очко зырыз зыIэрагъэхьэри зэрытемыгъэ­кIуауэ зэбгъэ­дэ­кIыжащ. Ар­щхьэкIэ блэкIа зэIущIэм кърикIуа бжыгъэхэр ди дежкIэ ухэзы­гъаплъэщ: «Нартыр» ди гъуэм  15-рэ къеуащ ­(9-м хуэзэу), «Спартак-Налшыкым» ейр - 4 (1); угловойуэ хьэщIэхэм къыхата 11-м па­гъэувыфар 3 къудейщ. Ди ­футболистхэми абыхэм я тре­нерхэми зэлэжьынрэ зэгуп­сы­сынрэ зэракуэдым а псори и щыхьэтщ. 
Урысей Федерацэм футболымкIэ и етIуанэ лигэм и «Б» ди­визионым и Япэ гупым вэ­сэмахуэ щекIуэкIа зэIущIэхэм я гугъу пщIымэ, абыхэм мамы­рыгъэр щытепщащ. ЖыпIэну ирикъунщ джэгугъуитIым фIэ­кIа къэмынэу адрей псори зэрытемыгъэкIуауэ зэриухар. Мис ахэр: «Астрахань» (Аст­рахань) - «Динамо Ставро­поль» (Ставрополь) - 1:1, «Ку­бань-Холдинг» (Павловскэ) - «Севастополь» (Севастополь) - 1:1, «Легион» (Мэхъэчкъалэ) - «Победа» (Хасавюрт) - 3:0, «Ангушт» (Нэзрэн) - «Динамо-2» (Мэхъэчкъалэ) - 4:0, «Рубин» (Ялтэ) - «Ростов-2» (Дон Iус Ростов) - 0:0, «Сочи-2» (Сочэ) - «Дружба» (Мейкъуапэ) - 1:1. 
Ди щIалэхэр зыхэт гупым иджы зы команди къыхэнакъым хэ­щIыныгъэ иымгъуэ­тауэ. Турнир таблицэм зэкIэ бжьы­пэр щызэдаIыгъ «Ростов-2»-мрэ «Се­вас­тополь»-мрэ. Мэлыжьыхьым и 13-м, къыкIэлъыкIуэ джэгугъуэр зэ­хэтынущ. А махуэм «Спартак-Налшыкыр» Адыгейм и къалащхьэм щыIущIэнущ вэсэма­- хуэ япэ очкор зэхьэзэхуэм щы­зыIэрызыгъэхьа Мейкъуапэ и «Дружба»-м. 

Сурэтыр  Уэлджыр  Артур  трихащ.