ПлIыми медаль зырыз къахь

Спортсмен, лIыхъужьыгъэ зэрихьэу дзэ Iуэху хэхам хэкIуэда Магомедов Абдурэхьмэн и фэеплъу тхэквондомкIэ (ВТФ, Олимп джэгухэм хыхьэ лIэужьыгъуэмкIэ) щIыналъэхэм я зэхьэзэхуэ Дагъыстэным и къалащхьэ Мэхъэчкъалэ щекIуэкIащ. Апхуэдэу Урысей Федерацэм и щIалэгъуалэм я 5-нэ спартакиадэу мы гъэм зэхашэну къызэрыхах зэIущIэхэм я езанэ Iыхьэу щытащ ар. Абы щызэпеуащ, щIалэхэри хъыджэбзхэри зэхэту, 100-м нэблагъэ, я ныбжькIэ илъэс 21-м щIимыгъуауэ. 
Къэбэрдей-Балъкъэрым и щIыхьыр яIэту зэхьэзэхуэм хэтащ Кэнжэ къуажэм дэт «Пять колец» спорт академием и гъэсэниплI икIи, ди гуапэ зэрыхъущи, псоми медаль зырыз къахьащ. Килограмм 78-рэ зи хьэлъагъ гупым я деж япэ увыпIэр щиубыдащ Уэзрокъуэ Аскэр. Бицу Къантемыр (кг 63-рэ), Созаев Артур (кг 58-рэ), Иуан Дианэ (кг 49-рэ) сымэ етIуанэ увыпIэхэр къахьащ. 
Ди спортсменхэр зэхьэзэхуэм хуагъэхьэзыращ УФ-м щIыхь зиIэ и тренер Ахъмэт Амир, Уэзрокъуэ Анзор, Унэжокъуэ Абдельджэбар сымэ.