КъыхэжаныкIахэр ягъэлъапIэ

ГъуазджэхэмкIэ Кавказ Ищхъэрэ къэрал институтым Щэнхабзэмрэ гъуазджэхэмкIэ и колледжым щекIуэкIащ щIалэгъуалэм я щIэныгъэ-практикэ конференц. Ар теухуауэ щытащ Хэку зауэшхуэм ди къэралым ТекIуэныгъэ Иныр къызэрыщихьрэ илъэс 80 зэрырикъумрэ иджырей лIыхъужьхэмрэ.

Зэхыхьэр къызэрагъэпэщащ щIэблэм Хэкур фIыуэ ялъагъуу гъэсэнымрэ Хэку зауэшхуэм и тхыдэ фэеплъхэр хъумэнымрэ теухуауэ. Колледжым и студентхэмрэ Налшык къалэм и гимназие №1-м и еджакIуэхэмрэ я лэжьыгъэхэм я фIагъыр къапщытащ колледжым и унафэщI, профессор Шэрыб Валерэ, гъэсэныгъэмкIэ къудамэм и унафэщI, тхыдэмрэ обществознаниемкIэ егъэджакIуэ Атэлыкъ Хъанбатыр, цIыхубэ макъамэ IэмэпсымэхэмкIэ къудамэм и егъэджакIуэ Залихановэ Оксанэ сымэ. Зэпеуэм хэтахэм ягъэхьэзыращ къэхутэныгъэ лэжьыгъэхэр.

КъэпщытакIуэхэм зэрагъэбелджыламкIэ, «Доклад нэхъыфI» Iыхьэм щытекIуащ Налшык къалэм и гимназие №1-м и 9-нэ классым щеджэ Къазий Алия («Наука побеждать. Вклад советских физиков в дело Великой Победы»), гимназие №1-м и 8-нэ классым щIэс Залихановэ Азизэ («Республики Северного Кавказа в годы Великой Отечественной войны»), гимназие №1-м и 8-нэ классым щеджэ Джыназ Заремэ («Великая Отечественная война в истории моей семьи»).

Хэку зауэшхуэм теухуа усэ гъэхуауэ къеджэнымкIэ Iыхьэм къызэрыхэжаныкIам папщIэ дипломрэ саугъэтрэ хуагъэфэщащ Щэнхабзэмрэ ГъуазджэхэмкIэ колледжым цIыхубэ макъамэ IэмэпсымэхэмкIэ и къудамэм и 3-нэ курсым щIэс Лий Алинэ, колледжым а къудамэм и 4-нэ курсым щеджэ Тебердиевэ Маржан сымэ. ЕджакIуэхэмрэ студентхэмрэ зэпеуэм хуэзыгъэхьэзыра егъэджакIуэхэми фIыщIэ тхылъхэр иратащ. Шэрыб Валерэ зэпеуэм щытекIуахэмрэ абы хэтахэмрэ тыгъэ яхуищIащ щIыхь тхылърэ саугъэтрэ.

Конференцыр къызэригъэпэщащ Щэнхабзэмрэ гъуазджэхэмкIэ колледжым цIыхубэ макъамэ IэмэпсымэхэмкIэ и къудамэм и унафэщI Къашыргъэ Мадинэ. Ар иригъэкIуэкIащ а къудамэм щезыгъаджэ Казаковэ Екатеринэ.