Къэрал дэIэпыкъуныгъэ щагъэщIэнукъым

Урысей Федерацэм и Президентым къыхилъхьауэ, УФ-м и Правительствэм и УнафэщIым и къуэдзэ Белоусов Андрей и нэIэ щIэт «Хьэрычэт Iуэху мыинымрэ курытымрэ, уней хьэрычэт щIэн жэрдэмхэр» лъэпкъ пэхуэщIэм ипкъ иткIэ Къэбэрдей-Балъкъэрым а IэнатIэм щылажьэхэм къэрал дэIэпыкъуныгъэу сом мелуан 200,8-рэ нэгъабэ къыхуаутIыпщащ. 

Лъэпкъ пэхуэщIэм къыщыгъэлъэгъуа Iуэхугъуэхэр къанэ щымыIэу республикэм щыгъэзэщIа хъун папщIэ, илъэс блэкIам къэрал бюджетым сом мелуани 190-рэ, щIыналъэ бюджетым сом мелауни 10 къахэкIащ. 
Абы нэмыщI, республикэм и мэкъумэш продукцэхэр зыхурагъашэ хамэ къэралхэм я IуэхущIапIэхэм экспорт-зэгурыIуэныгъэу 8 иращIылIащ, доллар мелуани 3,6-рэ я уасэу. 
Къэрал дэIэпыкъуныгъэ зэрагъэгъуэтым и фIыгъэкIэ хьэрычэт щIэн Iуэхум къыхыхьэхэм я бжыгъэм къыхэхъуэ зэпытщ. Абы и щыхьэтщ 2023 гъэм апхуэдэ IуэхущIапIэ мыинхэм я бжыгъэм проценти 9,9-кIэ зэрыхэхъуар икIи мин 21,3-рэ зэрыхъуар. Я щхьэ хуэлэжьэжу налогхэр хэзых IэнатIэхэм зыщезыгъэтхахэр мин 71-м щIигъуащ, е ипэ ита илъэсым нэхърэ процент 27,4-кIэ нэхъыбэ.
ЦIыху бжыгъэкIэ къапщтэмэ, илъэс кIуам къриубыдэу хьэрычэт Iуэху мыинымрэ курытымрэ хэтыр мини 118,9-м нэблэгъащ, е процент 16,5-кIэ хэхъуащ.
Зи гугъу тщIы IэнатIэм къыбгъэдэкIыу, зэкIэ къызэрабжамкIэ, Къэбэрдей-Балъкъэрым и бюджет зэхэтым налогыу нэгъабэ сом мелард 1,8-рэ ягъэкIуащ. Ар проценти 6-кIэ нэхъыбэщ ипэ ита илъэсым щыIа бжыгъэхэм елъытауэ. 
«Хьэрычэт Iуэху мыинымрэ курытымрэ, уней хьэрычэт щIэн жэрдэмхэр» лъэпкъ пэхуэщIэм хыхьэу Къэбэрдей-Балъкъэрым щрагъэкIуэкI Iуэхугъуэхэр 2024 гъэми къэрал гулъытэ щагъэщIэнукъым.