Адыгэбзэм зезыгъэузэщIхэр

         «Адыгэ псалъэ» газетым и ныбжьыр илъэси 100 щрикъу мы илъэсым абы и лэжьыгъэм щыгъуазэ, къытехуэ тхыгъэхэр зыфIэгъэщIэгъуэн, нэхъри ефIакIуэмэ зи гуапэ цIыху куэдым хъуэхъукIэ зыкъытхуагъазэ. Абыхэм я псалъэр къэдмылъытэу, ди гуапэ мыхъуу къанэркъым, зы махуэм нэхърэ адрейм нэхъыфI дызэрыхъунум, ди IэдакъэщIэкIхэр нэхъ щIэщыгъуэ зэрытщIынум яужь дитщ. Ди къалэнхэм дыпэлъэщрэ ахэр къыдэмыхъулIэрэ жызыIэфынури, зи чэнджэщ къыдэзыхьэлIэфынури ди щIэджыкIакIуэхэращи, ахэр нэхъыбэну, газетыр адыгэ унагъуэ псоми яIэрыхьэну ди хъуэпсапIэщ.

         «Адыгэ псалъэм» ехьэлIа и псалъэ гуапэхэмкIэ нобэ зыкъытхуегъазэ Къэбэрдей-Балъкъэр Республикэм щIыхь зиIэ и журналист, «1КБР» къэрал телевиденэм и унафэщIым и къуэдзэ   Токъмакъ Светланэ.

         – Илъэси 100-р дунейпсо тхыдэм и дежкIэ зэманышхуэкъым, ауэ а лъэхъэнэм къриубыдэу ди къэралми республикэми зэхъуэкIыныгъэ куэдхэр къызэринэкIащ. ГъащIэм щекIуэкIа, ноби щекIуэкI Iуэхугъуэ псоми анэдэлъхубзэкIэ щыгъуазэ зритщIыну диIари диIэри «Адыгэ псалъэращ». Редакцэм щылажьэ журналистхэм зэманым, жылагъуэм къахуигъэув къалэнми, лъэпкъым и пащхьэ щахь жэуаплыныгъэми я мыхьэнэр къазэрыгурыIуэм и щыхьэтщ газетым къытехуэ я тхыгъэ купщIафIэхэр.

          Анэбзэм, адыгэ псалъэм хуаIэ лъагъуныгъэкIэ, хуабагъэкIэ гъэнщIащ газетым и дэтхэнэ къыдэкIыгъуэри. «Адыгэ псалъэм» и лэжьакIуэ емызэшыжхэр дэтхэнэ зы унагъуэми пэжыр нахьэсу, республикэм и политикэ, экономикэ щытыкIэм, унафэ щхьэпэхэм, абы кърикIуэ IуэхугъуэфIхэм, дунейм и къэхъукъащIэхэм щIэджыкIакIуэхэр щыгъуазэ ящIу, лъэпкъхэм я зэхущытыкIэм, яку дэлъын хуей зэгурыIуэныгъэм я нэIэ трагъэту я къалэн ягъэзащIэ.

         Псом хуэмыдэу иужьрей илъэс пщIы бжыгъэхэм газетыр хуабжьу ефIэкIуащ. Пэублэ псалъэу къащта «ФифI фымыгъэпуд, фи Iей фымыгъэпщкIу» жыIэгъуэм екIуу, ди цIыху пажэхэм – щIэныгъэлIхэм, унафэщIхэм, щэнхабзэм и лэжьакIуэхэм, къуажэ гъащIэр къэзыгъэщIэращIэхэм яхуэфащэ фIыщIэ тхыгъэхэр нэхъыбэу газетым тредзэ. Зэхуэмыхъу Iуэхугъуэхэр щыщыIэм дежи щIамыхъумэу, щхьэтечауэ абыхэми топсэлъыхь, а Iуэхухэм журналистхэм хуаIэ еплъыкIэри хэкIыпIэу халъагъуэри къагъэнахуэ.

         Республикэм и гъащIэм, и псэукIэм, и зыужьыкIэм дэщIыгъуу, адыгэбзэм и IэфIагъымрэ и мыхьэнэмрэ, нэхъ хъугъуэфIыгъуэшхуэу лъэпкъым къыдекIуэкI адыгэ хабзэм и фIагъымрэ нобэ къытхуэмыгъэсэбэпыж абы и къарумрэ ди цIыхухэм къагурыгъэIуэным ерыщу бгъэдэтщ «Адыгэ псалъэр». Газетым и напэкIуэцIхэм щагъэлъапIэ литературэм, гъуазджэм и лэжьакIуэ нэхъыфIхэр, дунейпсо тхыдэм, щIэныгъэм, щэнхабзэм адыгэ лъэпкъыр, ди республикэр дыщэпскIэ хэзытхэфа цIыху щэджащэхэр.

         Рубрикэхэм я гугъу пщIымэ, ахэри гъэщIэгъуэнхэщ. Апхуэдэщ, псалъэм папщIэ, «ДифI догъэлъапIэ» зыфIащар. Лъагъуэ дахэ пхызыша, цIыхухэм пщIэ зыхуащI нэхъыжьыфIхэм, щIалэгъуалэм нобэ щапхъэ къызытрахыпхъэ цIыху гъэщIэгъуэн куэдым ятеухуа тхыгъэхр къытохуэ «Адыгэ псалъэм».

         ЩIалэгъуалэм теухуа тхыгъэхэри гъэщIэгъуэну зэтраухуэ. Редакцэм и бжэр зэIухащ дэтхэнэ зы щIали, зы хъыджэбзи я гурылъхэр, зыщIэхъуэпсхэр жаIэну хуеймэ. ЗэфIэкI зиIэ щIалэгъуалэу дагъэцIыхуари мащIэкъым.

 ПхуэмыIуэтэным хуэдизщ газетым хузэфIэкIыр хамэ къэрал щикъухьа ди адыгэхэр зэщIэгъэуIуэным, абыхэм я псэукIэ, я дуней тетыкIэ, я гукъеуэ – гурыфIыгъуэхэм щыгъуазэ дыхъунымкIэ. Ди лъэпкъэгъухэу хамэ къэрал къыщалъхуа, щыпсэуа, зыхэс къэралми лъэпкъми цIэрыIуэ щыхъуа цIыху щэджащэхэм я хъыбар газетым щIэх-щIэхыурэ тредзэ.

         А псори зи фIыщIэу къэплъытэ хъунур щIэныгъэ куу, акъыл жан, бзэ дахэ, псалъэ купщIафIэ зыбгъэдэлъ журналистхэрщ, гупыр зыгъэгушхуэ, я гъуэгугъэлъагъуэ унафэщIхэрщ. Дыхуейщ «Адыгэ псалъэ» газетымрэ абы и лэжьакIуэхэмрэ я зэфIэкIыр нэхъ лъагэ хъу зэпыту илъэс куэдкIэ адыгэ лъэпкъым къыддэгъуэгурыкIуэну.

Зыгъэхьэзырар ИСТЭПАН Залинэщ.