Я зэфIэкIхэр утыку кърахьэ

«Урысей» дунейпсо гъэлъэгъуэныгъэ-форумым къыщызэрагъэпэща Узыншагъэм и махуэм утыку къыщрахьащ ди къэралым и хэгъэгухэм узыншагъэр хъумэн IэнатIэм щаIэ зэфIэкIхэр, IэщIагъэлIхэр я щIэныгъэкIэ, лэжьыгъэ и пIалъэкIэ щызэхъуэжащ. Зэхыхьэр къызэIуахащ Урысей Федерацэм узыншагъэр хъумэнымкIэ и министр Мурашкэ Михаил, ФедерацэмкIэ Советым и вице-спикер Святенкэ Иннэ, УФ-м Промышленностымрэ сатумкIэ и министрым и къуэдзэ Приезжевэ Екатеринэ сымэ.

- Гъэлъэгъуэныгъэм и зы дэтхэнэ павильонми щокIуэкI цIыхухэм ират медицинэ дэIэпыкъуныгъэр зэрефIакIуэм, а унэтIыныгъэм игъуэт зыужьыныгъэм дыхэзыгъэгъуазэ Iуэхухэр, - жиIащ Мурашкэ Михаил. - Абы къызэщIеубыдэ амбулаторэ-поликлиникэ къудамэм, сымаджэщхэм щекIуэкI лэжьыгъэр, технологиефIхэр къагъэсэбэпкIэрэ ящIэ Iуэхутхьэбзэхэр. Апхуэдэу мы зэхыхьэм щагъэлъэгъуэнущ медицинэр ипэкIэ зыгъэкIуэтэну гъэунэхуныгъэхэр, къэхутэныгъэхэр.

Иджырей технологиехэр зи лъабжьэ медицинэм зыужьыныгъэ хъарзынэхэр зэриIэр къыхигъэщащ Святенкэ Иннэ.

- «Урысей» гъэлъэгъуэныгъэм хэту Узыншагъэм и махуэр зэрырагъэкIуэкIым мыхьэнэшхуэ иIэщ, - жиIащ абы. - ЦIыхухэм я узыншагъэр хъумэным къэралым гулъытэшхуэ зэрыхуищIым и щыхьэтщ «Демография», «Узыншагъэр хъумэн» лъэпкъ проектхэр. Абыхэм япкъ иткIэ, къэралым и щIыпIэ нэхъ пхыдза дыдэхэми медицинэм и иджырей IэмалыщIэхэр къагъэсэбэпкIэрэ цIыхухэм я узыншагъэр кърагъэпщытэфынущ. Мы зэманым ирихьэлIэу фIагъ лъагэ зиIэ технологиехэр и лъабжьэу операцэ мелуани 6-м щIигъу ирагъэкIуэкIащ, медицинэм игъуэт зыужьыныгъэхэм я фIыгъэкIэ апхуэдиз цIыхум я гъащIэр кърагъэлыфащ дохутырхэм.

- Медицинэмрэ фармацевт IэнатIэмрэ зэпыщIауэ къызэдогъуэгурыкIуэ, - къыхигъэщащ Приезжевэ Екатеринэ. - Нобэ щIэныгъэм щыпэрытхэм ящыщщ фармацевтикэр икIи псынщIэу зеужь. Абы теухуа псалъэмакъ гъэщIэгъуэнхэр щызэхэтхынущ нобэрей зэхыхьэм, а унэтIыныгъэмкIэ IэщIагъэлIхэм, къэхутакIуэхэм Iэмал яIэнущ я зэфIэкIхэр цIыхушхуэм я пащхьэ ирахьэну.

УФ-м узыншагъэр хъумэнымкIэ и министр Мурашкэ Михаилрэ ФедерацэмкIэ Советым и вице-спикер Святенкэ Иннэрэ зэхыхьэм хэта хэгъэгу псоми я плIанэпэм щыIащ икIи абыхэм узыншагъэр хъумэнымкIэ я IэнатIэхэм щызыIэрагъэхьа ехъулIэныгъэхэр, адэкIэ абы зегъэужьынымкIэ я мурадхэр наIуэ къыщащI гъэлъэгъуэныгъэхэм зыщагъэгъуэзащ.

«Урысей» дунейпсо гъэлъэгъуэныгъэ-форумым щекIуэкIа Узыншагъэм и махуэм хэтащ ди къэралым и щIыналъэщIэхэри. Апхуэдэу Запорожье областым и плIанэпэм министрым и гугъу къыщыхуащIащ щIыналъэм гу-лъынтхуэ узыфэхэм пэщIэтынымкIэ, онкологие дэIэпыкъуныгъэхэмкIэ программэхэм лэжьэн зэрыщыщIадзам, IэнатIэр къэгъэщIэрэщIэжынымкIэ, медицинэ IуэхущIапIэщIэхэр ухуэнымкIэ лэжьыгъэхэр зэрыщекIуэкIым. Псом хуэмыдэу зыщыгуфIыкI Iуэхугъуэу къыхагъэщащ щIыпIэм IэщIагъэлIхэр къазэрыхуеблагъэр, иджырей операцэхэр зэрырагъэкIуэкIын технологиехэмкIэ къызэрызэгъэпэщар, перинатальнэ дэIэпыкъуныгъэм зэрызиужьар.

Луганск цIыхубэ республикэм и унафэщIым и къуэдзэ Валиев Олег министрым фIыщIэ хуищIащ къэралым сыт и лъэныкъуэкIи щIыналъэр зэрыдиIыгъым папщIэ, къыхигъэщащ «Къуажэ дохутыр» программэм щхьэпагъышхуэ зэриIэр, абы и фIыгъэкIэ щIыпIэ куэд зыхуэныкъуэ IэщIагъэлIхэмкIэ къызэрызэрагъэпэщыфыр. ДНР-м узыншагъэр хъумэнымкIэ и министрым и къалэнхэр пIалъэкIэ зыгъэзащIэ Гарцев Дмитрий тепсэлъыхьащ щIыналъэм и дохутырхэм зэрахьэ лIыхъужьыгъэм, медицинэ IуэхущIапIэхэр зэрызэрагъэпэщыжым. Херсон областым и лIыкIуэхэм Мурашкэ Михаил щагъэгъуэзащ щIыпIэм и медицинэ IэнатIэм и мылъку-техникэ лъабжьэр зэрырагъэфIэкIуэжам, IэмэпсымэщIэхэмрэ автомобилхэмрэ къызэращэхуам, къищынэмыщIауэ, сымаджэщхэм, ФАП-хэм, амбулаторэхэм зэгъэпэщыжыныгъэхэр зэрыщрагъэкIуэкIым, апхуэдэ IуэхущIапIэщIэхэр зэраухуэм.

Зэхыхьэм и утыку и зэфIэкIхэр щигъэлъэгъуащ Къэбэрдей-Балъкъэрми. КъБР-м узыншагъэр хъумэнымкIэ и министрым и къуэдзэ Батыр Заурбэч гъэлъэгъуэныгъэм кърихьэлIахэр щIыналъэм и медицинэ IэнатIэм иIэ зэфIэкIхэм, ехъулIэныгъэхэм щигъэгъэгъуэзащ, узыншагъэр хъумэным хуэгъэзауэ къэралым щылажьэ программэхэмрэ проектхэмрэ унэтIыныгъэм лъабжьэ быдэ зэрыхуэхъум, абыхэм я фIыгъэкIэ зэфIагъэкIахэм тепсэлъыхьащ. Апхуэдэу Къэбэрдей-Балъкъэрым и плIанэпэм къекIуэлIахэм я узыншагъэм и щытыкIэми кIэлъыплъащ.

КъБР-м Узыншагъэр хъумэнымкIэ и министерствэм штатым хэмыт и эндокринолог нэхъыщхьэ Щыхъалы Иннэ, Налшык къалэ поликлиникэ №1-м офтальмологиемкIэ и къудамэм и унафэщI Къаскъул Динарэ, поликлиникэ №3-м и терапевт Берычэт Дианэ сымэ закъыхуэзыгъэза псоми я узыншагъэр къапщытащ: лъым хэлъ холестериныр, фошыгъур зыхуэдэр, тхьэмбылым и щытыкIэр, гум и лэжьэкIэр къахутащ. Къэпщытэныгъэхэм кърикIуахэм япкъ иткIэ, чэнджэщ пыухыкIахэр иратащ. Псори зэхэту а махуэм абыхэм зыкъыхуагъэзащ цIыху 200-м щIигъум.

- Узыншэу дыпсэуным дыхущIэкъуныр, абы зытедухуэныр ди къэкIуэнум хуэтщI лъабжьэщ. Сабийм и узыншагъэмкIэ жэуап яхь адэ-анэм. Балигъым ар и щхьэ къалэнщ. Ауэ цIыхум и узыншагъэмкIэ зэхэщIыкI иIэн папщIэ и мыхьэнэр ар щыцIыкIум щегъэжьауэ гурыгъэIуэн хуейщ, и гъащIэ псокIэ хьэл хуэхъуу, абы тету псэун хуэдэу, - щыжиIащ Мурашкэ Михаил зэхыхьэм.