Журт лъэпкъым и фэеплъу

Котляровхэ Мариерэ Викторрэ я тхылъ тедзапIэм лэжьыгъэ гъэщIэгъуэн къыщыдэкIащ. Абы итщ Мелиховэ Галинэ и «Жид, или Кубанский псалом» повестымрэ Налшык щыщ уэрэджыIакIуэ икIи композитор Амирамов Ефрем и IэдакъэщIэкI усэхэмрэ.

- Галинэрэ Ефремрэ зэдэлъхузэшыпхъущ, ауэ я зэблагъэныгъэракъым а тIум я гуащIэр зы тхылъым щызэхуэхьэса щIэхъуар. Повестымрэ усэхэмрэ щыпхышащ зы гупсысэ: дунейр зэпIэзэрыту зэтеIыгъа хъун папщIэ щыIэн хуей лъэпкъым хуэдизщ дунейм тетыр, - жеIэ тхылъыр къыщыдэкIа IуэхущIапIэм и унафэщI Котляров Виктор. – А хабзэр зыми зэпиудыфынукъым, апхуэдэ хуитыныгъэ зы цIыхуми иIэкъым. Ар наIуэ пщещI тхылъыр зи IэдакъэщIэкIхэм я  адэ, бгырыс журт лъэпкъым къыхэкIа Амирамов Григорий и гъащIэм. Ар Уэрэдымрэ къафэмкIэ къэрэшей къэрал ансамблым и къызэгъэпэщакIуэу, балетмейстеру, и япэ унафэщIу щытащ, зауэ нэужьым утыкур ибгынащ, и щхьэгъусэмрэ и къуэ нэхъыжь илъэсибл зи ныбжьымрэ Багдановкэ зэрыщаукIам щхьэкIэ щыгъуэу.
… Хэку зауэшхуэм щыгъуэ журт лъэпкъыр ягъэкIуэдыну мурад ящIу абыхэм ящыщ куэд зэраукIар дунейпсо тхыдэм и напэкIуэцI нэхъ хьэлъэщ. А илъэсхэм зи псэр ягъэна цIыху мелуанихым щыщу 472-р Ставрополь крайм хыхьэ Богдановкэ къуажэм щаукIащ. Амирамов Ефрем и усэхэм яхэтщ абыхэм фэеплъ яхуищIа IэдакъэщIэкI, «У обелиска» фIищауэ.
«Жид, или Кубанский псалом» тхыгъэр зэрытыр Мелиховэ Галинэ и япэ тхылъщ, «Молодая» уэрэдым цIэрыIуэ дэхъуа Амирамов Ефрем ар и етIуанэщ.