Иджырей IэмэпсымэхэмкIэ къызэгъэпэщауэ

Иужьрей илъэсхэм республикэм и «ДэIэпыкъуэгъу псынщIэ» IэнатIэм и машинэхэр къанэ щIагъуэ щымыIэу зэрахъуэкIащ. Апхуэдэ автомобилыщIэхэр яIэщ Къэбэрдей-Балъкъэрым и щIыналъэхэм щылажьэ район сымаджэщхэм икIи къуажэ псори зэщIагъэхьэф.

Машинэхэр щIыналъэм къыIэрыхьэн щIидзащ 2016 гъэм щегъэжьауэ, Урысей Федерацэм и Президент Путин Владимир къэрал автопромыр дэIыгъынымкIэ къыхилъхьа программэм ипкъ иткIэ. «ДэIэпыкъуэгъу псынщIэм» и автопаркыр процент 70-кIэ къагъэщIэрэщIэжащ, иджыпсту махуэ къэс лажьэу абы яIэщ машини 176-рэ. Ахэр иджырей IэмэпсымэхэмкIэ къызэгъэпэщауэ, сымаджэр япэу зыхуэныкъуэ медицинэ дэIэпыкъуныгъэр щагъуэтыну автомобилхэщ, щытыкIэ хьэлъэм итхэм хуэщIа реанимобилхэщ.
Жылагъуэм медико-санитар дэIэпыкъуныгъэхэр зыхуей хуэзэу ягъуэтын папщIэ, «Узыншагъэр хъумэн» лъэпкъ проектымкIэ ди республикэм къыIэрыхьащ автомобиль 60. Ахэр щолажьэ республикэм и районхэм хыхьэ къуажэхэм щыIэ медицинэ IуэхущIапIэхэм. Иджыри мы илъэсым къриубыдэу цIыхухэм япэ медицинэ дэIэпыкъуныгъэхэр щрат IуэхущIапIэхэм къаIэрыхьэнущ машинэ 20.
Машинэхэр къагъэсэбэп икIэщIыпIэкIэ дэIэпыкъуэгъу хуэныкъуэ сымаджэхэм я унэм участковэ дохутырхэр щыкIуэкIэ. Апхуэдэуи а автомобилхэмкIэ республикэм и къуажэ пхыдзахэм щыпсэухэу зи узыншагъэм нэхъ куууэ кIэлъыгъэплъыпхъэхэр район сымаджэщхэм ирагъэшэнущ. Апхуэдэ Iуэху бгъэдыхьэкIэм и фIыгъэкIэ, къуажэхэм щыIэ медицинэ IуэхущIапIэхэри зыхуэныкъуэ транспорткIэ къызэгъэпэща хъуащ икIи цIыхухэм хуащIэ Iуэхутхьэбзэхэри ефIэкIуащ.