Зэрыхуэхьэзырыр къепщытэ

КъБР-м и Iэтащхьэ КIуэкIуэ Казбек Урысей Федерацэм и президент хэхыныгъэхэр егъэкIуэкIыным щIыналъэхэр зэрыхуэхьэзырым теухуауэ щIыпIэ администрацэхэм я унафэщIхэр зыхэт зэIущIэ иригъэкIуэкIащ.

ЗэIущIэм къыщыпсэлъащ КъБР-м и ХэхакIуэ комиссэм и унафэщI Джэш Вячеслав. Абы жиIащ УФ-м и президент хэхыныгъэхэр республикэм щегъэкIуэкIыныр КъБР-м и ХэхакIуэ комиссэм и нэIэ зэрыщIэтыр: щIыпIэ хэхакIуэ комиссэу 13, участкэ хэхакIуэ комиссэ 355-рэ къыщызэрагъэпэщащ ди деж. А IэнатIэхэм я лэжьакIуэу Iуэхум къыхашащ цIыху мини 3-м нэблагъэ.
Джэш Вячеслав къыхигъэщащ хэхакIуэхэм щхьэхуэу хъыбар егъэщIэнымкIэ «ИнформУИК» къэрал проектыр нэхъыфIу зыгъэзэщIа щIыналъэхэм республикэр зэращыщыр. Мазаем и 17-м щегъэжьауэ гъатхэпэм и 7 пщIондэ участкэ хэхакIуэ комиссэхэм я лэжьакIуэхэм къызэхакIухьащ унагъуэ 281 477-рэ (процент 99,9-рэ), Урысейм и президент хэхыныгъэхэр зэ­рекIуэкIынум теухуа хъыбарыр ирагъащIэу. А лэжьыгъэм хэтащ цIыху 1434-рэ.
ЩIыпIэ администрацэхэм я Iэтащхьэхэм КIуэкIуэ Казбек щагъэгъуэзащ щIыналъэхэр хэхыныгъэхэм зэрыхуэхьэзырым. Республикэм и УнафэщIым гулъытэ нэхъ хуищIу къыхигъэщащ гъатхэпэм и 15 -17 махуэхэм екIуэкIыну хэхыныгъэхэм цIыхухэм я шынагъуэншагъэмрэ тыншыпIэмрэ къыщызэгъэпэщыным теухуа Iуэхухэр.