УФ-м и Президентыр щыхэтх махуищым ипэ къихуэу, Бэрбэч ХьэтIутIэ и цIэр зезыхьэ Къэбэрдей-Балъкъэр къэрал университетым гъатхэпэм и 14-м щекIуэкIащ «Урысей Федерацэм и Президентыр хэхыныр - къэралым и къэкIуэныр хэтх пэлъытэщ» зыфIаща зэIущIэ.
Студентхэр, еджапIэ нэхъыщхьэм щылажьэхэр, жылагъуэ зэгухьэныгъэхэм я лIыкIуэхэр зыхэта а зэхуэсыр къызэзыгъэпэщар «Урысейм и юристхэм я зэгухьэныгъэм» и щIыналъэ къудамэрщ, республикэм и Жылагъуэ палатэмрэ КъБКъУ-м щылажьэхэмрэ и дэIэпыкъуэгъуу.
ЩIалэгъуалэр УФ-м и Президент хэхыныгъэхэм жыджэру хэтыну къыхураджэу а зэIущIэм хэтащ: «Боевое братство» урысейпсо зэгухьэныгъэм и республикэ къудамэм и исполкомым и унафэщI, КъБР-м и Жылагъуэ палатэм деж къыщызэрагъэпэща, хэхыныгъэхэр зэрекIуэкIым кIэлъыплъ Жылагъуэ штабым хэт Абэнокъуэ Владимир, республикэм и Парламентым хабзэм тетынымрэ къемызэгъ мылэжьынымкIэ, апхуэдэуи социальнэ политикэмкIэ, лэжьыгъэмрэ узыншагъэр хъумэнымкIэ и коми-
тетхэм хэт Газаев Мэсхьут, УФ-м и Антимонопольнэ къулыкъум и Къэбэрдей-Балъкъэр къудамэм и унафэщI Къумахуэ Аннэ, Прохладнэ къалэ округым «Къалэм и электросетхэр» и акционер зэгухьэныгъэм и тхьэмадэ, республикэм и Жылагъуэ палатэм хэт Литвинов Роман, «Урысейм и юристхэм я зэгухьэныгъэм» и щIыналъэ къудамэм и исполкомым и унафэщI Тенджыз Жаннэ сымэ, нэгъуэщIхэри.
КъБКъУ-м щIалэгъуалэ политикэмрэ гъэсэныгъэ лэжьыгъэмкIэ и проректор къалэныр зыгъэзащIэ Геккиев СулътIан зэхыхьэр щекIуэкI еджапIэ нэхъыщхьэм и унафэщIхэм къабгъэдэкIыу къызэхуэсахэм фIэхъус псалъэкIэ захуигъэза иужькIэ, университетым щеджи щылажьи зэхэту зэрыхъу цIыху мин 20-м нэблагъэр хэхыныгъэхэм зэрекIуэлIэнури къэралым нэхъ хущхьэпэну Iэ Iэты-кIэ къызэрыщагъэлъэгъуэнури и фIэщ зэрыхъур къыжиIащ.
Зэхыхьэр езыгъэкIуэкIа, юридическэ щIэныгъэхэмкIэ кандидат, «Урысейм и юристхэм я зэгухьэныгъэм» и щIыналъэ къудамэм и унафэщI Къазджэрий Эммэ къызэрыхигъэщауэ, УФ-м и Президентыр хэхыныр - къэралым и жылагъуэ-политикэ гъащIэм дежкIэ мыхьэнэ ин дыдэ зиIэщ, къыкIэлъыкIуэ илъэси 6-м ди зыужьыкIэ хъунури зэлъытар аращ.
Хэхыныгъэхэм кIэлъыплъакIуэхэр зэрыхуагъэхьэзыра щIыкIэм и гугъу ищIащ КъБР-м и Жылагъуэ палатэм хэт, Тхылъхэр фIыуэ зылъагъухэм я республикэ зэгухьэныгъэм и унафэщI Шинкаревэ Наталье. ЩIыналъэм хыхьэ район 13-м къыщызэIуаха екIуэлIапIэ 355-м а къалэныр щагъэзащIэ кIэлъыплъакIуэу 355-м. Хэхыныгъэхэм, псори зэхэту, Iэ щаIэтынущ Къэбэрдей-Балъкъэрым щыпсэу цIыхухэм ящыщу мин 580-м щIигъур.
- Университетым щIалэгъуалэ политикэмрэ гъэсэныгъэ лэжьыгъэмкIэ и управленэм къызэригъэпэщ хабзэ Iуэхугъуэхэм ящыщ зыуэ нобэ мыбдежым щедгъэкIуэкIри къэтлъытэ хъунущ. Ауэ щыхъукIи, студентхэм захуэзгъазэу къыхэзгъэщынут хэхыныгъэхэм фи хэтыкIэ хъунур фэ езым гъащIэм къыщыхэфх лъэбакъуэхэм ящыщ зыуэ къызэрыщIэкIынур, къэралым и къэкIуэнур зэзыгъэзэхуэнури фыкъызыхэкIа лъэпкъым и хабзэ-бзыпхъэхэр адэкIэ зезыхьэнури фэрауэ зэрыщытыр. Дэ мы махуэхэм къыхэтхыр Президентым и закъуэкъым, атIэ Хэкум дзэ IуэхухэмкIэ и Iэтащхьэ нэхъыщхьэу къэувынури адрей хэгъэгухэм я къытхущытыкIэ хъунури Iэ IэткIэ къэдгъэлъагъуэу аращ, - жиIащ Абэнокъуэ Владимир.
КЪУМАХУЭ Аслъэн.