2024 гъэм гъатхэпэм и 21-м Урысейм и ЦИК-м 163-нэ зэIущIэр иригъэкIуэкIащ икIи Урысей Федерацэм и президент хэхыныгъэхэм къарикIуахэм теухуа протоколым мыхъур трагъэуащ.
ЦИК-м и УнафэщI Памфиловэ Эллэ зэрыжиIамкIэ, IэIэтым хэтын хуейуэ цIыху 113 011 059-рэ ятхащ. УФ-м и президент хэхыныгъэхэм кърихьэлIащ 87 575 075-рэ (ар процент 77,49-рэ мэхъу). Абыхэм ящыщу цIыху мелуани 2,6-м хэхыныгъэхэр къэмыс щIыкIэ Iэ яIэтащ, 388 791-р хамэ къалхэм къыщызэрагъэпэща хэхыпIэхэм къекIуэлIащ, хэхакIуэ 7910-м Калининград, Ленинград, Псков областхэм щыIэ гъунапкъэ хэхыпIэхэм Iэ щаIэтащ. ЦIыху мелуани 8-м щIигъум дистанционнэ электрон IэIэтыр къагъэсэбэпащ, хэхакIуэ мелуани 5,1-м «Мобильный избиратель» IэмалымкIэ я къалэныр ягъэзэщIащ.
Протокол 94 243-р къапщытэжа нэужь, Путин Владимир щхьэкIэ цIыху 76 277 70-м Iэ зэраIэтар яубзыхуащ, ар хэхакIуэхэм я процент 87,28-рэ мэхъу икIи абы ипкъ иткIэ, ХэхакIуэ комиссэ нэхъыщхьэр Урысей Федерацэм и Президенту Путин Владимир зэрыхахам щыхьэт техъуэри, унафэ къищтащ.
Памфиловэм жиIащ хэхыныгъэхэр пэжу, зэIухауэ, зэи къэмыхъуауэ, цIыху куэд кърихьэлIэу зэрекIуэкIар. Къэрал УнафэщIым и гъусэу хэхыныгъэхэм хэтахэри абы кърикIуахэм арэзы къащI, дяпэкIэ зэгъусэу къэралым хуэлэжьэну я мурадщ.
Комиссэм и протоколхэм зэритымкIэ, Харитонов Николай - проценти 4,31-рэ (3 768 470), Даванков Владислав - проценти 3,85-рэ (3 362 484), Слуцкий Леонид - проценти 3,2-рэ (2 795 629) IэIэту къахьащ.
Путин Владимир щхьэкIэ Iэ зыIэтахэр япэрейм еплъытмэ, цIыху мелуан 20-кIэ нэхъыбэ хъуащ. 2018 гъэм Путиныр къыхахат цIыху 56 430 712-м. «Абы къегъэлъагъуэ ди цIыхухэр щытыкIэ гугъу щихуам деж зэрызэкъуэувэфыр», – жиIащ Памфиловэм. Хамэ къэралхэм Iэ щызыIэтахэм я бжыгъэр къапщтэмэ, ар 2018 гъэм елъытауэ нэхъ мащIэщ. Ар къызыхэкIар къэрал унафэщIхэм хэхыпIэхэр зэрагъэмэщIарщ. Япэм хэхыпIэу 401-рэ щыIамэ, иджы 295-рэ хъууэ арат. Хамэ къэралхэм Iэ зэрыщаIэтар зэхэплъхьэмэ, процент 72,3-рэ мэхъу. Димыныбжьэгъу къэралхэм, Германием псалъэм папщIэ, Путиным процент 56,82-р къыщыдэщIащ, Эстонием - процент 75,22-рэ, Латвием - процент 70,6-рэ, Австралием - процент 53,6-рэ, Армением - процент 54,7-рэ, США-м - процент 42,23-рэ. А къэралхэми хэхыныгъэхэр ныкъусаныгъэншэу щекIуэкIащ.
- Къапщтэмэ, едгъэкIуэкIа кампаниер «къабзэу» щытащ, псоми жэуаплынгъэ яхэлъу лэжьащ. Зы гукъанэ ЦИК-р хэплъэн хуейуэ ди деж къэсакъым. Комиссэм тхыгъэ 14 389-рэ къыIэрыхьащ, абы хабзэр къыщызэпауду гурыщхъуэ ящIу яхэтар 459-рэщ, ар проценти 3,8-рэ къудейщ зэрыхъур. ХэхыпIэхэм мыхъумыщIагъэ къызэрыщыхъуам щхьэкIэ, IэIэтыр щыхэдмыбжа мы гъэм щыIакъым. Ауэ Избиркомхэм щылажьэу цIыхуи 9-м, зы мелуаным щыщу, я къалэныр ящхьэщытхащ, къемызэгъыу защIати.
Псори зэпэщу зэрекIуэкIар и фIыгъэщ видеокIэлъыплъыныгъэми. Системэр зэхагъэзэрыхьыну ди бийхэм сыт хуэдиз къару ирахьэлIами, яхузэфIэкIакъым. Апхуэдэ дыдэу телефон терроризмэми зыри къикIакъым. Дэ дызэригугъамкIэ, бюллетень нэхъыбэ Iисраф ящIыфыну щытащ, ауэ хэгъэгу 26-м ашык 30-м щеIэбауэ аращ. Адрей псори комиссэм хэтхэм ябжыфащ. Мыхьэнэшхуэ иIэщ хэхыныгъэхэм хэта адрей кандидатхэм я мыарэзыныгъэ къызэрыхэмыкIами. Абыхэм комиссэм и лэжьыгъэмрэ Iуэхум кърикIуахэмрэ даIыгъащ, – жиIащ Памфиловэм.
ЛДПР-м къыбгъэдэкIа Слуцкий Леонид къызэрилъытэмкIэ, «зы текIуа щыIэщ, хэна щыIэкъым». «Iэ зэраIэта Iэмалри, ар къызэрабжыжа щIыкIэри къызыхуэтыншэт. Дэ дяпэкIи дылэжьэнущ Урысей Федерацэм и Президентым и гупсысэхэр дэтIыгъыу, ди цIыхубэм защIэдгъакъуэу», – жиIащ Слуцкэм.
Даванков Владислав («Новые люди») комиссэм хэтхэм ящытхъуащ. Я IэщIагъэм зэрыхуэIэзэр жиIащ. «Новые люди»-м хэхыныгъэхэм ипэ къихуэу къигъэлъэгъуа Iуэхугъуэхэр законотворческэ жэрдэм зэращIынур игъэбелджылащ. Куэд мыщIэу ди гупсысэхэр етхьэлIэнущ УФ-м и Правительствэм и УнафэщI Мишустин Михаил», – жиIащ кандидатым.
«Хэхыныгъэхэр иухащ, ауэ лэжьыгъэхэм дяпэкIэ щIидзэу аращ», – жеIэ Путин Владимир и центральнэ штабым и унафэщIхэм ящыщ, УФ-м и Театрхэм и лэжьакIуэхэм я союзым и тхьэмадэ Машков Владимир.
- ЦИК-ми, информационнэ системэхэми, ди хэхакIуэхэми Iуэхур къызэпаудыну зыкъезыпщыта къомым емылъытауэ, псори зэIухауэ, пэжу, тыншу екIуэкIащ. ЦIыхубэм езым зыхуейр къыхихащ. Абы кърикIуари мыбдеж щынэрылъагъущ. Абы къегъэлъагъуэ ди кандидатым дзыхьышхуэ къызэрыхуащIар, илъэс куэд ипэ абы къыщIидза лэжьыгъэр дяпэкIи къыпищэну зэрафIэкъабылыр. Псоми фIыщэ фхузощI, ди ТекIуэныгъэмкIи сынывохъуэхъу», - щыжиIащ Машковым ЦИК-м и зэхуэсым.
НэщIэпыджэ Замирэ.