ЗЭМАНЫМ ДЕКIУУ

Дзэлыкъуэ щIыналъэр ди республикэм и гъунапкъэм щысщ. А куеймрэ Ставрополь щIыналъэмрэ зэгъунэгъущ. Къэбэрдей-Балъкъэрым и щIым щыщу районым еубыд и Iыхьэ ханэр. Дзылыкъуэ районым щопсэу цIыху 50700-м щIигъу.

Адрей районхэм щыпсэухэм я нэхъыбэм ямыщIэнкIэ хъунщ - Дзэлыкъуэ куейм итщ жылэу 19: Дзэлыкъуэкъуажэ, Дзэлыкъуэдэс, Сэрмакъ, Къармэхьэблэ, Шордакъ, Хьэбэз, Чыщбалъкъ, Малкэ, Дзэлыкъуэ, Къамылыкъуэ, Дженал, Псынэдахэ, Бэтэх, ЯтIэкъуэ, апхуэдэу адыгэцIэ зезымыхьэхэу Белокаменкэ, Совхознэ, Октябрьскэ, Светловодскэ, Приречнэ. ЦIыху нэхъыбэ дыдэ зыдэсыр районым и щыхьэр Дзэлыкъуэкъуажэрщ. Абы щопсэу, щIагъуэ мычэму, цIыху мини 10. КъыкIэлъыкIуэр Сэрмакъщ, абы дэсщ 8500-рэ. Ещанэр Малкэщ - а жылэм щопсэу 7200-м нэс. Нэхъ къуажэ цIыкIур цIыху 300 фIэкIа зыдэмыс Дженалырщ.

Адрей районхэми хуэдэу, Дзэлыкъуэ щIыналъэм исхэр нэхъыбэу зыхэпсэукIыр я унагъуэ хадэхэм кърахырщ, бэджэнду щIы зыIыгъхэм къарит хэхъуэрщ, Iэщым къыпах хъерырщ. А районым къыщалъхуащ Къэбэрдей-Балъкъэрым и зыужьыныгъэм зи гуащIэшхуэ хэзылъхьа, IэнатIэ зэхуэмыдэхэм зэфIэкIышхуэ къыщызыгъэлъэгъуа, республикэм зи цIэ фIыкIэ щыIуа ди лъэпкъэгъухэр. Абыхэм я бжыгъэр куэд мэхъу. Псори къедбжэкIынкъым, ауэ нэхъыбэм яцIыху зыкъом фигу къэдгъэкIыжынщ. Хэку зауэшхуэм лIыхъужьу хэта, «ЛIыгъэм и ЩIыхь» орденым и нагъыщищри зыхуагъэфэща Мусэ Менлы, а зырщ апхуэдэу республикэм диIэр, адэкIэ Социалист Лэжьыгъэм и ЛIыхъужьхэу егъэджакIуэ Къамбий Мухьэб, колхоз тхьэмадэу щыта Бакъ Нарзан, шахтёр Архэст Хьэбас, дуней псом и чемпион щэнейрэ хъуа, Лондон щекIуэкIа Олимп зэхьэзэхуэхэм и чемпион цIэр иужькIэ зыфIащыжа бэнакIуэ Махуэ Билал, лэжьыгъэкIэ «ЩIыхь» орденым и нагъыщищри къэзыхьа Чып Хьэсэнбий, Къэбэрдей-Балъкъэрым и Правительствэм и УнафэщIу щыта Дэхъушокъуэ Мусэ, лъэпкъ гъуазджэм и лэжьакIуэхэу Урысей Федерацэм и цIыхубэ художник Пащты Герман, РСФСР-м и цIыхубэ артисткэ Шэру Соня, режиссёр икIи тхакIуэ Хьэжкъасым Хьэсэн, Къэбэрдей-Балъкъэрым и цIыхубэ артистхэу Куэт Къанщобий, Думэн Мурадин, ди республикэм щIыхь зиIэ и артисткэ КIэхумахуэ ФатIимэ, Адыгэ театрми Урыс театрми я режиссёр нэхъыщхьэу щыта Теувэж СулътIан, тхыдэтх, философ Бейтыгъуэн Сэфарбий, еджагъэшхуэхэу ХъуэкIуэн Хьэзрэталий, Тембот Аслъэнбий, КIуэкIуэ Джэмалдин, МэкIэтIей Абдулыхь, Тау Хьэзешэ, Алътуд Юрэ, Пыл Iэуес, ЦIыпIынэ Аслъэн, КъБКъУ-м и проректор Хьэшыр Светланэ, Къэбэрдей-Балъкъэрым и муслъымэнхэм я дин IуэхущIапIэм и нэхъыщхьэ Дзасэжь Хьэзрэталий, тхакIуэ-усакIуэхэу Къущхьэ СулътIан, Мэржэхъу Мухьэмэд, КIэмыргуей Толэ, Бэлагъы Любэ, Аброкъуэ Беллэ, журналистхэу КIурашын БетIал, БжэныкIэ Мухьэб, Мэшыкъуэ Тэзал - куэд мэхъу апхуэдэхэр, псори къытхуебжэкIынкъым.

 Дзэлыкъуэ щIыналъэр сыт щыгъуи къогъуэгурыкIуэ зэманым декIуу, гъащIэм къигъэув къалэнхэм къимыгъэланджэу.