Ди зэпыщIэныгъэхэр нэхъ быдэж ирехъу

КъБР-м и Iэтащхьэ КIуэкIуэ Казбек лэжьыгъэ IуэхукIэ Къэрэшей-Шэрджэс Республикэм щыIащ. КъШР-м и УнафэщI Темрезов Рашидрэ Адыгейм и лIыщхьэ КъумпIыл Муратрэ я гъусэу, ахэр тепсэлъыхьащ щIыналъищым я зэпыщIэныгъэхэр езыгъэфIэкIуэну Iуэхухэм. 

 «Ди республикэхэр куэдкIэ зэпыщIащ, дэ лъэныкъуэ мымащIэм дыщызэдолажьэ, - щитхащ КIуэкIуэ Казбек и телеграм напэкIуэцIым. - Зэгъусэу щIэныгъэм, щIалэгъуалэ Iуэхухэм, щэнхабзэм епха программэхэмрэ проектхэмрэ делэжьми, экономикэмрэ туризмэмрэ ефIэкIуэн папщIэ Iуэху щхьэхуэхэр зэфIэдгъэкIми, дызэзыпхыр куэд мэхъу. Дызэкъуэту Президент Путин Владимир къытхуищIа унафэхэр догъэзащIэ, дызыхуиунэтIа мурадхэр зыдогъэхъулIэ». 
Республикищым я унафэщIхэр тепсэлъыхьащ мэкъумэшым, медицинэм, туризмэм, щIалэгъуалэ политикэм зэгъусэу щы­зэфIахыфыну Iуэхухэм, гулъытэшхуэ хуащIащ дзэ Iуэху хэхам ­хэтхэмрэ абыхэм я унагъуэхэмрэ зэрызыщIагъэкъуэну щIыкIэм, щIалэгъуалэр хэкупсэу къэгъэтэджын зэрыхуейм. 
«Шэч къытесхьэркъым ди республикэхэм исхэр зыхуей хуэзэу псэун, ди зэпыщIэныгъэхэр нэхъ быдэж хъун, ди къэралышхуэ-ми абы и дэтхэнэ зы щIыналъэми нэхъыфIыжу зиужьын папщIэ, дэ иджыри IуэхуфI куэд зэгъусэу зэрытхузэфIэкIынум», - жиIащ КIуэкIуэ Казбек. 
Темрезов Рашидрэ КъумпIыл Муратрэ я гъусэу, КъБР-м и Iэ­тащ­хьэр хэтащ Черкесск къалэм къыщызэIуаха «Си япэ егъэджакIуэ» фэеплъым епха дауэдапщэм. «Си гуапэ хъуащ апхуэдэ Iуэху дахэм сызэрырихьэлIар, япэ егъэджакIуэр дэтхэнэ зыми и гъащIэм нэхъ лъапIэ дыдэу хэт цIыхухэм язщ. Абы куэдкIэ елъытащ сабийм и цIыху щIыкIэ хъунури, ар и Хэкум, и къэралым зэрыхущытынури», - иритхащ КIуэкIуэ Казбек и напэкIуэцIым.