ТекIуахэр ягъэлъапIэ

3 июня, 2024 - 08:22
КъБР-м щыIэ МВД-м щекIуэкIащ «Полицейский дядя Стёпа» зэпеуэм и щIыналъэ Iыхьэм къыщыхэжаныкIахэр щагъэлъэпIа зэIущIэ. 
Къэрал кIуэцI IуэхухэмкIэ министру КъБР-м щыIэ, полицэм и генерал-майор Крючков Вячеславрэ МВД-м дэлажьэ Жылагъуэ советым и тхьэмадэ Мэкъушэ Русланрэ зэпеуэм щытекIуахэмрэ и лауретахэмрэ иратащ министерствэм и ЩIыхь тхылъхэмрэ фэеплъ саугъэтхэмрэ.
Ведомствэм и Iэтащхьэр ныбжьыщIэхэм ехъуэхъуащ я текIуэныгъэмкIэ, узыншагъэ быдэ яIэну, ехъулIэныгъэхэр адэкIи зыIэрагъэхьэну. 
- Ди гуапэщ илъэс къэс конкурсым жыджэру фызэрыхэтыр, фи творческэ зэфIэкIыр, полицэм и лэжьакIуэр фи нэгу къызэрыщIыхьэр къызэрывгъэлъагъуэр. Афэрым, абы папщIэ. Гъэмахуэ зыгъэпсэхугъуэр къыфпоплъэри, си гуапэщ а зэманыр сэбэп пылъу вгъэкIуэну икIи къаруущIэхэр фхэлъу къыкIэлъыкIуэ гъэ еджэгъуэм фыпэрыхьэжыну, - къыхигъэщащ министрым. 
Хъуэхъум къыпищащ Мэкъушэ Руслан.
ЗэIущIэм хэтащ министрым и къуэдзэ, полицэм и полковник Бахъуэ Аслъэн. Зэхуэсым кърихьэлIахэм псалъэ гуапэхэр жраIащ ныбжьыщIэхэм я адэ-анэхэм, сабийхэр гъэсэным зэрегугъум папщIэ. 
  Адэ-анэхэм ведомствэм и унафэщIхэм фIыщIэ хуащIащ я сабийхэм я творческэ зэчийр къызэIуахынымкIэ Iэмал къызэрыратым папщIэ. 
ДЫГУЛЫБГЪУ Жантинэ.
  • 70 просмотров
Поделиться: