Нэхъыбэ къызэщIрагъэубыдэ

6 июня, 2024 - 07:01

ПсыщIэгъэлъадэ

Къэбэрдей-Балъкъэрым Мэкъумэш хозяйствэмкIэ и министерствэм иджыблагъэ къызэритамкIэ, гъавэр зытращIэ щIыуэ щIыналъэм нобэкIэ иIэ гектар мини 129,8-м щыщу гектар 73,5-м псы щIагъэлъадэ. Процент бжыгъэм хуэбгъакIуэмэ, ар  56,6-рэ мэхъу. Мурад щыIэщ 2030 гъэм ирихьэлIэу псы зыщIагъэлъадэ хьэсэхэр гектар мин 85-м нагъэсыну е щIыуэ зэлэжьым я процент 65-м.

2030 гъэ пщIондэ республикэм и мэкъумэш хозяйствэм зегъэужьыным ехьэлIауэ иджыблагъэ екIуэкIа зэIущIэшхуэм ар щыжиIащ КъБР-м мэкъумэш хозяйствэмкIэ и министр Сыжажэ Хьэсэн.

         Къэбэрдей-Балъкъэрым псы зыщIагъэлъадэ и щIым и куэдагъым къыхэгъэхъуэным ехьэлIа лэжьыгъэхэр ирагъэкIуэкI «Дунейпсо кооперацэмрэ экспортымрэ» лъэпкъ пэхуэщIэм хыхьэ «Мэкъумэш-промышленнэ комплексым и продукцэр хамэ щIыналъэхэм яхуегъэшэн», «Мэкъумэш IэнатIэм къыщагъэсэбэп щIым и нэхъыбэм псыр ешэлIэн» федеральнэ пэхуэщIэхэм япкъ иткIэ.

         Иужьрей илъэсхэм, 2019 - 2023 гъэхэм, псы зыщIагъэлъадэ щIым и куэдагъым хэгъэхъуэным теухуауэ республикэм щекIуэкIа лэжьыгъэхэм къарикIуэу, иджыри гектар 30,5-рэ абы къызэщIрагъэубыдащ. Абы щыщу гектари 6,4-р нэгъабэ къыхагъэхъуауэ аращ. Ипэ ита илъэсым щыIа бжыгъэхэм елъытауэ ар хуэдищкIэ нэхъыбэщ - 2022 гъэм къыхагъэхъуэфар гектар мини 2 къудейщ. Федеральнэ, щIыналъэ бюджетхэм щыщу къэралым а Iуэхум хухихащ сом мелуан 665-м щIигъу.

         Псы зэрыщIагъэлъадэ машинэхэр зэгъэпэщыжыным, дагъуэншэу лажьэу гъэ тегъэхьэным гулъытэшхуэ зэрыхуащIым и щыхьэтщ республикэм апхуэдэ техникэу 348-рэ зэриIэр, абы щыщу 66-р нэгъабэ къызэращэхуар. Абыхэм яхэтщ уэшх къыщешхым деж хуэдэу хьэсэхэр псыкIэ
зыгъэнщI, щIыпIэшхуэхэр зэуэ къызэщIэзыубыдэ машинэхэр, псыр
ихъуреягъкIэ зэрызэбграутхыкI спринклерхэм хуэдэу 23-рэ, жыг, щIы хадэхэм телажьэхэм ткIуэпс-ткIуэпсурэ псыр къэкIыгъэхэм зэрыщIагъэхьэ системэхэр. Псом хуэмыдэу ар къагъэсэбэп хадэхэкIхэмрэ пхъэщхьэмыщхьэхэмрэ къэзыгъэкIхэм.

 Федеральнэ, республикэ бюджетхэм къахэкIыу къэрал дэIэпыкъуныгъэу а лэжьыгъэхэм псори зэхэту сом меларди 2,3-рэ хухахащ.

                  ХЬЭЩЫКЪУЕЙ Олег.

 

 

 

  • 26 просмотров
Поделиться: