IэнатIэр къапщытэ

Мы махуэхэм республикэм щыIащ ди къэралым и къалащхьэм къикIа медицинэ щIэныгъэлI гуп. ЩIыналъэм узыншагъэр хъумэнымкIэ и IэнатIэм и унэтIыныгъэ щхьэхуэхэм щекIуэкI лэжьыгъэр зрагъэлъэгъуащ, адэкIэ абы и зыужьыныгъэм, ефIэкIуэныгъэм теухуа я еплъыкIэхэр жаIащ, апхуэдэуи Iуэхур къызэрызэгъэпэщам арэзы къызэрищIари къагъэлъэгъуащ.

Урысей Федерацэм щIыхь зиIэ и дохутыр, медицинэ щIэныгъэхэмкIэ доктор, профессор Гветадзе Рамаз зи пашэ IэщIагъэлI гупым республикэм и стоматологие IэнатIэм и лэжьыгъэм зыщагъэгъуэзащ. Ахэр щыIащ Налшык къалэм дэт Республикэ стоматологие центрым, Нарткъалэ, Бахъсэн, Тэрч щIыналъэхэм дзэ узыфэхэм щеIэзэ и поликлиникэхэм.

 Абыхэм къапщытащ балигъхэми сабийхэми стоматологие дэIэпыкъуныгъэу ягъуэтыр зыхуэдэр, IэнатIэр IэщIагъэлIхэмкIэ, зыхуэныкъуэ медицинэ IэмэпсымэхэмкIэ къызэрызэгъэпэщар, а унэтIыныгъэмкIэ щыIэ Iуэхутхьэбзэхэм цIыхухэр щыгъуэзэнымкIэ Iуэхур зэрызэтеублар.

КъБР-м Узыншагъэр хъумэнымкIэ и министерствэм хьэщIэхэр хэту иригъэкIуэкIа зэIущIэм къэпщытакIуэ гупым къыщыхагъэщащ «Стоматология» унэтIыныгъэмкIэ ведомствэм и лэжьыгъэр хъарзынэ дыдэу къызэрызэгъэпэщар икIи жаIащ зи дзэм езыгъэIэзэнухэм дохутырым и деж зэрызрагъэтх щIыкIэр, поликлиникэхэр цIыхухэм я тыншыпIэм хуэщIауэ, медицинэ Iуэхутхьэбзэхэм фIагъ иIэу зэрыщытыр. Апхуэдэуи щIыналъэм и стоматологие IэнатIэр адэкIэ ирагъэфIэкIуэнымкIэ щыIэ хэкIыпIэхэри къагъэлъэгъуащ.

* * *

ПIалъэ къыхэкI мыхъуу зэIэзэн хуей сабийхэм яхуэгъэза хирургиемрэ травматологиемкIэ щIэныгъэ-къэхутакIуэ институтым Налшык дэт, УнэтIыныгъэ куэду зэхэт республикэ сабий клиникэ центрым щригъэкIуэкIащ егъэджэныгъэ форум. Ар теухуауэ щытащ пIалъэ къыхэкI мыхъуу зэIэзэн хуей сабийхэм яхуэгъэзауэ хирургие, нейрохирургие, травматологие унэтIыныгъэхэм щекIуэкI зыужьыныгъэхэм, абы и лэжьыгъэр зыхуэдэм.

Зэхыхьэр къызэIуихащ ПIалъэ къыхэкI мыхъуу зэIэзэн хуей сабийхэм яхуэгъэза хирургиемрэ травматологиемкIэ щIэныгъэ-къэхутакIуэ институтым и президент Рошаль Леонид. Абы къыхигъэщащ апхуэдэ зэIущIэхэр хабзэ хъуауэ зэрырагъэкIуэкIыр икIи а унэтIыныгъэмкIэ IэщIагъэлIхэр лэжьыгъэ и пIалъэкIэ зэхъуэжэнымкIэ, IэнатIэм и технологиещIэхэм хэгъуэзэнымкIэ ар икъукIэ щхьэпэ зэрыхъур. Апхуэдэу профессорым къигъэлъэгъуащ республикэм и сабий хирургие IэнатIэм ехъулIэныгъэфIхэр зэриIэр.

Институтым нейрохирургиемкIэ и къудамэм и унафэщI Семэн Жаннэ жиIащ УнэтIыныгъэ куэду зэхэт республикэ сабий клиникэ центрым и лэжьыгъэр хъарзынэу зэрызэтеублар, адэкIи сабийхэм хуащIэ дэIэпыкъуныгъэхэр егъэфIэкIуэнымкIэ абы щытыкIэ псори къызэрыщызэгъэпэщар.

«НэхъапэкIэ щIыналъэм иIакъым нейрохирургие IэнатIэ, - жиIащ Семэным. - Иджы УнэтIыныгъэ куэду зэхэт республикэ сабий клиникэ центрым щрагъэкIуэкIа зэхъуэкIыныгъэм, абы и лэжьыгъэр медицинэм и жыпхъэщIэхэм тету зэрырагъэкIуэкIыр, IэмэпсымэщIэхэмкIэ къызэрызэрагъэпэщар, IэщIагъэлI хъарзынэхэр зэраIэр къэплъытэмэ, IэмалыфIхэр щыIэщ нейрохирургие центр къызэIухынымкIэ. АдэкIэ дэ ди къалэнщ щIыналъэм и сабийхэм хирургие, травматологие я лъэныкъуэкIэ къэралым и клиникэ нэхъыфIхэм щыхуащIэ Iуэхутхьэбзэхэм хуэдэ ягъуэтынымкIэ щытыкIэ псори къахузэдгъэпэщыну.

Москва къикIа IэщIагъэлIхэр сабий хирургиемрэ травматологиемкIэ лекцэ къеджащ, мастер-классхэр ягъэлъэгъуащ. ЩIыналъэ дохутырхэм я гъусэу клиникэ щытыкIэ хьэлъэхэр зэпкърахащ, сабийхэм япкърыт узыфэ зэхуэмыдэхэм елъытауэ зыхуэныкъуэ хирургие, нейрохиругие Iэмалхэр яубзыхуащ. ЩIэныгъэлIхэр тепсэлъыхьащ бзий диагностикэм, лапароскопие технологием и Iэмалхэр иджырей IэзэкIэхэм къызэрыщагъэсэбэпым.