КъБР-м и Парламентым къеблэгъащ лъэпкъ хозяйствэмрэ къэрал къулыкъумкIэ академиеу УФ-м и Президентым и деж щыIэм къэрал къулыкъумрэ управленэмкIэ и институтым и магистрантхэр. ХьэщIэхэм Парламентым зыщ-рагъэплъыхьащ, и лэжьэкIэмрэ и тхыдэмрэ яхутепсэлъыхьащ.
- КъБР-м и Парламентым къэрал къулыкъумрэ управленэмкIэ магистрхэр къеблэгъащ лэжьыгъэ Iуэху щхьэхуэкIэ. А лэжьыгъэр и жэрдэмщ икIи еунэтI парламентаризмымрэ парламентхэм ядэлэжьэнымкIэ кафедрэм и унафэщI, профессор, РАЕН-м и академик Бакушев Валерий. Магистырхэр депутатхэм яIущIэнущ, комитетхэм щекIуэкI лэжьыгъэхэри щапхъэу ирагъэлъагъунущ. Си гугъэщ республикэм и хабзэубзыху органым и лэжьэкIэм, къигъэсэбэп Iэмалхэм, и Iуэху зэтеублэкIэм яфIэгъэщIэгъуэну кIэлъыплъыну, тыншу зыщагъэгъуэзэфыну. Гупым къэрал къулыкъущIэхэри зэрахэтыр къэплъытэмэ, Парламент лэжьыгъэр абыхэми япэгъунэгъуу си гугъэщ. Мыбдеж къыщащIэхэр щIэщыгъуэ ящыхъумэ, я щIэныгъэм хигъахъуэмэ, иужькIи лэжьыгъэ IэнатIэм къащыхуэсэбэпыжмэ ди гуапэ хъунущ, - жиIащ КъБР-м и Парламентым и УнафэщI Егоровэ Татьянэ журналистхэм къащыIущIам.
- Дэ щIэныгъэ ядот зэпэIэщIэу (заочнэу). Апхуэдэу щыхъукIэ, ди программэмкIэ еджэну къыхах IэнатIэ е къулыкъу щхьэхуэ пэрытхэм. Абыхэм яхэтщ хьэрычэтыщIэхэ-ри, къэрал, муниципальнэ лэжьакIуэхэри, куэд мэхъу парламент лэжьыгъэм пыщIахэри. Ди программэм тету еджащ УФ-м и къэрал Думэм и депутат Родинэ Викторие. Илъэси 10 хъуауэ Абхъаз Республикэм и Парламентым дыдолажьэ. Къапщтэмэ, щIэныгъэр псом нэхъыфIу щIэзыгъэбыдэжыр лэжьыгъэращ. Абы къыхэкIыу щIыналъэхэм щIэх-щIэхыурэ докIуэ, я лэжьэкIэхэр зыдогъэлъагъу, Iэмалхэр зыдогъапщэ, - жиIащ Бакушев Валерий.
Абы жэуап яритащ журналистхэм я упщIэхэм. Къэбэрдей - Балъкъэрыр нэгъуэщIхэм къахэзыгъэщым щытепсэлъыхьым, псом япэу къыхигъэщащ ди щIыуэпсым уимытхьэкъункIэ Iэмал зэримыIэр, туризмым зэрызыщиужьам гу зэрылъитар, инфраструктурэ зэпэщ дызэриIэр.
- Къэбэрдей - Балъкъэрым зиужьыным толажьэ уеблэмэ езы щIыуэпсри. Фэ ар екIуу къывогъэсэбэпыф, зыгъэпсэхуакIуэхэр къыдывохьэх, туризмым зегъэужьыным фи гуащIэ тывогъэкIуадэ. ЩIыналъэм хабзэ дахэхэр зэрыщызефхьэм, фи цIыхухэр зэрыгуапэми гу лъыботэ, - жиIащ абы.
АдэкIэ гупыр зэIущIэм ирагъэблэгъащ. Абы щытепсэлъыхьащ Парламентым и лэжьыгъэр щIыналъэм и зыужьыныгъэм зэрыхуэунэтIам. ЗэIущIэм хэтащ республикэм хабзэубзыху IэнатIэм и УнафэщIым и къуэдзэхэу Жанатаев Сэлим, Къардэн Мурат, УФ-м и Къэрал Думэм и депутат Родинэ Викторие, РАЕН-м и академик Бакушев Валерий, КъБР-м и Парламентым экономикэ политикэмкIэ, зыужьыныгъэм-рэ хьэрычэт IуэхухэмкIэ и комитетым и унафэщI Iэпщэ Заур, ЕгъэджэныгъэмкIэ, щIэныгъэмрэ щIалэгъуалэ IуэхухэмкIэ комитетым и унафэщI Емуз Нинэ, ЩIы IуэхухэмкIэ, щIыуэпсыр къэгъэсэбэпынымкIэ, экологиемрэ дыкъэзыухъуреихь щIыуэпсыр хъумэнымкIэ комитетым и унафэщI ТекIушэ Артур, Жылагъуэ шынагъуэншагъэмрэ Iулъхьэм пэщIэтынымкIэ комитетым и унафэщI Кривко Михаил, Къэпщытэныгъэмрэ регламентымкIэ комитетым и унафэщI Кансаевэ Еленэ, ЩэнхабзэмкIэ, жылагъуэм зегъэужьынымрэ хъыбарегъащIэ политикэмкIэ комитетым и унафэщI Къумал Заурбэч, КъБР-м и Парламентым и Апппаратым и унафэщI ФочыщIэ Наталье, Аппаратым и унафэщIым и къуэдзэ, правовой управленэм и унафэщI Хьэмыкъуэ Аслъэн.
- КъБР-м и Парламентым и депутатхэм къабгъэдэкIыу си гуапэу фыкъызогъэблагъэ. ФыкъызытекIухьа Iуэхур дахэ хъуну, мы махуэхэм къыфхуэщхьэпэн куэд къэфщIэну, ди щIыпIэ дахэхэри зэвгъэлъагъуну дыхуейщ, - жиIащ Жанатаев Сэлим. Ар тепсэлъыхьащ парламентым и зэхэтыкIэм, абы щыIэ политикэ партхэм, комитетхэм, ЩIалэгъуалэ парламентым, хабзэубзыху орган нэхъыщхьэр илъэс 30 зэририкъуам.
Парламентым къеблэгъахэр щагъэгъуэзащ абы и комитет къэс я къалэным. Нэхъ пыухыкIауэ абы тепсэлъыхьащ Емуз Нинэ.
- Ди республикэм куэд къоблагъэ загъэпсэхуну, заплъыхьыну, ди щIыуэпсыр зрагъэлъагъуну. Сэ псом хуэмыдэу си гуапэ мэхъу щIэ гуэр къащIэну, щапхъэ яхуэхъун зэрагъэлъагъуну лэжьыгъэ IуэхукIэ къыщыкIуэм деж. Иужьрей илъэсхэм щIэх-щIэхыурэ къыдогъэблагъэ Парламентым и Iуэху зехьэкIэр зыфIэгъэщIэгъуэнхэр. Хабзэубзыху лэжьыгъэм дыщыпэрыткIэ дэ къэтлъытэр а хабзэ къатщтэхэм я бжыгъэракъым, атIэ я фIагъырщ. ЩIыналъэм хабзэ щхьэхуэ къыщыщытщтэм деж федеральнэ хабзэхэм ещхь дыдэу щытыпхъэу къэтлъытэркъым. АтIэ ар тыдощIыхь дэ ди щыIэкIэм. Щапхъэу къэтхь хъунущ щIалэгъуалэ политикэмкIэ хабзэ республикэм зэрыщыдгъэувар. Къыхэзгъэщыну сыхуейщ, а хабзэм лъабжьэ хуэхъуахэр ди республикэм 1992 гъэм къызэрыщытщтар. ЩIалэгъуалэ политикэмкIэ федеральнэ хабзэр дджа нэужь гурыIуэгъуэ хъуащ ар ди деж нэсу зэрыщымылэжьэ-фынур. Республикэм езым ей щIэуэ зэхэдгъэуващ.
Хабзэу дгъэувауэ, Парламентым и депутатхэм интернетым щхьэж и напэкIуэцI щегъэлажьэ. Къызолъытэ, цIыхухэм дапыщIауэ щытынымкIэ ари зы IэмалыфIу, - жиIащ Емузым. Зи унафэщI комитетым и гугъу ищIу къыхигъэщащ КъБР-м Егъэджэныгъэмрэ щIэныгъэмкIэ, ЩIалэгъуалэ IуэхухэмкIэ министерствэхэм зэрадэлажьэр, программэ щхьэхуэхэмрэ проектхэмрэ теухуауэ зэрызэчэнджэщхэр, зэгъусэу хэкIыпIэхэр къызэрагъуэтыфыр.
ГУГЪУЭТ Заремэ.
