Ди гъэмахуэ лагерхэм

Мэкъуауэгъуэм и махуэ дыгъэпсхэмкIэ гъэнщIа гъэмахуэр нэгузыужьу щагъакIуэ Къулъкъужын Ипщэм дэт курыт школ №3-м къыщызэIуаха гъэмахуэ лагерым зыщызыгъэпсэху еджакIуэ цIыкIухэм.
Дыгъэ ХьэIишэт дызэрыщигъэгъуэзамкIэ, абы щыIэ сабий 42-р зыхуеину псомкIи къызэрагъэпэщащ. Къэуат зыщIэлъ ерыскъыхэкIхэр, витаминхэмкIэ къулей пхъэщхьэмыщхьэхэр, хадэхэкIхэр - псори я пэрыхьэтщ абыхэм. ЦIыкIухэм я махуэр пщэдджыжь зарядкэкIэ щIедзэ. Пщэдджыжьышхэр зэфIэкIа нэужь, абыхэм къапоплъэ джэгу зэпеуэхэр, гъэлъэгъуэныгъэ гъэщIэгъуэнхэр, нэгузыужь программэхэр. Лагерым щрагъэкIуэкI сабийхэм я акъылым зезыгъэужь зэхьэзэхуэхэр, сабийхэм я махуэр щагъэлъапIэ мэкъуауэгъуэм и 1-м ирихьэлIэу асфальтым сурэт щыщIынымкIэ зэпеуахэщ. Апхуэдэу цIыкIухэр щагъэгъуазэ нобэ дунейм, республикэм, я щIыналъэм щекIуэкI Iуэхугъуэ гъэщIэгъуэнхэм.
 Лагерым и унафэщI КъуэщIысокъуэ Залинэ и жьауэм щIэту лажьэ вожатэхэу Абыкъуэ Еленэ, Кумыщ Мадинэ, ПщыхьэщIэ Каринэ сымэ я зэфIэкI псори ирахьэлIэ сабийхэм я дэтхэнэ зы зыгъэпсэхугъуэ махуэри купщIафIэу къызэрырахьэлIэнымрэ цIыкIухэм лагерым щагъэкIуа зэманыр гукъинэж зэрыщащIынымрэ.