Гъавэ Iухыжыгъуэр йоужьэрэкI

Къэбэрдей-Балъкъэрым мэкъумэш хозяйствэмкIэ и министр Сыжажэ Хьэсэн видеоIэмал зэпыщIэныгъэхэр къигъэсэбэпкIэрэ иджыблагъэ хэтащ УФ-м Мэкъумэш хозяйствэмкIэ и министерствэм и оперативнэ штабым иригъэкIуэкIа зэIущIэм. Ар теухуауэ щытащ гъавэ Iухыжыгъуэм пыщIа лэжьыгъэхэр къэралым и щIыналъэхэм зэрыщекIуэкI щIыкIэм, мэкъумэшыщIэхэр зыгъэпIейтейхэмрэ ахэр зыIууэ лъэпощхьэпохэр къызэ­ранэкIа хъун папщIэ щыIэ Iэмалхэмрэ. 

ЗэIущIэр езыгъэкIуэкIа, УФ-м мэкъумэш хозяйствэмкIэ и министр Лут Оксанэ жиIащ псори зэхэту къапщтэмэ, гъатхасэ лэжьыгъэхэр и кIэм зэрынэблэгъар: гъавэр тращIащ  гектар мелуан 54-м, ар псори зэхэту мы гъэм ягъэхьэзыра щIым и процент 92-рэ мэхъу. Къэралым и щIыналъэхэм ящыщу 16-м гъавэр нобэ къыщрахьэлIэж, дунейм и щытыкIэм и зэран мэ­къумэшыщIэхэм екIауэ щытми, губгъуэ лэ­жьыгъэхэм щоужьэрэкI икIи зыхуагъэувыжа  пIалъэм япэ иту макIуэ. 
ИджыпстукIэ гъавэр къытрахыжащ гектар мелуан 1,5-м, гъавапхъэу яIуащ тонн мелуани 6,2-рэ. Абы и куэдагъыр нэгъабэ и иджы хуэдэ зэманым щыIа бжыгъэхэм хуокIуэ. 
Къэбэрдей-Балъкъэрми губгъуэ лэжьыгъэхэм щыщIагъэхуэбжьащ. Хьэцэпэцэм щыщу нобэ кърахьэлIэж хьэмрэ гуэдзымрэ. Япэ тонн мин 32-р къытрахащ гектар мини 9,4-м. Къищы­нэмыщIауэ бжьыхьэсэ рапсри Iуахыж, иджыпстукIэ абы щыщу тонн мин 11-м щIигъу зэщIа­къуэжащ. 
Гъавэм къыдэкIуэу, хадэхэкIхэри жыджэру республикэм къыщрахьэлIэж. Абы хохьэ джэш хъурейр, кабачкир, пхъымрэ жэгундэмрэ, бжьы­ныр, кIэртIофыщIэмрэ нащэмрэ. 
Лут Оксанэ къызэрыхигъэщамкIэ, гъавэ бэв кърахьэлIэжын хуэдэу, мэкъумэшыщIэхэр я лэжьыгъэкIэ зыхуэныкъуэну техникэхэмкIэ, гъэсыныпхъэхэмкIэ, н.къ. ирикъуу къызэгъэпэщащ. 
БАТОКЪУЭ Албэч .