Iуащхьэмахуэ и щыгум йохьэ

Къэбэрдей-Балъкъэрымрэ Вологодскэ областымрэ я Къэрал автоинспекцэхэм я лэжьакIуэхэр Iуащхьэмахуэ щыгум дэкIащ. Полицейхэм ар  хуагъэпсащ щIыналъэхэм я зэныбжьэгъугъэр гъэбыдэнымрэ купщIафIэу зэдэлэжьэнымрэ.

КъБР-м щыIэ МВД-м и Къэрал автоинспекцэм и управленэм и унафэщIым и къуэдзэ, полицэм и полковник Сухорученкэ Дмитрийрэ  Урысей МВД-м Вологодскэ областым щиIэ  управленэм и  УГИБДД-м и унафэщIым и къуэдзэ, полицэм и подполковник Кушев Евгенийрэ, альпинист лъэщ Гулиев Руслан  ящIыгъуу, щIыналъэхэм я ныпхэр Iуащхьэмахуэ щыгу  драхьеящ   зэныбжьэгъугъэмрэ зэдэлэжьэныгъэмрэ я дамыгъэу.

Бгыхэм щыIэ дуней щытыкIэ ткIийм  зыщагъэгъуэзэныр    гупым щIадзащ махуитхукIэ абы зыхуагъэхьэзыра нэужь. КIэух гъуэгуанэм ахэр техьащ жэщым икIи нэхущым  ныпхэр Европэм и лъагапIэ нэхъыщхьэ Iуащхьэмахуэ щагъэхуарзащ.  

Сухорученкэ Дмитрий  жеIэ Iуащхьэмахуэ езым и хьэл  зэриIэжыр, фIыуэ елъагъу и ткIиягъыр къигъэлъэгъуэн, и «хьэщIэхэм» я быдагъыр къипщытэн икIи  дэтхэнэ зы дэкIыгъуэри япэ хуэдэу зэрызыхэпщIэр.  

 - КъызэрыкIуэу удэкIуейуэ къыпщыхъу щхьэкIэ,  иужьрей метр къэнэжахэр  гугъуехьышхуэ  пылъу фIэкIа  къыпхузэнэк1ыртэкъым -  щхьэусыгъуэр  дунейм и щытыкIэрт.  Ауэ укъикIуэтыж хъунутэкъым – бгъэува мурадым Iэмал имыIэу   улъэIэсын хуейт, - зыхищIамкIэ къыддэгуэшащ  Сухорученкэ Д. 

«Iуащхьэмахуэ удэкIыныр  гъэунэхуныгъэ нэхъ гугъухэм язщ. Спортым уипсыхьауэ, узэщ1экъуауэ   ущытын къудейкIэ зэфIэкIыркъым. Мыхьэнэшхуэ иIэщ  зэпIэзэрытыныгъэм,  уи мурадым унэсын папщIэ сыт хуэдэ лъэпощхьэпори къызэнэкIыным ухуэпэбгъэн хуейщ.  Дэ тщэрт ди зекIуэр  тыншу зэрыщымытынур, ауэ абы дызэрыгугъам нэхърэ нэхъ гугъуехьышхуэхэри пыщIат.  Щыгум дыкъыщыщыхутам, щIэрыщIэу дыкъалъхужауэ къытщыхъуат.   Ар пхуэмыIуэтэнт    икIи къыпхуэмылъытэн  насыпт.     Iуащхьэмахуэ и теплъэ уардэр, абы къыдэкIуэ и щэху гъэщIэгъуэнхэр,  щыуэпсым и теплъэ дахащэр игъащIэкIэ ди гум къинэнущ», - жиIащ    Кушев Евгений.

Я къарум, бэшэчагъым,   хьэл псыхьам  ведомствэм я лэжьакIуэхэм Iэмал къаритащ мурад ящIам нэсыну,  тхыдэм къыхэнэну гъуэгуанэр къызэранэкIыну.   

- Европэм и къурш нэхъ лъагэ дыдэм   зэщIыгъуу дызэрыдэкIам ди щIыналъэхэм я зэдэлэжьэныгъэр игъэбыдэну дыщогугъ, - жаIащ Къэрал автоинспекцэм и лэжьакIуэхэм.  

                                                                                   УАРДЭ Жантинэ.