КIэщIу

Гъэплъыгъуэм хуагъэхьэзыр

Херсон областым хыхьэ Скадовск щIыналъэм и псэупIэ-коммунальнэ хозяйствэр щIымахуэ гъэплъыгъуэм хуагъэхьэзырыну Къэбэрдей-Балъкъэрым и лIыкIуэхэр абы щыIэщ.

ЖКХ-м пыщIауэ къэхъу ныкъусаныгъэ мыщхьэпэхэр зыгъэзэкIуэж ди IэщIагъэлIхэм къапщытащ щIыпIэ муниципалитетым и псэупIэхэр зэрагъэплъ системэм и лэжьэкIэр, котельнэу 60-м, хуабэ зэрыкIуэ бжьамийхэм, радиаторхэм я щытыкIэхэр, IэнатIэр зэрыщыту щIымахуэм зэрыхуэхьэзырыр.

Ныкъусаныгъэ къыщIагъэщахэр ягъэзэкIуэжащ, обрудованэхэр тэмэму зэрылэжьэным хуэдэу зэтраухуащ, цIыхухэм я шынагъуэншагъэм ехьэлIауэ щIапхъэхэм щагъэгъуэзащ.

Къэбэрдей-Балъкъэрым икIа гупым къапэщылъщ щIымахуэ гъэплъыгъуэр ныкъусаныгъэншэу Скадовск щIыналъэм къыщызэрагъэпэщыну.

Къурш къабзэ

«Къурш къабзэ» фIэщыгъэр зэрихьэу экологие фестиваль Iуащхьэмахуэ лъапэ тхьэмахуэ кIуам щекIуэкIащ. Абы и лэжьыгъэм хыхьэу ди щIыпIэм щыпсэухэм, туристхэм, хьэрычэтыщIэхэм, жылагъуэ зэгухьэныгъэхэм, министерствэхэмрэ ведомствэхэмрэ я лэжьакIуэхэм, нэгъуэщIхэми, псори зэхэту цIыху 1500-м щIигъум, Iуащхьэмахуэ и джабэ нэкIур къагъэкъэбзащ, кIэрыхубжьэрыхухэр зэщIакъуащ.

Iуащхьэмахуэ и джабэ нэкIур зэщIэзыкъуахэм ящыщу лъагапIэшхуэхэм щылэжьэным нэхъ хуэхьэзырхэр, зи узыншагъэкIэ абы хуэкIуэхэр метр 3912-кIэ, «Липрус» къэувыIэпIэм нэс, дэкIуеящ икIи абы телъа пхъэнкIийхэмрэ кIэрыхубжьэрыхухэмрэ кърахьэхащ. Мыдрейхэр къыщызэтеувыIащ «Азау» хуеймрэ «Гарабаши» станцымрэ я Iэгъуэблагъэм.

Лэжьыгъэр зэфIэкIа нэужь, «Азау» хуейм деж абыхэм гуапэу щаIущIащ уэрэджыIакIуэхэмрэ къэфакIуэ гупхэмрэ. Апхуэдэуи абыхэм жармыкIэхэр къыхузэрагъэпэщащ, лъэпкъ шхыныгъуэхэм щыщи Iурагъэхуащ.

«Къурш къабзэ» эко-фестивалыр къызэрагъэпэщащ «Кавказ.РФ»-мрэ Къэбэрдей-Балъкъэрым Курортхэмрэ туризмэмкIэ и министерствэмрэ.

ТетIысхьэпIэ хуабэхэр

«Кавказ.РФ»-м иджыблагъэ къызэритамкIэ, «Iуащхьэмахуэ» курортым къэпщытэныгъэхэр щрагъэкIуэкI, кIапсэ гъуэгухэм пыщIа EL6 кабинэхэм ярыт тетIысхьэпIэхэр къагъэплъу ящIыным ехьэлIауэ. ЦIыхуипщI зэрыхуэ кабинэхэм ахэр мыгувэу ирагъэувэнущ.

ИджыпстукIэ и кIэм нэблэгъащ кIапсэ гъуэгум и сервис-центрыр ухуэным ехьэлIа лэжьыгъэхэр. ИпэIуэкIэ лэжьэу ирагъэжьащ шэнтжьейхэр зыпыдза кIапсэ гъуэгу EL3-р. Ар къагъэсэбэпынущ лыжэкIэ къажыхьу зыщрагъасэ джабэ нэкIум цIыхухэр щыдашкIэ.

Сабийхэм папщIэ

2030 гъэм нэсыхукIэ Къэбэрдей-Балъкъэрым и сабий сад 200-м щIигъу зэрагъэпэщыжынущ. Иджыпсту апхуэдэ лэжьыгъэхэр щрагъэкIуэкI Iуащхьэмахуэ, Дзэлыкъуэ, Бахъсэн, Лэскэн щIыналъэхэм.

Сабий садхэм теплъэ дахэхэр иратыжыным имызакъуэу, абыхэм щызэрахъуэкIынущ инженер коммуникацэхэр, унэлъащIэхэр, обрудованэхэр. ЦIыкIухэр спортым щыхуагъасэ, щыджэгу, абыхэм зыщагъэпсэху, къыщакIухь щIыпIэхэри зыхуей хуагъэзэнущ. Апхуэдэ Iуэху бгъэдыхьэкIэм, шэч хэмылъу, сабийхэм я зыужьыныгъэм, узыншагъэм, шынагъуэншагъэм ехьэлIа фIагъ куэд къыдэкIуэнущ, гукъыдэжи къаритынущ.