Хьэмыз Руслан ягъэлъапIэ

ИилъэситI ипэкIэ ЩIэныгъэхэмкIэ Дунейпсо Адыгэ Академием хагъэхьауэ щытащ химие щIэныгъэхэмкIэ доктор, профессор, Урысейм щIэныгъэхэмкIэ и академием Геохимиемрэ аналитикэ химиемкIэ и институтым, Вернадский В. И. и цIэр зезыхьэм, и уна­фэщI, физическэ хи­миемкIэ дунейм щынэхъ цIэ­рыIуэ IэщIагъэлIхэм ящыщ Хьэмыз Руслан. И унагъуэр и гъусэу щIэныгъэлIыр Налшык зэры­щыхьэщIэр къагъэсэбэпри, Академием и ЩIыхь тхы­лъымрэ бгъэхэIу дахэмрэ гуфIэгъуэ щытыкIэм иту Руслан иратыжащ. 

ЩIДАА-м и щIэныгъэ секретарь нэхъыщхьэ, биологие щIэныгъэхэмкIэ доктор, профессор, КъБР-м и Парламентым и депутат Щхьэгъэпсо ­Сэфарбий къызэрыхигъэщамкIэ, Кавказ Ищхъэрэм щыщу Хьэмыз Руслан хуэбгъэдэн щIэныгъэлI щыIэкъым. Абы и щыхьэтщ Геохимиемрэ аналитикэ химиемкIэ институт Моск­ва дэтым япэ дыдэу Кавказым щыщ и унафэщI зэращIар. Щхьэгъэпсом къызэрыхигъэщамкIэ, ЩIДАА-м и президент, сенатор Къанокъуэ Арсен и гуапэ хъуащ Къармэ­хьэблэ къыдэкIа щIалэр Адыгэ Академием зэрыхыхьар. 
ГуфIэгъуэ зэIущIэм хэтащ «Радий» IуэхущIапIэм и генеральнэ унафэщI, «Телемеханика» заводыр къэзыщэхужа Къуэн Мухьэмэд, КъБКъУ-м и химик цIэрыIуэхэр, ЩIДАА-м и академик, филологие щIэныгъэхэмкIэ доктор БакIуу Хъанджэрий, Хьэмызым и шыпхъу, ЩIДАА-м и член-корреспондент, культурологиемкIэ кандидат ЩауэцIыкIу Людмилэ, Руслан и къуажэгъухэр, и благъэхэр, журналистхэр. 
Щхьэгъэпсо Сэфарбий ­ЩIДАА-м и дипломымрэ бгъэ­хэIумрэ Хьэмызым иритыжри, ЩIэныгъэхэмкIэ Урысей академием хэт Щоджэн Iэсхьэд томитI хъу и «Адыгэхэр» тхы­лъымрэ нэгъуэщI къыдэкIы­гъуэхэмрэ тыгъэ хуищIащ.