ЕджапIэщIэ

         «Иджырей школ», «Егъэджэныгъэ» лъэпкъ пэхуэщIэхэм хиубыдэу, Налшык къалэм щаухуэхэм мыгувэу къахэхъуэнущ сабий 700-м нэс зыщIэхуэну еджапIэ.

Ар Ватутиным и цIэр зезыхьэ уэрамым тет курыт еджапIэ № 23-м къатитI-щыуэ къыбгъуращIыхьу, тIури зэхагъэхьэжыну зыхуамурадырщ.

Яухуэ еджэпIэщIэм и лъабжьэр ягъэтIылъащ, япэ къатри дращIэину хунэсащ.

Курыт еджапIэщIэм и паспортым къызэрыщыгъэлъэгъуамкIэ, абы и пэшхэр хуитщ, дерс щхьэхуэхэр зэрыщрагъэкIуэкIыным тещIыхьауэ. Абы хэтынущ цIыкIухэр IэпщIэлъапщIэным щыхуагъасэ пэшхэр, спортзал, еджакIуэ 300 зэуэ зыщIэхуэну шхапIэ. ШколыщIэр къызэрагъэпэщынущ зыхуей-зыхуэфIхэмкIэ, унэлъащIэхэмкIэ.

Школыр щаухуэ хьэблэр Iувщи, ар куэдкIэ сэбэп хъунущ, пэщIэдзэ классхэм щеджэ цIыкIухэри хуиту зыщIэсын яIэнущ. А еджапIэм ирашэлIэнущ  зи узыншагъэм сэкъат иIэ сабийхэри. ЖыпIэнурамэ, егъэджакIуэхэми абыхэм я гъэсэнхэми Iэмал ягъуэтынущ тыншу, зыхуей хуэзэу я Iуэху ящIэну.    

КЪАНКЪУЛ Зазий.