ЩIэ
Лъахэхутэ, тхылъ тедзапIэм и унафэщI Котляров Виктор къыдигъэкIащ «Аномальные зоны и сакральные места Кабардино-Балкарии» гъуэгугъэлъагъуэр.
КъыдэкIыгъуэм къыщыхьащ зэман куэд щIауэ щIэныгъэм хузэхэмыгъэкI къэхъугъэхэм ущрихьэлIэ щIыпIэ 23-м, ухуэныгъэ 21-м я хъыбар. Къэбэрдей-Балъкъэрыр фIыуэ зыцIыху Котляров Виктор апхуэдэ щIыпIэу къелъытэ Зеикъуэ, Хьэрэ-Кхъуэрэ, Iуащхьэмахуэ лъапэ, Шэджэм Ипщэ, Шайтан-кол аузыр, нэгъуэщIхэри. Лъахэхутэхэм я лэжьыгъэ гъэщIэгъуэным къызэщIеубыдэ къэхъугъэ телъыджэхэм, фактхэм ятеухуа тхыгъэхэр.
Тхьэ Iэмыр зыхэлъ щIыпIэу къалъытэ диным ехьэлIа ухуэныгъэхэр, мэжджытхэр, соборхэр, кхъэлэгъунэхэр, щихъхэр щыщIалъхьэжа щIыпIэхэм щагъэува фэеплъхэр. Апхуэдэу ябж Балъкъэр Ипщэ, Эль-Тюбю (Шэджэм Ипщэ) къуажэхэм щыIэ «ЛIахэм я къалэ», Шэджэм Ищхъэрэм ит Тууз-сыртыр, Зеикъуэ къуажэм дэт «Нартхэм я кхъэр», Налшык къалэм и Iэгъуэблагъэхэм ит Iуащхьэцэр, Уллутау бгыр, Хьэбэз къуажэм щагъэува мывэ жорыр, нэгъуэщIхэри.
Лэжьыгъэм къыщыхьа тхыгъэхэр лъахэхутэр езыр зрихьэлIа, и нэгу щIэкIа е нэхъыжьхэм къаIуэтэжа, архив дэфтэрхэм къыхихыжа къудей мыхъуу, а къэхъукъащIэ телъыджэхэм щыхьэт техъуэну цIыхухэри щыIэщ. Гъуэгугъэлъагъуэм хигъэхьа тхыгъэхэм сурэтхэри дыщIигъужащ. Ди щIыналъэм къакIуэ туристхэм я бжыгъэм гъэ къэс щыхэхъуэ иджырей зэманым а тхылъыр зыIэрызыгъэхьэхэм ар щIэщыгъуэ зэращыхъунум шэч къытетхьэркъым. Гукъыдэж зиIэхэр езыр-езыру кIуэфынущ гъуэгугъэлъагъуэм къыщыхьа щIыпIэхэм.
Котляровхэ я тхылъ тедзапIэм нэхъапэIуэкIэ къыщыдэкIа «Таинственная Кабардино-Балкария» (2011), «Ключи от мира тайн мертвых. Что искали гитлеровцы в горах Кабардино-Балкарии» (2011), «Неизвестная Кабардино-Балкария» (2013), «Живописная Кабардино-Балкария» (2014), «Загадочная Кабардино-Балкария» (2014), «Увлекательная Кабардино-Балкария» (2014), «Запределье. Мистические места Кабардино-Балкарии» (2018), «Снежный человек» (алмасты) на Кавказе. Документальные свидетельства» (2022) тхылъхэр республикэм и тхыдэм щыщ Iыхьэщ.
«Кавказ мистический. В роли охотников за тайнами «Аненербе», «величайшим из метеоритов», снежным человеком» (2016) лэжьыгъэм тхылъеджэхэр хегъэгъуазэ Кавказ Ищхъэрэм фашист зэрыпхъуакIуэхэм къыщагъэна «Аненербе» зэгухьэныгъэм теухуа артефактхэм, «Бергман» батальоным и зы IуэхущIапIэ зэрагъэкIуэдам, Тызыл, Медвежье аузхэм щахъумэ щэхухэм, нэгъуэщIхэми. ПфIэгъэщIэгъуэну укъоджэ цIыхушх бэджым, Хуламо-Безенги аузым щызекIуэ шынагъуэм, алмэстыр щыпсэуа бгъуэнщIагъым, Лашынкъей къуажэм и Iэгъуэблагъэм щыIэ бэным ятеухуа тхыгъэхэм.
КъыжыIапхъэщ, Урысей телеканалхэм Котляровхэ Викторрэ Мариерэ я лэжьыгъэхэм къытращIыкIа теленэтын пщIы бжыгъэхэр, художественно-документальнэ фильмхэр зэрытрахар. Апхуэдэщ «Звезда» каналым 2013 триха «Тайна нацистского аэродрома» фильмыр.
Филологие щIэныгъэхэмкIэ доктор ЩоджэнцIыкIу Нинэ Котляров Виктор триухуа, «ЛъыхъуакIуэ» зыфIища и IэдакъэщIэкIым щитхащ ди щIыналъэр фIыуэ зыцIыху, абы ибгхэм, псыежэххэм, бгъуэнщIагъхэм, Iуащхьэхэм, щыхупIэхэм зэпымыууэ зыщызыплъыхь лъахэхутэм къыдигъэкIахэм ущеджэкIэ Къэбэрдей-Балъкъэрым теухуауэ щIэ куэд къызэрыпщIэр.
