Олимп ухуэныгъэхэр и нэIэм щIэтащ

Губиныр къыщалъхуар Тулэ щIыналъэм и Новомосковск къалэрщ (1944 гъэм бадзэуэгъуэм и 6-м). Пасэу зи адэр зыщхьэщыкIа щIалэ цIыкIур Налшык, и адэ шыпхъур зыщыпсэум, къашэжауэ щытащ. Апхуэдэу Къэбэрдей-Балъкъэрыр абы лъахэ хуэхъуащ. Ар ящыщщ зауэ нэужь зэман хьэлъэм зи сабиигъуэр хиубыдахэм. Курыт школыр къиуха нэужь, Геннадий Къэбэрдей-Балъкъэр къэрал университетым «инженер-механик» IэщIагъэм щыхуеджащ, иужькIэ Кавказ Ищхъэрэ социально-политикэ институтри (политолог IэщIагъэмкIэ) I99I гъэм къиухыжащ. Еджэным зэи хуэмыщхьэха щIалэр экономикэ щIэныгъэхэмкIэ кандидат хъуащ.

Губиным лэжьэн къыщыщIидзащ лъэщапIэм. ИтIанэ радио Iэмэпсымэхэм елэжьащ, Налшык дэта "Телемеханика" заводым и цех унафэщIуи щытащ. IуэхущIапIэм и парт комитетым и секретару ар щытащ 1980 - 1986 гъэхэм. Сыт щыгъуи и лэжьыгъэм нэхъыщхьэу тегъэщIапIэ щищIыр и унафэм щIэтхэм я Iуэху еплъыкIэр къилъытэнрати, абы щхьэкIи Геннадий пщIэшхуэ къыхуащIырт.

1986 гъэм ар КПСС-м и Къэбэрдей-Балъкъэр обкомым и промышленно-транспорт къудамэм и инструктор ящIащ. Зы илъэс фIэкIаи дэмыкIыу, лэжьыгъэм гудзакъэ хуиIэу гу зылъата щIалэм КПСС-м и Налшык къалэ комитетым и япэ секретарь къулыкъур къыхуагъэлъэгъуащ.  Промышленностым къыщыщIэдзауэ коммунальнэ, транспорт Iуэхухэм щыщIэкIыжу къалэм гугъуехьхэр щымащIэтэкъым, ауэ а зэманым щыIа зы Iэмали блигъэкIакъым и пщэрылъхэм теухуауэ къимыгъэсэбэпу. ЦIыхубэ депутатхэм я Налшык къалэ советым и унафэщIуи щыт Губиным цIыхухэм я Iуэху зэрыдэкIыным и нэIэ тригъэтт. ЗэратхыжымкIэ, 1987 - 1991 гъэхэм Налшык зэи къыщымыхъуауэ, псэупIэ куэд дыдэ щаухуэну яхузэфIэкIат. Парт лэжьыгъэм иужь, Губин Геннадий игъэзэжащ «Телемеханика» IуэхущIапIэм и унафэщIым и къуэдзэу.

1991 гъэм и кIэм президент хэхыныгъэхэр екIуэкIыну къыхалъхьат. КIуэкIуэ Валерэ КъБР-м и Президент къулыкъум щIэбэныну зыкъыщигъэлъагъуэм, Губин Геннадий республикэм и вице-президент IэнатIэм хущIэкъуну триухуат. ТIуми а къулыкъухэр  хуагъэфащэри, I992 гъэм и щIышылэм щегъэжьауэ 2004 гъэ пщIондэ Геннадий КIуэкIуэм бгъурыту лэжьыгъэшхуэ зэфIигъэкIащ.

Абыхэм зэгъусэу республикэр гугъуехьхэм къыхашащ, Къэбэрдей-Балъкъэрыр мылъэлъэжу, лъэпкъ, дин зэгурыIуэныгъэр, мамырыгъэмрэ зэпIэзэрытыныгъэмрэ щIыналъэм щытепщэу зэфIагъэувэныр яхузэфIэкIащ. А илъэс нэхъ гугъухэм щIыналъэм и Президентым и гуащIэ емыблэжу бгъурытащ Губиныр.

Сыт хуэдэ IэнатIэ лъагэ къыхуамыгъэлъагъуэми, Губин Геннадий цIыху къызэрыгуэкIщ, къызыфIэщIыжыркъым, жылагъуэм я псэукIэр ефIэкIуэн папщIэ лъэкI къигъанэркъым. А зэманым абы республикэм и зыужьыныгъэм къыхишэрт хьэрычэтыщIэхэр, щIыпIэ администрацэхэм я Iэтащхьэхэр бэшэчагъ хэлъу къыхуриджэрт цIыхухэм я Iуэху еплъыкIэхэ къалъытэну. Апхуэдэуи республикэм и ехъулIэныгъэхэр утыку инхэм зэрыщигъэлъэгъуэным ар иужь итт.

Губиным и Iуэху зехьэкIэр ягу зэрыдыхьэм къыхэкIыу, федеральнэ IэнатIэхэми ар ирагъэблагъэрт. Сочэ къалэ Олимп джэгухэр щрагъэкIуэкIын папщIэ ухуэныгъэшхуэхэр къыщрахьэжьа нэужь, «Олимпстрой» къэрал корпорацэм и вице-президенту ар хахащ. I990, 2000 гъэхэм Къэбэрдей-Балъкъэрым щекIуэкIа политикэ, экономикэ Iуэхухэм пхыкIыну хунэса Губиныр зыпэрыхьа а лэжьыгъэм  къигъэшынэнт?! Олимп ухуэныгъэхэр щащIыну щIыпIэхэм щыпсэухэм унэщIэхэр хуаухуэу, абдеж цIыхухэр къигъэIэпхъукIын хуейти, абы елэжь департаментыр (мылъку-псэупIэ IуэхухэмкIэ) зи нэIэ щIэтар Геннадийщ. Хэти ещIэ, цIыхухэм Iуэхур зытетыр яжепIэу, а псори зэгурыбгъэIуэныр зэрымытыншыр, ауэ абы хузэфIэкIащ дэтхэнэми зэрепсэлъэн бзэ къыхуигъуэтыну. Губин Геннадий езыми и лэжьакIуэхэми фIыуэ къагурыIуэрт жэуаплыныгъэ зыпылъ Iуэхум иужь зэрихьар. Псори зэхэту ухуэныгъэ 384-рэ ящIын хуейти, зытраухуа пIалъэм фIэмыкIыу ахэр зэфIагъэкIат. 

2015 гъэм Губин Геннадий федеральнэ IэнатIэхэмрэ Москва Правительствэмрэ  ядэлэжьэныр къызэгъэпэщынымкIэ  КъБР-м и Iэтащхьэм и лIыкIуэу ягъэуващ (КъБР-м и Правительствэм и УнафэщIым и къуэдзэ къулыкъур иIыгъыу) икIи мы зэманым абдеж и зэфIэкIыр къыщосэбэп.

Губиным къэрал дамыгъэ лъапIэхэр къыхуагъэфэщащ. Абы къыфIащащ «КъБР-м промышленностымкIэ щIыхь зиIэ и лэжьакIуэ», «КъБР-м щIыхь зиIэ и ухуакIуэ», «Урысейм и энергетикэ IэнатIэм щIыхь зиIэ и лэжьакIуэ» цIэ лъапIэхэр. Апхуэдэуи абы къратащ Бэракъ Плъыжь, ЩIыхьым и ещанэ нагъыщэ орденхэр, Республикэм и социально-экономикэ зыужьыныгъэм хэлъхьэныгъэшхуэ зэрыхуищIам папщIэ, абы къыхуагъэфэщащ «Хэкум и пащхьэм щиIэ фIыщIэхэм папщIэ» орденыр (IV нагъыщэр). Сочэ Олимпиадэр къыщызэгъэпэщыным зэрыхэлэжьыхьам къыпэкIуэу, 20I4 гъэм къратащ Невский Александр и орденыр, щIыхь тхылъ бжыгъэншэхэр, медаль 40-м щIигъу.