Чэф зиIэхэм я зэранкIэ

2024 гъэр къызэрихьэрэ Къэбэрдей-Балъкъэрым и автоинспекторхэм яубыдащ  чэф яIэу машинэ зезыхуэ цIыху 1400-м щIигъу. Абыхэм яхэтщ нэхъапэIуэкIи апхуэдэ IуэхукIэ тезыр зытралъхьа цIыху 240-рэ.

Чэф яIэу рулым дэсхэм я зэранкIэ зэжьэхэуэ куэд къохь, цIыху куэди хокIуадэ. Афиянымрэ фадэмрэ нэм тэмэму имылъагъуу ящI, щхьэр ягъэлажьэркъым, гулъытэм кIэрагъэху, плъыфэхэми «зрагъэхъуэж», хуэму узекIуэу къыпщагъэхъу.

Мы гъэр къызэрихьэрэ щIыналъэм къыщыхъуа машинэ зэжьэхэуэхэм я бжыгъэм щыщу 22-р къызыхэкIар фадэрщ. Абыхэм хэкIуэдащ цIыхуи 9, фэбжь зэмылIэужьыгъуэхэр хахащ 21-м.

МВД-м КъБР-м щиIэ къудамэм и Госавтоинспекцэм къет чэф иIэу машинэм дэтIысхьэхэмрэ чэфыр къахутэнымкIэ ирагъэкIуэкI къэпщытэныгъэхэр зымыдэхэмрэ тезыру сом мин 30 зэрырагъэтыр, илъэситIкIэ машинэм дэтIысхьэну хуимыту я тхылъхэр зэрыIахыр. ЕтIуанэу а щыуагъэ дыдэр зылэжьхэм тезыру сом мин 200-300 ирагъэтынущ, илъэси 2-кIэ машинэ зэрихуэну хуимыту и тхылъыр трахынущ, къинэмыщIауэ, илъэси 3-кIэ пэрытынущ судым хуигъэлъэгъуэну  лэжьыгъэм.

Фырэ Анфисэ.