Фэращ хеящIэр

Адыгэ IуэрыIуатэм щыщу Джэдгъэф Аслъэмырзэ итхыжахэм къыхэтхыжащ.

… Зэшищ ежьауэ, гъуэгу здытетым, шы лъэужь къаIэщIэлъэгъуащ.

 - Мы шыр хэт ишми, и нэ сэмэгур исыжкъым, - жиIащ зэшищым я нэхъыжьым.

- Шым щэлъахъи илъщ, - жиIащ зэшищым я курытым.

- ЩIакIуи теубгъуащ шым, - жиIащ шынэхъыщIэм.

 Гъуэгум зылI къащрихьэлIащ зэшищым.

- Шы къыфIэщIэмылъэгъуауэ пIэрэ? - къеупщIащ лIыр. - Гъуэгум сыщепсыхри, сышхьэукъуэху, шыр къэкIуэсащ.

- Уи шым и нэ сэмэгур исыжкъэ? - еупщIащ зэшищым я нэхъыжьыр лIым.

- Исыжкъым, - жиIащ лIым.

- Щэлъахъэ илъ? - щIэупщIащ курытыр.

- Илъщ.

 - ЩIакIуи теубгъуа? - щIэупщIащ нэхъыщIэр.

- Теубгъуащ щIакIуи, - жиIащ лIым. - Си шыр флъэгъуауэ къыщIокI!

- Тлъэгъуакъым, - жаIащ зэшищым.

- Флъэгъуащ. Фымылъэгъуамэ, си шым и нэ сэмэгур зэримысыжри, щэлъахъэ зэрилъри, щIакIуэ зэрытеубгъуари дэнэ щыфщIэрэ? Шыр фIэщIэкIакъым, къызэфтыж. Дэнэ щывгъэпщкIуар? – жиIэри, лIым зэшищыр къыхигъэзыхьащ.

- Тлъэгъуакъым, дгъэпщкIуакъым, - щыжаIэм, зэшищыр хеящIэм деж ишащ лIым. - Си шыр мы зэшищым яфIэкIакъым. Шыр гъуэгум щысфIэкIуэдащ. Си шым и нэ сэмэгур зэримысыжри, щэлъахъэ зэрилъри, щIакIуэ зэрытеубгъуари ялъэгъуащ, - жриIащ хеящIэм,

- Флъэгъуа? - къеупщIащ хеящIэр зэшищым.

- Тлъэгъуакъым, - жаIащ зэшищым.

- Шым и нэ сэмэгур зэримысыжыр дэнэ щыфщIэрэ-тIэ? - къыхигъэзыхьащ хеящIэм.

- ИжьырабгъумкIэ зэпхъуэкIыурэ гъуэгунапщIэ удзыр ихъуати, шым и нэ сэмэгур зэримысыжыр къэсщIащ, - жиIащ я нэхъыжьым.

- Щэлъахъэ зэрилъыр дауэ къэфщIа?

- Щэлъахъэ имылъатэмэ, шым и фIалъэ лъакъуэмрэ и кIэбдз лъакъуэмрэ зэрыувэнутэкъым, - жиIащ курытым.

- ЩIакIуэ зэрытеубгъуар дэнэ щыфщIэрэ?

- ЩIакIуэр шым и пхэщIым къекIуэтэхри, гъуэгу сабэр илъэщIурэ здилъэфати, абыкIэ къэсщIащ, - жиIащ нэхъыщIэм.

- Мы зэшищым лажьэ яIэкъым, - жиIащ хеящIэм. - Уи шыр ялъэгъуакъым. Шым зыхыумыгъэкIыжынумэ, хьэм ямышх щIыкIэ лъыгъуазэ, - жиIэри, хеящIэм лIыр къиутIыпщыжащ.

«Мы зэшищыр цIыху губзыгъэщ, ныжэбэ си унэ изгъэсынщ», - мурад ищIащ хеящIэм. Зэшищыр хьэщIэщым иришэри, щынэ яхуригъэукIащ, хуигъэпщэфIащ, езыри ядэшхэри, хьэщIэщым икIыжащ. Жэщыбг игъэхъури, бжэщхьэIум къытеуващ хеящIэр: «Мыхэр IуэрыIуэдзщ, Iущщ, сакIэщIэдэIухьынщ, - жиIэри.

Гъуэлъыжауэ здыхэлъым, зэшищым я нэхъыжьым жиIащ:

- ХеящIэм дигъэтхъа и гугъэщ: ныщхьэбэ дигъэшха щынэлым хьэбзымэ къыхех.

- Я пIастэми хьэдэмэ къыхех, - жиIащ курытым.

- Езы хеящIэр тхьэкIумэ жьажьэщ, - жиIащ нэхъыщIэм.

Зэшищым якIэщIэдэIухьри, зэхихар гъэщIэгъуэн щыхъуауэ, бжэщхьэIум къытекIыжащ хеящIэр. Нэху игъэщри, мэлыхъуэр къриджащ.

- Дыгъуэпшыхь уэзгъэукIа щынэм и лым хьэбзымэ къыхех. Сыт щхьэкIэ? - еупщIащ хеящIэр мэлыхъуэм.

- ПщызбзыщIащ, армыхъу щынэр къэзылъхуа мэлыр псэхэлIэ хъуати, хьэбзым щIэзгъэфурэ спIащ щынэр, - жиIащ мэлыхъуэм.

- ПщафIэри къриджащ хеящIэм:

- Дыгъуэпшыхьрей пIастэм хьэдэмэ щхьэ къыхихрэ?

- Хугур къызэмэщIэкIати, кхъэм сыдыхьэри, мэшыщхьэ къэсфыщIат, - зиумысыжащ пщафIэм.

ХеящIэр зэшищым я деж кIуащ.

- Щынэлым хьэбзымэ къызэрыхихри пIастэм хьэдэмэ къызэрыхихри къэфщIащ, фызахуэщ, - яжриIащ зэшищым. - СызэрытхьэкIумэ жьажьэри дэнэ къыщыфщIа?

- УмытхьэкIумэ жьажьэтэмэ, укъыткIэщIэдэIухьынтэкъым, - жиIащ зэшищым я нэхъыщIэм.

- Тхьэ соIуэ си пыIэкур къивудакIэ! - жиIащ хеящIэм. - Сэракъым, фэращ жылэм хеящIэ яхуэхъун хуейр.