Щхьэх зымыщIэ IэщIагъэлIу…

Арщыданрэ Александровскэ станицэмрэ зэпызыщIэ автомобиль зекIуапIэр (километр 12 и кIыхьагъщ) къызыхуэтыншэу зэгъэпэщыжыным ехьэлIа лэжьыгъэхэр и кIэм нагъэблэгъащ.

Гъуэгум ехьэлIа Iуэхум 2024 гъэр къызэрихьэу щIадзащ. БлэкIа мазэ бжыгъэм къриубыдэу IэщIагъэлIхэр къапэщылъ къалэным и нэхъыбэм пэлъэщащ, къэдгъэлъагъуэмэ, автомобиль зекIуапIэм и лъабжьэр ягъэбыдащ, машинэ зекIуапIэм зрагъэубгъури, асфальт тIуащIи тралъхьэжащ. Мы зэманым гъуэгум и щхьэфэм телъын хуей къыкIэлъыкIуэ асфальтри трабзэ.         

IэщIагъэлIхэм лэжьыгъэ псори зэфIагъэкIа иужь, машинэ зекIуапIэу плIы иIэнущ, зэблэкIыпIэхэм я зэхуаку бжыхь цIыкIухэр дэтынущ. А Iуэхум, зэрыгурыIуэгъуэщи, автомобиль зекIуапIэр нэхъ щызекIуэгъуафIи шынагъуэнши ищIынущ. КъинэмыщIауэ, гъуэгум и бгъуитIымкIи узымыгъэжакъуэ дамыгъэхэр традзэнущ, дунейр щыуэтIпсытIми пшапэ зэхэуэгъуэми къыхэплъагъукIыу.

Зи гугъу тщIа лэжьыгъэхэр ягъэзащIэ Урысейм и автомобиль зекIуапIэхэр зэпэщи шынагъуэнши щIыным теухуауэ кърахьэжьа «ГъуэгуфI шынагъуэншэхэр» лъэпкъ проектым тету.    

Автомобиль зекIуапIэхэр къызыхуэтыншэу зэрызэрагъэпэщыжыр щхьэпэщ щIыналъэм и щIыпIэ зэмылIэужьыгъуэхэр тыншу зэлъэгъэIэсынымкIи цIыхубэм я псэукIэм зегъэужьынымкIи. 

Лэжьыгъэхэр зыхуагъэувыжа пIалъэр къэмысу, гъэ дызэрытыр имыух щIыкIэ, зэфIагъэкIынущ. Ар и щыхьэтщ гъуэгуухуэхэм IэпщIэлъапщIагъэ зэрызэрахьэмкIи къыхуагъэува къалэнхэм и чэзум ефIэкIыжу зэрыпэлъэщымкIи.                                                              

КЪАНКЪУЛ Зазий.