Пащтым и дерсхэр

СурэтыщI гъуазджэхэмкIэ музей Ткаченкэ Андрей и цIэр зезыхьэм УФ-м и цIыхубэ, КъБР-м щIыхь зиIэ и сурэтыщI, республикэм и Къэрал саугъэтым и лауреат, ХудожествэхэмкIэ Урысей Академием и член-корреспондент, профессор, Красноярск ксилографиемкIэ щыIэ студием и къызэгъэ­пэщакIуэ икIи абы и унафэщI Пащты Герман яIущIащ Налшык къалэм и курыт еджапIэ №20-м и егъэджакIуэхэмрэ гъэсэнхэмрэ. 

СурэтыщI гъуазджэм дихьэххэм художникыр яхутеп­сэлъыхьащ «Миг и вечность. Сто иллюстраций к 100-летию Виктора Астафьева» фIащауэ Налшык мы зэманым щагъэ­лъагъуэмрэ ХудожествэхэмкIэ Урысей Академием Красно­-ярск щиIэ къудамэм щекIуэкIамрэ. КъыжыIапхъэщ, СурэтыщI гъуазджэхэмкIэ музей Ткаченкэ Андрей и цIэр зезыхьэм и гъэлъэгъуэныгъэм хагъэхьа, Пащты Германрэ и еджакIуэхэмрэ я IэдакъэщIэкI лэжьыгъи 119-р республикэм тыгъэ зэры­хуи-щIар. 
Пащтыр къытеувыIащ Красноярск щекIуэкIа апхуэдэ гъэлъэгъуэныгъэм сурэт 280-рэ зэрыхагъэхьам, ксилографиемкIэ еджапIэм щIэсхэм я лэжьыгъэхэм. Герман игу къигъэкIыжащ 1991 гъэм урыс тхакIуэ, драматург Астафьев Виктор къызэрицIыхуауэ щытар, абы и IэдакъэщIэкIхэм яхуищIа су­рэтхэр тхакIуэм игу дыхьэу зэрыщытар. Щхьэхуэу тепсэлъ-хьащ Астафьевым фIыуэ илъагъуу щыта Енисей псыежэхыр къыщигъэлъэгъуэжа и лэжьыгъэм.
Зэхыхьэм хэтхэмрэ музейм и лэжьакIуэхэмрэ экранымкIэ ирагъэплъащ Астафьев Виктор къызэралъхурэ илъэси 100 зэрырикъум и щIыхькIэ Красноярск щекIуэкIа выставкэр къызэрызэIуахам теухуа нэтыным. Пащтыр тепсэлъыхьащ ­гравюрэхэр зи Iэдакъэ къыщIэкIа и гъэсэн нэхъыфIхэм, абы-хэм я зэфIэкIхэм зэрыкIэлъыплъым, Астафьевым ипхъу Ася къызэрицIыхуам.
КъБР-м щэнхабзэмкIэ и министр Къумахуэ Мухьэдин жиIащ Пащты Герман щалъхуа щIыналъэм тыгъэфIхэр (нэхъа-пэм лэжьыгъэ 1100-рэ, иджы 119-рэ) къызэрыхуищIар. Министрым Пащты Герман иритыжащ КъБР-м и Правительствэм къыхуигъэфэща фIыщIэ тхылъымрэ КъБР-м ЩэнхабзэмкIэ и министерствэм художникым иригъаджэхэм тыгъэ яхуищIа фIыщIэ тхылъхэмрэ.
Лъахэхутэ, тхылъ тедзапIэм и унафэщI, КъБР-м и Жылагъуэ палатэм хэт Котляровэ Марие къытеувыIащ Астафьев Виктор сабиигъуэ гугъу зэриIам, Хэку зауэшхуэм псэемыблэжу зэ­ры­хэтам, и лэжьыгъэхэмрэ абыхэм къытращIыкIа сурэтхэм­рэ         теу­хуа и еплъыкIэхэм, абыхэм гъащIэм и пэжыр къызэ­ры­щ­ы­гъэлъэгъуам. 
ЗэIущIэм къыщыпсэлъащ музейм и методист Жантудуевэ Еленэ, Налшык къалэм и курыт еджапIэ №20-м и унафэщI Аслъэн Майе, нэгъуэщIхэри. Пащты Герман и гуапэу жэуап иритащ и IэщIагъэм теухуауэ зэIущIэм хэтахэр зыщIэупщIахэм. 
ТЕКIУЖЬ Заретэ.