Ныбжьэгъу пэж

- НыбжьэгъуфIыр гъащIэм и тыгъэ лъапIэщ, абыкIэ Тхьэр зыхуэупсар насыпыфIэщ. Си щхьэкIэ згъэунэхуащ зэныбжьэгъугъэм и мыхьэнэр. Си тхыгъэм зи гугъу щыфхуэсщIыну Iэрэмысэ-КъалакIуэ ФатIимэ ныбжьэгъм имызакъуэу, анэкъилъху схуэхъуауэ илъэс куэд щIауэ дыкъызэдогъуэгурыкIуэ, - къетх УнащIэ Хьэчимэт Хьэсэн и пхъум. - Илъэс плIыщIрэ блыкIэ узэIэбэкIыжмэ, япэ дыдэу дыщызэхуэзауэ щытащ Налшык дэт медицинэ училищэм. Абы лъандэрэ дызэхуэпэжщ. 
Фельдшер IэщIагъэр зэдгъэгъуэта нэужь, тIуми Нарткъалэ щыIэ «ДэIэпыкъуэгъу псынщIэм» лэжьэн щыщIэддзащ. Абы илъэс 40-кIэ дыщызэдэлэжьащ. ФатIимэ ноби а лэжьыгъэ мытыншыр ехъулIэныгъэхэр иIэу  ирехьэкI. А бзылъхугъэм и адэ-анэм, Iэрэмысэхэ Толэрэ Розэрэ, я пхъум гъэсэныгъэ дахэ халъхьат. Ар цIыхугъэшхуэ зыхэлъщ, егъэлеяуэ цIыху тыншщ, гу къабзэщ, зэхэщIыкI зиIэщ, щхьэхи езэши зымыщIэщ. ФатIимэ цIыху псэ хьэлэлу зэрыщытыр зэгуэр абы ирихьэлIа дэтхэнэми къыбжиIэфынущ, гумызагъэщи, зи ужь ихьэ сыт хуэдэ Iуэхури нэгъэсауэ зэфIимыхауэ тепыIэ иIэнукъым. ГъащIэ щыхъукIэ, цIыхур куэдым ирохьэлIэ, зэрыжаIэу, Iейри фIыри дунейм къыщызэдокIуэкI, апхуэдэхэм дежи ФатIимэ езым и щхьэ Iуэхур зэрыдихым хуэдэу, уи гузэвэгъуэри къыбдигъэпсынщIэнущ, уи гуфIэгъуэри бдиIэтынущ. Шэч зыхэмылъыжыр зыщ: ФатIимэ уи гъусэмэ, ущIэпIейтеин щымыIэу псори тэмэму зэфIэкIынущ. 
Апхуэдиз зэман дэкIами, зыкIи нэхъ тIасхъэ хъуакъым ди зэныбжьэгъугъэр: а зэхущытыкIэм къытхуигъэув пэжагъыр, лъагъуныгъэр, IэфIагъыр, гуапагъэр, цIыхугъэр гъэунэхуныгъэ куэдым пхыкIри, ди зэпыщIэныгъэр нэхъ быдэ хъуащ. Ныбжьэгъуу къежьэу анэкъилъху пэлъытэ схуэхъужа ФатIимэ си гъащIэм зэрыхэтым срогуфIэ икIи срогушхуэ.
Унагъуэ дахэм и гуащэщ си ныбжьэгъури, и щхьэгъусэ Юрэрэ езымрэ зэкъуэту, узыншагъэ быдэ яIэу, я бынхэм я гуфIэгъуэ куэд ялъагъуу, гуфIэгъуэрэ дэрэжэгъуэрэ яIэу дунейм тезэшэху тетыну сохъуэхъу.