НэщIэпыджэ Замирэрэ Аслъэныкъуэ Мадинэрэ фокIадэм и 23 - 27 махуэхэм «Адыгэ макъ» газетым и редакцэм щылэжьащ. ЗэдэпщIэр щIэхщ жыхуиIэрати, бысым газетым и редактор нэхъыщхьэ МэшлIокъуэ Саидэ яхуигъэхьэзыра программэм тету, ди къуэш республикэм и цIыху цIэрыIуэхэм, IэпэIэсэхэм, къулыкъущIэхэм яхуэзащ, хэгъэгум и псэукIэмрэ абы исхэм я гукъыдэжымрэ зэрагъэщIащ пщащэхэм. А псори журналистхэм къыщаIуэтэж Къэбэрдей-Балъкъэрымрэ Къэрэшей-Шэрджэсымрэ къыщыдэкI адыгэ газетхэм.
Адыгэ Республикэм щIыхь зиIэ и журналист, «Адыгэ псалъэ» газетым политикэмкIэ, жылагъуэмрэ лъэпкъ IуэхухэмкIэ и къудамэм и унафэщI НэщIэпыджэ Замирэ Лиуан и пхъур 2002 гъэ лъандэрэ «Адыгэ псалъэм» щолажьэ.
Ар куэд щIауэ япыщIащ КъБР-м, КъШР-м, АР-м, Краснодар крайм, Тыркум къыщыдэкI газетхэмрэ журналхэмрэ. Абыхэм яхуригъэхь тхыгъэхэм нэмыщI, хамэ къэралхэм щикъухьа ди лъэпкъэгъухэм жа-ну, щIэщыгъуэу щIэх-щIэхыурэ ятотхыхь. Тыркум, Израилым, Германием, Абхъазым, нэгъуэщI щIыпIэхэм щыIащ, хэхэс адыгэхэмрэ абыхэм я псэукIэмрэ ятеухуа тхыгъэхэр газет напэкIуэцIхэм къытрыригъэдзащ, телевиденэмкIэ нэтынхэр къигъэлъэгъуэжащ. И лэжьыгъэ нэхъыщхьэм къыдэкIуэу, ар жыджэру хэтщ республикэм щекIуэкI жылагъуэ гъащIэми. Илъэс куэд щIауэ Дунейпсо Адыгэ Хасэм хэтщ, абы и тхьэмадэм и къуэдзэу лэжьащ, иджыпсту Къэбэрдей Адыгэ Хасэм и тхьэмадэм и къуэдзэщ. Лъэпкъ Iуэхум теухуауэ зэфIагъэкIа, адыгэ дунейм къыщыхъуа Iуэхугъуэ гъэщIэгъуэнхэр зэрыт тхылъ зыбжанэм я авторщ.
НэщIэпыджэ Замирэ 2004 гъэ лъандэрэ Урысейм и Журналистхэм я зэгухьэныгъэм хэтщ, ДАХ-м и ЩIыхь тхылъымрэ дамыгъэ нэхъыщхьэмрэ къратащ, КъБР-м и Парламентым, Жылагъуэ палатэм, УФ-м и Журналистхэм я зэгухьэныгъэм, министерствэхэм я щIыхь тхылъхэр къыхуагъэфэщащ.
* * *
Аслъэныкъуэ Мадинэ Хьэсэн и пхъур «Черкес хэку» газетым жэуап зыхь и секретарщ, «Лэгъупыкъу» сабий журналым и редактор нэхъыщхьэщ. 2007 гъэм адыгэ газетым оператору къэува Мадинэ, нобэ журналист цIэрыIуэ хъуащ. ЯпэщIыкIэ Ставрополь дэт колледжыр, итIанэ университетыр къиухащ. Иджы редакцэм щекIуэкI сыт хуэдэ лэжьыгъэри хуогъэIурыщIэ. Аслъэныкъуэм и тхыгъэхэр сыт щыгъуи купщIафIэщ, щIэджыкIакIуэхэм ягу дыхьэу къыпэджэжу апхуэдэщ. «Черкес хэкум» и теплъэр дахэ хъуныр, абы тхыгъэхэр зэгъэзэхуауэ итыныр къызэзыгъэпэщыр Мадинэщ. Апхуэдэуи сабий журналым цIыкIухэр дихьэхыу, абыхэм я щIэныгъэмрэ акъылымрэ хэзыгъэхъуэн, я анэдэлъхубзэм зезыгъэужьын тхыгъэхэмкIэ бейуэ, сурэт щхъуэкIэплъыкIэхэмкIэ гъэщIэрэщIауэ къыдегъэкI.
Мадинэ и гур зыхуеIэм IэкIэ лъэIэсыф адыгэ пщащэщ. 2024 гъэм, «Черкес хэкур» къыдэ-кIын зэрыщIидзэрэ илъэси 100 щрикъум триухуэри, куэд щIауэ иIэ хъуэпсапIэр зригъэхъу-лIащ. Ар мы гъэмахуэм Iуащхьэмахуэ и щыгум дэкIащ.
БлэкIа илъэсхэм Аслъэныкъуэ Мадинэ къыхуагъэфэ-щащ КъШР-м и Правительствэм, КъШР-м и цIыхубэ Зэхуэсым (Парламентым) и Президиумым, КъШР-м Лъэпкъ IуэхухэмкIэ, хъыбарегъащIэ IэнатIэхэмрэ печатымкIэ и министерствэм я ЩIыхь тхылъ-хэр, нэгъуэщI къулыкъущIапIэхэми ягъэпэжащ.
