Пэрыт ныбжьыщIэхэм я деж

КъБР-м и Парламентым и депутат, «Пэрытхэм я зэщIэхъееныгъэ» зэгухьэныгъэм республикэм щиIэ и къудамэм и унафэщI Шыпш Аслъэн, абы и къуэдзэ Зэбакъ Азэмэт, «Пэрытхэм я зэщIэхъееныгъэм» и Дзэлыкъуэ къудамэм и унафэщI Мамсыр Руслан сымэ щыIащ Къармэхьэблэ курыт еджапIэ №2-м. ХьэщIэхэм еджакIуэхэр щагъэ­гъуэ­защ зэгухьэныгъэм и пщалъэхэм, и мыхьэнэм, зэры­зиубгъум. Нэхъыщхьэу абы хэлъыр ныбжьыщIэхэр фIым-рэ Iеймрэ зэхагъэкIыфу, пэжым тету, я гупсысэ къаIуэтэфу, я щIэныгъэр къагъэсэбэпу гъэсэнырщ, жылагъуэ Iуэхум къыхэшэнырщ. Къармэхьэблэдэс ныбжьыщIэхэр а Iуэхугъуэхэм хъарзынэу хэтщ, я гупсысэкIи я щэнкIи зэрызаужьыр нэрылъагъущ.

Класс нэхъыжьхэм щеджэ «пэрытхэм» Шыпш Аслъэн епсэлъащ IэщIагъэу къыхахынум, адэкIи жылагъуэ Iуэ­хухэм зэрыпащэнум, нэхъ ­къайхъулIэхэмрэ дэзыхьэх­хэмрэ ятеухуа чэнджэщхэри яритащ. А псом ехьэлIауэ ныбжьыщIэхэр зыщIэупщIам Шыпшыр пэджэжащ. 
Аслъэн еджакIуэ­хэм яжри­Iащ IэщIагъэ къы­щы­­хахкIэ я гум Iэпихым къы­теувыIэну, я хъуэпсапIэхэм емып­цIыжы­ну. Сыту жы­пIэ­мэ, IэщIагъэм гурыфIыгъуэ къущиты­фы-нур ар гурэ псэкIэ къыхэпхамэщ. 
- Мыхьэнэшхуэ иIэщ пэрыт ныбжьыщIэхэм упщIэжэгъу ящIым. ФIыщIэ хузощI фи еджапIэм и пэрытхэр зи нэIэ щIэт Бей Лианэ. Ар мы лэжьыгъэм жыджэру хэтщ, жэуап­лыныгъэ зэрыхэлъым гу лъы­ботэ. Дэтхэнэ сабийми бгъэ­дыхьэкIэ гуапэ къыхуегъуэт, и гъэсэнхэр егъэгушхуэ, еджэнми щIрегъэкъузэ, - жиIащ абы зэгухьэныгъэм еджапIэм щи­Iэ къудамэр зи нэIэ щIэтым хуэгъэзауэ. 
- Ди сабийхэм къахуэфщIа гулъытэм, зэхевгъэха Iущыгъэхэм мыхьэнэшхуэ яIэщ! Си гугъэщ я гъащIэ гъуэгур зэ­теуб­ла зэрыхъунур куэдкIэ зэ­­лъыта Iуэхугъуэм - IэщIагъэу къыхэхынум - теухуауэ нобэ къажефIахэр къахуэщхьэпэну, - яжриIащ хьэщIэхэм Лианэ. 

ГУГЪУЭТ Заремэ.