Хэхъуэ яIэщ

Дызэрыт илъэсым и мазибгъум къриубыдэу Къэбэрдей-Балъкъэрым ерыскъыхэкIхэм елэжь и IуэхущIапIэхэм къыщIагъэкIа псыхэкIхэм я куэдагъым хагъэхъуащ. 2024 гъэм и щIышылэ – фокIадэ мазэхэм хуэзэу псыхэкIхэмкIэ промышленнэ индексыр проценти 186,8-рэ хъуащ.

Нэгъабэ щыIа бжыгъэхэм ебгъапщэмэ, мы гъэм и мазиб­гъум къриубыдэу сырэу къыщIагъэкIар процент 14,6-кIэ нэхъыбэщ, псыIэфIыр – процент 17,2-кIэ, нарзаныпсыр – процент 1,2-кIэ. Апхуэдэуи хэхъуэ къагъэлъэгъуащ спирт, аркъэ, нэ­гъуэщI фадэ лIэужьыгъуэхэри къыщIэзыгъэкI IуэхущIапIэхэм.
Кавказ Ищхъэрэм СтатистикэмкIэ и управленэм къызэритамкIэ, 2024 гъэм и щIышылэ – фокIадэ мазэхэм къриубыдэу Къэбэрдей-Балъкъэрым къыщыщIагъэкIащ нэкулъ лIэужьы­гъуэу тонн 507-рэ икIи ар проценти 4,4-кIэ нэхъыбэщ нэгъабэ и апхуэдэ пIалъэм щыIа бжыгъэхэм нэхърэ. Нэкулъыр къыщIэзыгъэкI IуэхущIапIэ нэхъ ину тху республикэм иIэщ икIи джэд­къазылымрэ былымылымрэ къыхэщIыкIауэ лIэужьыгъуэ куэд сату щIыпIэхэм хурагъашэ.
Фигу къэдгъэкIыжынщи, дызэрыт илъэсым и мазибгъум къриубыдэу республикэм и мэкъумэш, фермер, уней IуэхущIапIэхэм, унагъуэхэм псоми зэхэту лырэ джэдкъазылу къалэжьащ тонн мин 85,7-рэ (псэууэ шэчауэ). Нэгъабэрей бжыгъэхэм ебгъапщэмэ, ар проценти 6,2-кIэ нэхъыбэщ. Абы щыщу процент 37-р мэкъумэш IуэхущIапIэхэм къалъос икIи ар тонн мин 32-м ноблагъэ (псэууэ шэчауэ). Нэгъабэ и апхуэдэ пIалъэм щыIа бжыгъэхэм ар проценти 104,8-кIэ хуокIуэ.