Ди лэжьэгъухэм я гупсысэ

«Журналист зэдэлэжьэныгъэ» проектым ипкъ иткIэ, Къэрэшей-Шэрджэсым, Адыгейм къикIыу ди редакцэм щылэжьа, «Адыгэ псалъэ» газетым и илъэси 100-р щигъэлъапIэм хэта ди лэжьэгъухэр кIуэжа нэужь, мыпхуэдэ тхыгъэ кIэщI гуапэхэр къытхурагъэхьыжащ:

Аслъэныкъуэ Мадинэ («Черкес хэку»): Ди лъэпкъ газетхэм къызэдагъэщIа «Журналист зэдэлэжьэныгъэ» проектым япэ лъэбакъуэр ичагъащIэ пэтми, шэч къытесхьэркъым абы фIагъ куэд къызэрытхудэкIуэнум,  дяпэкIэ илъэс куэдкIи  ар зэрылэжьэнум.

Сыт  сэ абы къысхуихьар жыпIэмэ, нобэ абы и жэуапыр сэркIэ нэрылъагъущ.  Проектым ипкъ иту, Адыгэ Республикэмрэ Къэбэрдей-Балъкъэрымрэ сыщылэжьащ.  ХэгъэгуитIми щыпсэу ди лъэпкъэгъухэм  я щыIэкIэ-псэукIэм, я  адыгэ дунейм сыхэплъащ.  Гушхуэныгъэ къысхалъхьащ хабзэмрэ нэмысымрэ иджырей гъащIэм зэрыдрагъэкIуфым,  литературэбзэр зэрагъэбзэрабзэм,   адыгэ шхыныгъуэхэмрэ лъэпкъ Iэмэпсымэхэмрэ  гушхуэу утыкум къызэрырахьэфым, къафэ дахэмрэ зыIыгъыкIэ екIумрэ щIэблэм зэраIэпэгъум… Адыгэгу щыпкъэ зыкIуэцIылъ ди лъэпкъэгъухэр-щэ! А псори си нэгум щIэкIащ проектым и фIыгъэкIэ. «Хъуапсэр лъапсэ мэхъу» жеIэ адыгэм.  АтIэ, си фIэщ мэхъу, лэжьыгъэ зекIуэм щыслъэгъуар, сызэхъуэпсамрэ си псэр зэщIэзыIэтамрэ ди щIэджыкIакIуэхэм ябгъэдэслъхьэжмэ,  абыхэми я гур къызэрысIэтынур. 

 Аращ ди лэжьыгъэм и мыхьэнэ нэхъыщхьэри. Хэгъэгуищми ис адыгэхэр зэкIэщIэчауэ псэуми, зы лъэпкъыу зэрыщытыр ягу къэдгъэкIыжынырщ,  зэкъуэувэжу къэкIуэныфIым хуэкIуэн зэрыхуейр ягу итлъхьэнращ.

 Ди тхыгъэхэм иужькIэ, «щэнейрэ зэхэпх нэхърэ, зэ плъагъумэ нэхъыфIщ» жызыIэу къуэш республикэхэм еблэгъэнум, гъуэгу махуэ!

Ансыкъуэ Иринэ («Адыгэ макъ»): Налщык тызэрэщылэжьэщт программэм сызыхэплъэм lофшlэгъу дэкlыгъо тхьамафэр зэрэгъэшlэгъоныщтым седжэнджэшыщтыгъэп. Ау ащ сигугъэхэр къыгъэшъыпкъэжьыгъэхэ къодыеп, ашъхьэдэкlыгъ. Тызlукlэгъэ нэбгырэ пэпчъ ищыкlагъэу щытыгъ, гум хэпкlагъ, сишlэжь лъэуж пхырищыгъ. Лъэпкъ журналистикэм илэжьэкlошхоу Хьэшlуцlэ Мыхьамэт, чlым тет адыгэхэр зэфэзыщэхэрэ Дунэе Адыгэ Хасэм и тхьаматэу Сэхърэкъо Хьаути, хэкупсэу, илъэпкъ фэлэжьэн нэмыкlырэ хъопсапlэ зимыlэу lутlыжъ Мэджыд, адыгэ лъэпкъым, бзылъфыгъэм ыцlэ дахэкlэ рязгъэlогъэ Пекъу Алинэ, иорэдхэмкlэ тидахэ зыlуатэу, къедэlухэрэр ымакъэкlэ зыумэхърэ Хьакъулэ Оксан, тикультурэ зыlуатэу, тишхыныгъохэр зыгъэлъэгъохэрэ Къэрдэн Хьэсан, Озрэкъо Чэрим, адыгэм имафэ къэс зытхыхэрэ журналистхэу «Адыгэ псалъэм» иlофышlэхэр - пстэури зэфэшъхьафых. Ау ялъэпкъ зэрэфэлажьэхэрэм, неущ иlэным зэрэфэгумэкlхэрэм ыкlи ащ зэрэтелэжьыхьэхэрэм ахэр зэфегъадэх.

Шхьадж зыфэгъэзагъэм елъытыгъэу адыгэ лъэпкъым игъашlэ лъегъэкlуатэ, иlофыгъохэм ателэжьыхьэ, ишlуагъэ регъэкlы. Ары тиlофшlэн илъэныкъошlур - мафэ къэс ащ фэдэ нэбгыракlэхэм тарещалlэ, нэlуасэ тафешlы, тигъэзет сатырхэмкlэ ахэр цlыфхэм ятэгъашlэх.

Мыщ фэдэ журналист зэдэлэжьэныгъэр къош шъолъырхэм яадыгэ гъэзетхэм язэдэлэжьэныгъэ ихьатыр. Нахьыжъхэм рахьыжьэгъэ lофыр хэнагъэ амышlэу, ары пакlошъ, хахъо иlэу непэрэ редактор шъхьаlэхэу Мэщлlэкъо Саидэ («Адыгэ макъ»), Абидэкъо Люсанэ («Черкес хэку») ыкlи Жыласэ Заурбэч («Адыгэ псалъэ») лъагъэкlуатэ. Ащ ишlуагъэкlэ, тэ, журналистхэм, тшъхьэкlэ тлъэгъугъэр ттхыжьын амал дгъотырэ къодыеп, зэпэблагъэ, зэныбджэгъу тешlы, гъунапкъэхэр lуегъэкlотых, тигущыlакlэ зэфэмыдэми, гу лъытымытэу, тызэгурыlо тэхъу.

Налщык щызгъэкlогъэ тхьамафэм зэфэхьысыжьэу сигъэшlыгъэр бэ, ау анахь шъхьаlэр - адыгэм неущырэ мафэ иl, къытхэкlых ащ фэгуlэхэрэр, кlуачlэ хэзылъхьэхэрэр, игъашlэ фэзгъэлажьэхэрэр: гущыlэкlэ, шlагъэкlэ, искусствэмкlэ. Ау ащ къыфэблэщтыр нахьыб жъугъэу узэlукlэмэ, зым адырэр зэхихымэ, зэхэхьаныр хэбзэ дахэ зыфэтшlымэ. Сыд фэдизэу технологиякlэхэр непэрэ щыlэныгъэм щыпэрытхэми, цlыфым игущыlэрэ, ащ ынэ укlаплъэзэ удэгущыlэщтымрэ ахэр текlощтхэп. Тизэхахьэ нахьыбэ орэхъу!

Тау Замирэ, «Адыгэ макъ» газетым и редактор нэхъыщхьэм и къуэдзэ: Ткъош Къэбэртэе-Бэлкъарым игъэзетхэу «Адыгэ псалъэ», «Кабардино-Балкарская правда» ыкIи «Заман» зыфиIохэрэм ямэфэкI Iофтхьабзэу афызэхащагъэм тэ Адыгеим тырилIыкIоу, «Адыгэ макъэм» иредактор шъхьаIэу МэщлIэкъо Саидэ типащэу тыхэлэжьагъ. 

МэфэкIым тыхэтэу Дунэе Адыгэ Хасэм итхьэматэу Сэхърэкъо Хьаути, КъБР-м и Адыгэ Хасэ итхьэматэу ХьашIуцIэ Мыхьамэт, Европэ Адыгэ Хасэм итхьэматэу Вэрэкъо Заати зэIукIэгъу дахэхэр адытиIагъ. Тинахьыжъхэм шъхьэкIафэ афэтшIыгъ, дгъэлъэпIагъэх.

Журналист зэдэлэжьэныгъэмкIэ тиIофшIэгъухэу Анцокъо Иринэрэ («Адыгэ макъ») Аслъаныкъо Мадинэрэ («Черкес хэку») IофшIэгъу мафэхэу мэфэкIым къыпэу КъБР-м афызэхащагъэхэр гъэшIэгъон дэдэу щыкIуагъэх, зыIуагъэкIэгъэ цIыф шIагъохэм тиIофшIэгъухэм лъытэныгъэ ин къапагъохыгъ, цIыфыгъэкIэ, дэхагъэкIэ къапэгъокIыгъэх. Тижурналистхэри гъэхъагъэ хэлъэу лэжьагъэх.

Анахь къыхэдгъэщымэ тшIоигъор тиIофшIэгъу лъапIэу ыкIи дгъэпшъэшъэгъоу, илъэс пчъагъэхэм зэпхыныгъэ дахэхэр зыдытиIэу «Адыгэ псалъэм» ижурналистэу, Адыгеим изаслуженнэ журналистэу НэкIэпыджэ Замирэ щытхъуцIэ лъапIэу «КъБР-м изаслуженнэ журналист» зыфиIорэр мэфэкIым къыщыфагъэшъошагъ. А гушIуагъор зэрэдэдгощыгъэр тэркIэ лъапIэ. Ежьыми ифэшъошэ дэд! Замирэ иIофшIагъэхэмкIэ лъэпкъхэр, къошхэр, къэралхэр зэзыпхыгъэ цIыф!

«Адыгэ псалъэм» иредактор шъхьаIэу Жыласэ Заурбэч, редакцием иIофышIэхэр гуфэбэныгъэ хэлъэу къытпэгъокIыгъэх. НэкIэпыджэ Замирэ, Чэрим Марианнэ, Гугъуэт Заремэ, Къаныкъо-Фырэ Анфисэ, Уэрдокъуэ Женя, нэмыкIхэми а мэфэ заулэм редакцием тащыIукIэщтыгъ, къытпекIокIыщтыгъэх. IофшIэгъу зэпхыныгъэхэм, зэныбджэгъуныгъэм ялъэмыдж зэдэтIэтыгъ. Ар зымыуасэ щыIэп.

«Адыгэ макъэм» иредактор шъхьаIэу МэщлIэкъо Саидэ зэкъош гъэзетхэм яредакциехэм яIофышIэхэр зэрэщытэу зэIугъэкIэгъэнхэм, шъхьадж гъэзетэм щигъэцэкIэрэ IофымкIэ шIэныгъэу аIэкIэлъхэмкIэ зэхъожьынхэ, зэрэшIэнхэ алъэкIыным афэгъэхьыгъэ проектыкIэ журналист зэдэлэжьэныгъэмкIэ 2025-рэ илъэсым дгъэцэкIэнэу къыхилъхьагъ. Фэдэ зэIукIэгъухэм гукъэкI хьалэмэтхэр къахэкIых. «Адыгэ псалъэм» иредактор шъхьаIэу Жыласэ Заурбэч а гукъэкIыр дыригъэштагъ. Ащ фэдэу зэрэзэдедгъаштэрэм, тызэрэзэгурыIорэм - тегъэгушIо ыкIи тегъэгушхо!

Мэфищым Налщык тыкъэтыфэ гуIэтыпIэу тыгъэр къыщепсыгъ. Иурам дахэхэм къащыткIухьагъ, ибжыхьэ чIыопс идэхагъэ зэхэтшIагъ, иошъо къаргъо къыщыхэIэтыкIыгъэ къушъхьэтхыхэу осыр зытелъхэр нахь благъэ къытфишIыгъэм фэдэу  таIуигъэплъагъ. Мэфэ шIагъохэр Къэбэртэе-Бэлкъарым щитхыгъэх. Ахэр тиIофшIэгъу зэпхыныгъэхэм, зэкъош зэфыщытыкIэхэм ятарихъ къыхэнэщтых, лъэубэкъукIэхэм якъежьапIэу хъущтых.

НэщIэпыджэ Замирэ.