ГъащIэщIэм и хъумакIуэхэр

Къэбэрдей-Балъкъэрым и Перинатальнэ центрым иджыблагъэ къыщрагъэлащ мылъхуэсу дунейм къыщытехьа сабий цIыкIуитI. Ныбэм зэрилърэ тхьэмахуэ 25-рэ, 26-рэ фIэкIа мыхъуауэ дунейм къитехьат цIыкIуитI, грамм 480-рэ, 490-рэ фIэкIаи я мыхьэлъагъхэу. Ахэр езыхэр бэуэфыртэкъым, шхэфыртэкъым, я температурэхэри яхуэIыгъыжыртэкъым. 
А псори зэтрагъэувэжу, дунейм къытехьа цIыкIуитIыр ди дохутырхэм кърагъэлыну къапэщылъащ икIи къалъхуагъащIэхэм мазитI нейкIэ я нэIэ трамыгъэкIыу ахэр якIэлъыплъащ икIи щытыкIэ гугъум тIури кърашащ.
НобэкIэ цIыкIуитIми я хьэлъагъхэр грамм 900-м нагъэсащ, дэIэпыкъуэгъуншэу езыхэми бэуэн щIадзащ. Иджы ахэр реанимацэм ирашри, зи узыншагъэм сэкъат иIэ къалъхуагъащIэхэр щаIыгъ къудамэм ягъэIэпхъуащ, зыхуэфащэ кIэлъыплъыныгъэм щIэту адэкIи зрагъэужьын папщIэ.
20I2 гъэм ипэкIэ ныбэм зэрилърэ тхьэмахуэ 28-м нэмысауэ дунейм къытехьа мылъхуэсхэр, абы щыгъуэ къэралым къыщекIуэкIа хабзэмкIэ, къалъхуахэм хабжэу щытакъым. КъалъхуагъащIэр кърагъэлын щыщIадзэр тхьэмахуэ 28-м щIигъукIэ ар ныбэм илъарэ и хьэлъагъкIэ зы килограммым щхьэдэхауэ щытмэт. Иджыпсту а мардэхэм зэхъуэкIыныгъэ ягъуэтащ икIи дунейм къытехьар ныбэм зэрилърэ тхьэмахуэ 22-м щIигъумэ, и хьэлъагъкIи грамм 500-м нэхърэ нэхъыбэмэ, реанимацэ Iуэхугъуэхэр ирагъэкIуэкIын щIадзэ, дунейм къытехьагъащIэр псэзэпылъхьэпIэм кърашын папщIэ.
Республикэм и Перинатальнэ центрым зы илъэсым къриубыдэу ику иту  апхуэдэ сабий мылъхуэсу 30 дунейм къыщытохьэ - я пIалъэр нэмысауэ, я хьэлъагъкIи зы килограммым нэхърэ нэхъ мащIэу. Апхуэдэ цIыкIухэм хуэдэу псори зэхэту къэралым къащыхуегъэлыр абыхэм я процент 65-70-рщ, Къэбэрдей-Балъкъэрым а бжыгъэхэр процент 90-м щызэрынохьэс икIи УФ-м щынэхъыфIхэм яхохьэ.                                                                                                                              Хьэщыкъуей Олег.