ХьэрычэтщIэн Iуэхум зрагъэужь

IКъэбэрдей-Балъкъэрым «Си хьэрычэт IэнатIэ» и щIыналъэ центрым 2024 гъэм Iуэхутхьэбзэ зэхуэмыдэу 6177-рэ IуэхущIапIэхэм яхуищIащ. Абыхэм ящыщу 3226-р хьэрычэт IэнатIэ мыинымрэ курытымрэ, 719-р – я щхьэ хуэлэжьэжыну зезыгъэтхахэм, 1356-р - цIыху щхьэ закъуэхэм (физлицохэм).

БлэкIа илъэсым иужьрейхэм къызэрагъэпэща хьэрычэт IэнатIэ мыинымрэ курытымрэ ящыщу 251-м къэрал дэIэпыкъуныгъэхэр ягъуэтащ.

«Си хьэрычэт IэнатIэ» щIыналъэ центрым хьэрычэтыщIэхэмрэ я щхьэ хуэлэжьэжыну жэрдэм зыщIахэмрэ яхуищIэ Iуэхутхьэбзэхэм хохьэ чэнджэщхэр етыныр, я IэнатIэм пыщIа хъыбархэм щыгъуазэ щIыныр, методикэ, егъэджэныгъэ дэIэпыкъуныгъэхэр, нэгъуэщIхэри. Апхуэдэу ар ядоIэпыкъу абыхэм я IуэхущапIэхэмрэ къыщIагъэкI продукцэхэмрэ хэIущIыIу щIынымкIи, яIэ фIагъхэм хуэфащэ сертификатхэр етынымкIи, гъэлъэгъуэныгъэхэм, экономикэ зэхуэсхэм хэгъэтынымкIи, УФ-м и сату щIыпIэхэм ахэр къыщыгъэлъэгъуэнымкIи.

«Зэхьэзэхуэр зи лъабжьэ экономикэ лъэщ» лъэпкъ пэхуэщIэм ипкъ иткIэ, республикэм и экономикэм зыужьыныгъэфI егъэгъуэтын папщIэ, щIыналъэ центрым 2025 гъэми пищэнущ хьэрычэт мыинымрэ курытымрэ я IэнатIэхэмрэ хьэрычэт щIэн Iуэхум хыхьэну жэрдэм зиIэхэмрэ Iуэхутхьэбзэ зыхуэныкъуэхэр яхуищIэныр.