ТекIуэныгъэм и махуэм зыхуагъэхьэзыр

Зауэм хэтахэм, лэжьыгъэм, IэщэкIэ ЗэщIэузэда Карухэм, ­хабзэхъумэ IэнатIэхэм я зэгухьэныгъэхэм я зэхуэс иджы­благъэ щекIуэкIащ Бэрбэч Хьэ­тIутIэ и цIэр зезыхьэ Къэбэрдей-Балъкъэр къэрал университетым. Ар къызэIузыхари езы­гъэкIуэкIари еджапIэ нэхъыщхьэм и ветеранхэм я советым и унафэщI Шурдым Хьэ­сэнщ.

Абы къызэрыхигъэщамкIэ, 2025 гъэм къриубыдэу КъБКъУ-м и ветеранхэм я советым иригъэ­кIуэкIыну лэжьыгъэхэр къэ­рал унафэкIэ ягъэнэхуа Хэкум и хъу­макIуэм и илъэсым къитIэсэнущ, Хэку зауэшхуэм ТекIуэныгъэр къызэрыщахьрэ илъэс 80 зэры­ри­къуами хуэунэтIауэ щытынущ. «Къэралым и унафэщIым къыхилъхьа жэрдэмым ипкъ иткIэ, щIыпIэхэм лэжьыгъэшхуэ зэрыщекIуэкIынум хэти щыгъуа­зэщ. Сыт хуэдэ пэхуэщIэми куп­щIэ иIэу, ди япэ итахэм я фэ­еплъыр къиIэту, щIалэгъуалэми едгъэкIуэкIыну Iуэхугъуэхэр гурэ псэкIэ зыхищIэу щытын хуейщ. ЩIалэгъуалэр къыпхузэщIэIэтэнущ и бзэкIэ уепсалъэмэ, и дуней лъагъукIэм зибгъэзагъэмэ. За­дыдощI жытIэу зедгъэхьыну аракъым, атIэ къытпэщылъ лэжьыгъэхэр лъэужьыншэ мыхъуным, ахэр щIэтщIэм и мыхьэнэр я щхьэм ихьэным, я гум ищтэным дытелэжьэн хуейщи, гъунэгъу зэрызэхуэтщIыну Iэмалхэм дыкъыпекIуэкI мыхъуну аращ. ЦIыху гъащIэм хэлъ лъапIэныгъэхэр фIыуэ къызыгурыIуэ ныбжьыщIэ куэд диIэщ, я псалъэм къару иIэу, куэдым  щапхъэ яхуэхъуу. КъысфIощI ахэр лъа­гъуэхэш тхуэхъуну. Хэку зауэш­хуэм ди адэжьхэм къыщахьа ТекIуэныгъэр лIы ныбжь ирокъу, жыпIэми ущыуэнукъым. Ар къэ­зызэуа куэд диIэжкъым, ауэ махуэщIымрэ нэхъыжьыгъэмрэ яхуэ­фащэу дыIущIэн хуейщи, къытпэщылъ псоми набдзэгуб­дзаплъэу пхыплъыпхъэщ», - жи­Iащ Шурдым Хьэсэн.
КъБКъУ-м гъэсэныгъэ лэжьыгъэмкIэ и къудамэм и унафэщI Къумыкъу Резуан тепсэлъыхьащ къаIэтэ Iуэхугъуэхэм ехьэлIауэ пэхуэщIи 150-м хуэдиз ирагъэ­кIуэкIыну зэрагъэхьэзырыр. Абы хеубыдэ пэкIухэр, фэеплъ зэ­хуэсхэр, зэIущIэхэр, флешмоб жыхуаIэ Iуэхугъуэхэр, нэгъуэщI куэди.
ТекIуэныгъэр илъэс 80 щри­къум ирихьэлIэу КъБКъУ-м и пщIантIэ кIуэцIым дэт мывэс­къархэр псори зэрагъэпэщыжащ. Университетым щылэжьауэ е щеджэу дашауэ Хэку ­зауэшхуэм хэкIуэдахэм я фэеплъыр здэщыт щIыпIэм мы далэм дизайн лэжьыгъэ зыбжанэ иращIылIэ. Псом япэрауэ, абы и IуплъапIэр къагъэ­щIэ­рэщIэж, щхъуан­тIагъэбэр и ­хъуреягъкIэ щагъэтIыс, тетIыс­хьэпIэхэр щагъэув, уэздыгъэ ­пкъохэр щыхатIэ. Абы къищы­нэмыщIауэ, фэеплъыр жэщми къэлъэгъуэн хуэдэу, и лъэны­къуиплIым нэхудзхэр хагъэ­тIыс­хьэ. Абы къыдэкIуэу, къызэгъэ­пэщакIуэхэм зэрыжаIэмкIэ, ­КъБКъУ-м медицинэ IэщIагъэр щра­гъэгъуэт и колледжым и гупэм къит фэеплъми апхуэдэ лэжьыгъэ иращIылIэнущ.
Гулъытэ хэха хуащIынущ 2025 гъэм зи юбилейр зыгъэлъапIэ ­ветеранхэм. «Иджыпсту а Iуэхур щIэгъэхуэбжьауэ идогъэкIуэкI. Нэгъабэ зи ныбжьыр илъэс 80 ирикъуа цIыху 15-м даIущIащ, я махуэщIхэри ядэдгъэлъэпIащ. Апхуэдэу КъБКъУ-м ветеранхэм сом мини 115-рэ хуэдиз дэIэпы­къуныгъэ зэраритар къыхэгъэ­щыпхъэщ. БлэкIа илъэсым къриу­быдэу ди нэхъыжьхэм ахъ­шэкIэ университетым защIигъэкъуащ, сом мин 380-рэ хуэдиз яхухихыу. Апхуэдэ гукъэкIхэм мы гъэми пытщэну ди гугъэщ», - жиIащ Шурдым Хьэсэн.
ЗэIущIэм гукъыдэжыр къэзы­-Iэт Iуэхугъуи хэтащ. КъБКъУ-м хъы­барзехьэ технологиехэмрэ экономикэмкIэ и колледжым и ветеранхэм  я  советым  и уна­фэщI Абдулаевэ Светланэ ныбжь дахэ зэрырикъуам къыхэкIыу еджапIэм къыбгъэдэкI ФIыщIэгуапэ тхылъ иратащ. Абдулаевэр Къэбэрдей-Балъкъэрым егъэ­джэ­ныгъэмкIэ щIыхь зиIэ и лэ­жьакIуэщ, Урысейм щIэныгъэ нэхъыщхьэмрэ IэщIагъэ зэрырат щIэныгъэмкIэ щIыхь зиIэ и лэ­жьакIуэщ.
Абдулаевэ Светланэ и закъуэкъым къыхуащIа гулъытэм игъэ­лъапIэр, атIэ ар зэпымычу зы­дэлажьэ нэхъыжьыфIхэми я Iулыджыр къеIэт, зыпэрыт IэнатIэм и мыхьэнэр нэхъри къыхегъэщ. «Хэкум и хъумакIуэм и илъэсыр гукъыдэж къыдэзыт жэрдэм щIагъуэкIэ ежьащи, фIы къытхудэкIуэну дыщогугъ», - жиIащ Шурдым Хьэсэн.

ТРАМЭ Батырджэрий.